ဧရာဝတီတိုင်း၊ ပုသိမ်မြို့မှာ လူငယ်တွေ မကြာခဏ ပျောက်နေတာကြောင့် အလုပ်သမားတွေ အိမ်ပြန်ချိန် နောက်မကျအောင် အလုပ်ရှင်တွေအနေနဲ့ ည ၈ နာရီထက်နောက်မကျဘဲ ပြန်လွှတ်ပေးဖို့ ပုသိမ်မြို့နယ်ပြည်သူ့ကာကွယ်ရေးတပ်ဖွဲ့က စာထုတ်သတိပေးထားပါတယ်။
ပုသိမ်မြို့ပေါ်မှာ စစ်ကောင်စီတပ်သားတွေက ည ၉ နာရီကျော်မှ အလုပ်ဆင်းလာတဲ့သူတွေကို စောင့်ဖမ်းပြီး ပိုက်ဆံနဲ့ ရွေးခိုင်းသလို မရွေးနိုင်တဲ့သူတွေကို စစ်မှုထမ်းခိုင်းဖို့အတွက် ၂၇၁ တပ်ရင်းကို ပို့ဆောင်နေတယ်လို့ ဆိုပါတယ်။
အလုပ်ရှင်တွေအနေနဲ့ အလုပ်သမားတွေ အဖမ်းမခံရဖို့အတွက် ည ၈ နာရီအထိသာ ခိုင်းစေဖို့အတွက် အသိပေးကာလ ၁ လသတ်မှတ်ထားပြီး မလိုက်နာပါက အရေးယူသွားမယ်လို့ ပုသိမ်မြို့နယ် ပြည်သူ့ကာကွယ်ရေးအဖွဲ့တာဝန်ရှိသူတဦးက ပြောပါတယ်။
"စစ်ကောင်စီတပ်သားတွေက ည ၉ နာရီကျော်တာနဲ့ အလုပ်သမားတွေကိုဖမ်းပြီး ပိုက်ဆံတောင်းတယ်။ ပိုက်ဆံမပေးနိုင်တဲ့သူတွေကို စစ်တပ်ထဲ ဝင်မလား၊ ထောင်ထဲ ဝင်မလားဆိုပြီး ရွေးခိုင်းတယ်။ တော်တော်များများက ပိုက်ဆံလည်း မပေးနိုင် ထောင်ထဲလည်း မဝင်ချင်လို့ စစ်တပ်ထဲ ဝင်ကြရတာပေါ့။ အလုပ်သမားတွေက အလုပ်ရှင် ခိုင်းရင် ည ၁၀ နာရီပဲဖြစ်ဖြစ် လုပ်ကြရမှာဖြစ်တဲ့အတွက် သူတို့ကို ကာကွယ်နိုင်ဖို့ စာထုတ်ပြန်ခဲ့တာပါ။”
ပုသိမ်မြို့ ဘုရားကုန်းကျေးရွာမှာ ဖေဖော်ဝါရီ ၁၃ ရက် ည ၁၀ နာရီကျော်က အလုပ်ကပြန်လာတဲ့ အမျိုးသား ၃ ဦးကို စစ်ကောင်စီတပ်သားတွေက ဖမ်းဆီးသွားပြီးနောက် မိသားစုနဲ့ အဆက်အသွယ် ပြတ်တောက်နေပါတယ်။
ပုသိမ်မြို့မှာ ညမထွက်ရအမိန့်ကို ည ၁၂ နာရီမှ မနက် ၄ နာရီအထိ ထုတ်ထားပေမဲ့ ည ၉ နာရီနောက်ပိုင်း အလုပ်ပြန်လာတဲ့သူ အများအပြား ဖမ်းဆီးခံရတာတွေရှိနေပြီး ဖမ်းဆီးခံရတဲ့သူ အများစုဟာလည်း မိသားစုနဲ့ အဆက်အသွယ် ပြတ်တောက်နေတယ်လို့ ပုသိမ်မြို့ခံတဦးက ပြောပါတယ်။
"ညမထွက်ရအမိန့်နဲ့ ဖမ်းသွားတယ် ကြားလို့ အိမ်ကသူတွေ လိုက်ရင် အဆက်အသွယ်မရတော့ဘူး။ ပုသိမ်မှာက အရင်ကတည်းက အဲဒီလိုတွေဖြစ်နေလို့ အများစုက ည ၈ နာရီနောက်ပိုင်းဆို မထွက်ကြတော့ဘူး။ အိုဗာတိုင်ဆင်းတဲ့ အလုပ်သမားတွေလောက်ပဲ အဲဒီအချိန်ရှိတာ။ စစ်တပ်က ည ၉ နာရီနောက်ပိုင်း အပြင်မှာရှိနေတဲ့သူတွေနဲ့ မနက် ၄ နာရီနောက်ပိုင်း ဈေးသွားသူတွေကို အဓိကထား ဖမ်းတယ်။"
ပုသိမ်မြို့ရှိ ကြံ့ခိုင်ရေးပါတီဝင်တွေကလည်း စစ်မှုမထမ်းမနေရ ထုတ်ပြန်ပြီးနောက်ပိုင်း စစ်တပ်ထဲဝင်ရမှာ ကြောက်လို့ ပြည်သူ့စစ်အဖွဲ့တွေ ဖွဲ့နေတယ်လို့ ဒေသခံတွေက ပြောပါတယ်။
