၂၀၂၁ လက်နက်ကိုင်တော်လှန်ရေးကနေ ထွက်ပေါ်လာတဲ့ ထူးထူးခြားခြား တပ်ခွဲလေးတခွဲဟာ ကရင်နီအမျိုးသားများကာကွယ်ရေးတပ် (KNDF) မှာ ရှိလို့နေပါတယ်။

ကယန်းအမျိုးသားလူငယ်များ ကက်သလစ်ဘာသာဝင်တွေချည်း သီးသန့်ဖြစ်နေတာကလည်း အဲဒီတပ်ခွဲလေးရဲ့ ထူးခြားချက်ထဲက တခုအပါအဝင်ဖြစ်ပြီး ဒါကို တမင်ဖန်တီးလုပ်ယူထားတာ မဟုတ်ပါဘူးလို့ စစ်မြေပြင်မှာ တွေ့စဉ်က အဲဒီတပ်ခွဲရုံး အဖွဲ့ဝင်တွေက ပြောပြကြပါတယ်။

“အကုန်လုံးက စံပြ ၆ မိုင် ရွာသားတွေချည်းပဲ၊ အာဏာသိမ်းတော့ ရွာကလူငယ်တွေ တော်လှန်ရေးလုပ်မယ်ဆိုပြီး ထွက်ကြတာ၊ ပထမဆုံး တူမီးတွေနဲ့ပေါ့၊ အဲ့ကနေ တပ်ခွဲတခွဲအထိ ဖြစ်လာတာ၊ တပ်ခွဲတခွဲလုံးက စံပြ ၆ မိုင် ရွာသားတွေချည်းပဲ” လို့ အဆိုပါတပ်ခွဲက ရဲဘော်က ပြောပါတယ်။

အဲဒီတပ်ခွဲကတော့ ကရင်နီအမျိုးသားများကာကွယ်ရေးတပ် အမှတ် ၉ တပ်ရင်းရဲ့ တပ်ခွဲ ၁ ပဲ ဖြစ်ပါတယ်။

“ဒီတပ်ခွဲက ထူးခြားတာရှိတယ်၊ အဲဒါကတော့ လက်နက်အကုန်လုံးနီးပါး ၁၀ လက်ဆို ၈ လက်လောက်က တပ်ခွဲက ရဲဘော်တွေရဲ့ မိဘတွေက ဝယ်ပေးကြတာ။ သူတို့မှာ သားလည်းပေးရတယ်၊ သားအတွက် သေနတ်လည်း ဆင်ပေးရတယ်၊ ကျည်ကာတွေလည်း ဝယ်ပေးကြရတယ်၊ နောက်ဆုံး အခုသုံးနေတဲ့ ကားပေါ့၊ အဲဒါဆိုရင်လည်း ရွာက ရပ်မိရပ်ဖတွေက ငှားပေးထားတာ၊ ခဏခဏတော့ ပျက်တာပေါ့” လို့ ​တပ်ခွဲက ရုံးနဲ့ ထောက်ပို့အဖွဲ့ဝင် ရဲဘော်အမျိုးသမီးတဦးက ဆိုပါတယ်။

တပ်ခွဲ ၁ ကို KNDF ဖွဲ့စည်းပြီး သိပ်မကြာခင်ကာလ ၂၀၂၁ ခုနှစ်ထဲမှာပဲ ဖွဲ့စည်းခဲ့ပြီးတော့ လွိုင်ကော်မြို့အရှေ့ခြမ်း စံပြ ၆ မိုင်ရွာ ပတ်ဝန်းကျင်မှာ ၂၀၂၁ ခုနှစ် နိုဝင်ဘာလကတည်းက စစ်ရေးလှုပ်ရှားမှုကို ပြုလုပ်နေကြတာပါ။

ဆေး၊ ဆက်သွယ်ရေး၊ ရုံးအဖွဲ့၊ ထောက်ပို့ စတဲ့ တပ်အင်္ဂါရပ်တွေနဲ့ စနစ်တကျ ဖွဲ့စည်းထားတဲ့ တပ်ခွဲ ၁ ဟာ တိုက်ပွဲတွေမှာ တိုက်ရည်ခိုက်ရည်ကောင်းလို့ နာမည်ကြီးပေမဲ့ စစ်အသုံးစရိတ်သုံးငွေနဲ့ အလှူငွေ မမျှတလို့ တလ တလ ခေါင်းကိုက်ရတယ်လို့ တပ်ခွဲရုံးအုပ်က ပြောပြပါတယ်။

“များသောအားဖြင့် ဒီမှာ ကားအသုံးစရိတ်၊ စားစရိတ် အားလုံးဆို တလတလ ၈၀/၉၀ ထွက်တယ်၊ အလှူငွေဆိုတာကလည်း ကျနော်တို့ ၆ မိုင်ရွာကနေ နိုင်ငံခြားတွေကို ထွက်ပြီး အလုပ်လုပ်နေတဲ့ ညီအစ်ကိုမောင်နှမတွေက ကူညီပေးတဲ့ သိန်း ၂၀ ဝန်းကျင်ပဲရှိတယ်။ အဲ့တော့ မမျှတဘူး ပြောရမယ်ပေါ့။ လက်နက်ခဲယမ်းတွေကို ရဲဘော်ရဲ့ မိသားစုက ထောက်ပံ့နေတာကြောင့် တော်သေးတယ်” လို့ သူက ရီရီမောမော ပြောပြပါတယ်။

တပ်ခွဲ ၁ မှာ ပြဿနာရယ်လို့ ကြီးကြီးမားမား ဖြစ်ပွားတာမျိုးမရှိဘဲ တပ်စိတ်မှူး၊ တပ်စုမှူး၊ ဒုခွဲမှူး၊ တပ်ခွဲမှူး အဆင့်နဲ့တင် ပြီးသွားကြတယ်လို့ တပ်ခွဲရဲဘော်တွေက ပြောပြပြီး ရှေ့တန်းကို သွားရောက်တဲ့ အခါမှာလည်း လိုက်ချင်သူ များပြားတာကြောင့် အတင်းထားခဲ့ရတာမျိုးတွေပါ ရှိတယ်လို့ သိရပါတယ်။

အဆိုပါတပ်ခွဲမှာ စိတ်ပြင်းပြလွန်းတဲ့ စံပြ ၆ မိုင်ကျေးရွာက အသက် ၁၇ နှစ်အရွယ် ရဲဘော်တွေပါရှိပြီး သူတို့ကိုတော့ နောက်တန်း စားဖို၊ ရုံးတာဝန်တွေပဲ ပေးအပ်ထားပြီး လေ့ကျင့်မှုပြည့်ဝပြီး အသက်ပြည့်တော့မှပဲ တပ်ခွဲရှေ့တန်းတာဝန်တွေ ပေးအပ်မှာဖြစ်တယ်လို့ တပ်ခွဲရုံး အဖွဲ့ဝင်တဦးက ပြောပါတယ်။

ကရင်နီအမျိုးသားများကာကွယ်ရေးတပ်မှာ ဗျူဟာ ၈ အထိ ရှိလာခဲ့ပြီဖြစ်ပြီး စစ်ရေးတာဝန်တွေကို ကရင်နီတပ်မတော်၊ ကရင်နီလူမျိုးပေါင်းစုံလွတ်မြောက်ရေးတပ်ဦး စတဲ့ ဒေသတွင်း မဟာမိတ်တပ်တွေနဲ့ ပူးပေါင်းဆောင်ရွက်နေပြီး စစ်ရေးအရ အောင်မြင်မှုတွေ အများကြီး ရရှိထားတာလည်း ဖြစ်ပါတယ်။

ဂနိုက်