ချင်းပြည်ကာကွယ်ရေးတပ်-ကလေး၊ ကဘော်၊ ဂန့်ဂေါထံ (CDF-KKG) ကလေးဝမြို့နယ်မှ ဒုရဲအုပ် တဦး လက်နက်တွေနဲ့ အလင်းဝင်ခဲ့တယ်လို့ CDF-KKG ထံက သိရပါတယ်။

ဒုရဲအုပ်ဟာ အသက် ၃၈ နှစ်အရွယ်ရှိပြီး ဧပြီ ၁၅ ရက်မှာ CDF-KKG ရဲဘော်တွေနဲ့ ဆက်သွယ်အလင်းဝင်ရောက်ခဲ့တာ ဖြစ်ပါတယ်။

သူနဲ့အတူ BA94 လက်နက် ၁ လက်၊ ကျည်ဘောက်  ၂ ခု၊ ကျည်ဆန်အတောင့် ၂၀၀၊ ခြောက်လုံးပြူး သေနတ် ၁ လက်၊ ကျည်ဆန်အတောင့် ၂၀၀ ပါဝင်ခဲ့တယ်လို့ သိရပါတယ်။

CDF-KKG ပြန်ကြားရေးတာဝန်ခံက“သူကတော့ ကျနော်တို့ရဲဘော်တွေဆီ ဖုန်းကနေပြီးတော့ပဲ ဆက်သွယ်ပြီး အလင်းဝင်လာတာပါ။ သူအပါအဝင် ပျူစောထီး တယောက်နဲ့ပါဆို ဒီနှစ်အတွင်း အလင်းဝင်လာတဲ့သူ ၆ ယောက်ရှိပါပြီ” လို့ ပြောပါတယ်။

အလင်းဝင်လာတဲ့ ဒုရဲအုပ်ကို CDF-KKG မှ ဆုငွေ ကျပ် သိန်း ၅၀ ချီးမြှင့်ထားပြီး သူသွားချင်တဲ့ လွတ်မြောက်နယ်မြေကို ပို့ဆောင်ပေးခဲ့တယ်လို့ သိရပါတယ်။