ရခိုင်ပြည်နယ်၊ သံတွဲမြို့နယ် ဆင်ခေါင်းရွာကို စစ်ကောင်စီတပ်က ဇွန် ၅ ရက် မနက် ၈ နာရီလောက်မှာ လေယာဉ်နဲ့ဗုံးကြဲလို့ ဒေသခံ ၁၆ ယောက်ထက်မနည်း သေဆုံးခဲ့ရတယ်လို့ ဆင်ခေါင်းရွာသားတယောက်က DVB ကို ပြောပါတယ်။

တိုက်ပွဲဖြစ်တာမရှိတဲ့ ဆင်ခေါင်းကျေးရွာနားကို ဇွန် ၃ ရက်လောက်ကတည်းက လေကြောင်းအပြင် နေဗီသင်္ဘောတွေကပါ လက်နက်ကြီးတွေနဲ့ ပစ်ခတ်နေတာ ဖြစ်ပါတယ်။

ဆင်ခေါင်းရွာသားတဦးက “မနက်က (ဇွန်လ ၅ ရက်နေ့) ရွာသားတွေက ပစ္စည်းတွေဘာတွေ ကျန်ခဲ့လို့ဆိုပြီး သွားယူချိန်မှာပဲ လေယာဉ်နဲ့ ဗုံးကြဲလိုက်တာ။ ၂ လုံးကြဲလိုက်တာ ၁၆ ယောက်လောက် သေသွားတာပဲ” လို့ ပြောပါတယ်။

ဒါကြောင့် ဇွန် ၅ ရက်နေ့မှာတော့ မနက်ပိုင်းကတည်းက ဆင်ခေါင်းကျေးရွာက ရွာခံတွေအားလုံး နီးစပ်ရာတွေကို ထွက်ပြေးနေကြပြီလို့ ဆိုပါတယ်။

သေဆုံးသူ အရပ်သားတွေရဲ့ ရုပ်အလောင်းတွေကိုလည်း ညနေပိုင်းအထိ မကောက်ရဲသေးဘဲ သံတွဲနဲ့ တောင်ကုတ်မြို့တွေကိုပါ သွားမရတာကြောင့် ဒဏ်ရာရရှိသူတွေကို ဆေးကုသပေးဖို့ အခက်ကြုံနေရကြောင်း ဆိုပါတယ်။

ဆင်ခေါင်းရွာသူတဦးကလည်း လူအများအပြား သေဆုံးရတာကို ကြားရပေမဲ့ ဇွန် ၄ ရက်ကတည်းက တောထဲမှာ စစ်ရှောင်နေရတာကြောင့် အတိအကျ မသိရသေးဘူးလို့ DVB ကို ပြောပါတယ်။

ဒီကိစ္စနဲ့ပတ်သက်ပြီး အာရက္ခတပ်တော်က ထုတ်ပြန်တာ မရှိသေးသလို DVB အနေနဲ့လည်း အသေးစိတ် အတည်မပြုနိုင်သေးဘဲ ဆက်လက်စုံစမ်းနေပါတယ်။