ကချင်ပြည်နယ်၊ ဖားကန့်မြို့နယ်၊ ဟောင်ပါးကျေးရွာအုပ်စုထဲ ဆယ်ဇင်းရွာအထက်နားမှာစခန်းချတဲ့ ခမရ (၁၁၆) စခန်းကို KIA၊ KPDF ပူးပေါင်းတပ်တွေက ရှင်းလင်းသိမ်းပိုက်လိုက်ပြီလို့ ဒေသခံတွေက ပြောပါတယ်။
ဆယ်ဇင်းရဲစခန်းကို ဧပြီ ၉ ရက်မှာ KIA တပ်မဟာ ၉ နဲ့ ပူးပေါင်းတော်လှန်ရေးတပ်ဖွဲ့တွေက သိမ်းပိုက်ခဲ့ပြီး ၁၀ ရက်ကျော်အကြာ ဧပြီ ၂၄ ရက်နေ့မှာ စခန်းကုန်းကိုပါ ရှင်းလင်းလိုက်တာဖြစ်ပါတယ်။
“ဟုတ်တယ်။ ဆယ်ဇင်းစခန်းကုန်းကို မနေ့က ညမှာသိမ်းလိုက်ပြီ” လို့ ဖားကန့်ဒေသခံက DVB ကို အတည်ပြု ပြောပါတယ်။
ခမရ (၁၁၆) စခန်းကို ဧပြီ ၂၀ ရက်မှာစတင် ဝိုင်းပတ်တိုက်ခိုက်ခဲ့ပြီး ၄ ရက်အကြာ ဧပြီ ၂၄ ရက် နံနက်အစောပိုင်း ၁ နာရီ မထိုးခင်လောက်မှာ သိမ်းပိုက်နိုင်လို့ KIA ဘက်က စခန်းရှင်းလင်းရေးလုပ်နေပြီလို့ ဒေသအခြေစိုက် သတင်းဌာနတွေကလည်း ရေးသားကြပါတယ်။
ဒါကြောင့် KIO/ KIA သတင်းပြန်ကြားရေးတာဝန်ရှိသူဆီ DVB က ဖုန်းနဲ့ဆက်သွယ်ပေမယ့် ဧပြီ ၂၄ ရက်၊ မနက်ပိုင်းအထိကတော့ လက်ခံဖြေဆိုတာမရှိသေးပါဘူး။
ဖားကန့်မှာ ဆက်လက်စစ်ရေးတင်းမာနေပြီး နမ္မဖြစ်ကျေးရွာ ပန်းတင်တံတားဂိတ်မှာလည်း ဒီမနက်ပစ်ခတ်မှု ဖြစ်ခဲ့သေးကြောင်း မြို့ခံတချို့ကပြောပေမယ့် အတိအကျကို DVB က ဆက်လက်စုံစမ်းနေတုန်းဖြစ်ပါတယ်။
ပြီးခဲ့တဲ့ ဇန်နဝါရီ ၂၀ ရက်က မြစ်ကြီးနား-ဖားကန့် လမ်းက ဝှေခါ စစ်ကောင်စီစခန်း၊ ဖေဖော်ဝါရီ ၃ ရက်နေ့က နန့်တိန် စစ်ကောင်စီစခန်း၊ မတ် ၅ ရက်နေ့က တာမခန်စစ်ကောင်စီ ရဲစခန်း၊ မတ် ၁၁ ရက်နေ့က ဖားကန့် ကသိုဏ်းတောင် စစ်ကောင်စီစခန်း၊ မတ် ၁၃ ရက်နေ့ ဖားကန့် နမ့်မှော် အနီးက တန်-၃၀၀၀ စစ်ကောင်စီစခန်း၊ ဧပြီ ၁၁ ရက်နေ့မှာ မြစ်ကြီးနား-ဖားကန့်လမ်းပေါ်က နန့်ယားစခန်း တွေကို KIA နဲ့ ပူးပေါင်းတပ်ဖွဲ့တွေက သိမ်းပိုက်ရရှိထားပါတယ်။
