မြန်မာနိုင်ငံမှာ စစ်မှုမထမ်းမနေရအမိန့်ထုတ်ပြန်ပြီးနောက်  လတ်တလော ထိုင်းနိုင်ငံထဲကို မြန်မာနိုင်ငံသားတွေ တရားမဝင် ဝင်ရောက်မှုပိုစိပ်လာကာ ဖမ်းဆီး ခံရတာလည်း နေ့စဉ်ရက်ဆက်ရှိနေပါတယ်။

ဖေဖော်ဝါရီ ၂၀ ရက်မှာဆိုရင် တာ့ခ်ခရိုင် ဖုပ်ဖရမြို့နယ်ဘက်ကို ဝင်ရောက်လာတဲ့ တရားမဝင် မြန်မာ ၁၈ ဦးကို လမ်းပြ ၂ ဦးနဲ့အတူ ဖမ်းဆီးရမိတယ်လို့  AEC အာဆီယံ ထိုင်းသတင်းမှာ ဖော်ပြပါတယ်။

နယ်စပ် ၅ မြို့နယ်လုံခြုံရေးတပ်ဖွဲ့ဝင်နဲ့   ရာ့ချ်မနူစစ်ကြောင်းမှ တပ်ဖွဲ့ဝင်တွေဟာ နယ်မြေထဲမှာ တရားဥပဒေစိုးမိုးရေးဆောင်ရွက်နေစဉ် ဖုပ်ဖရမြို့နယ် ဖုပ်ဖရအုပ်စု တောင်ရပ်ကွက်ထဲ ဝင်ရောက်လာတဲ့  အဖြူရောင် တိုယိုတာပစ်အပ်ကား တစီးကို မသင်္ကာလို့  ရပ်တံ့စစ်ဆေးရာမှာ အထောက်အထားမဲ့ မြန်မာနိုင်ငံသား ကျား ၈ ဦး မ ၁၀ ဦး စုစုပေါင်း ၁၈ ဦးလိုက်ပါလာတာလို့ ဆို ပါတယ်။ 

သူတို့ကို လဝက ဥပဒေနဲ့ အရေးယူဖို့ ဖုပ်ဖရမြို့နယ်ရဲစခန်းကို ပို့ဆောင်ထားပြီး ယာဉ် မောင်းဖြစ်သူ နိုင်းချား ( ၃၁ နှစ် ) နဲ့ အဖော်ဖြစ်သူ နိုင်းဆဒ် ( ၃၁ နှစ် ) တို့ကိုလည်း  ထိုင်းနိုင်ငံထဲ တရားမဝင်သူတွေ ဝင်ရောက်လာနိုင်အောင်အားပေးကူညီမှု ၊ တရားမဝင်အလုပ်သမား သယ် ဆောင်မှုတွေနဲ့ အရေးယူသွားမယ်လို့ ဆိုပါတယ်။

ဖေဖော်ဝါရီ ၁၉ ရက်ကလည်း နခွန်းဆဝမ်ခရိုင် တတ်ဖာ့မြို့နယ်ထဲမှာ တရားမဝင် မြန်မာ ၁၁ ဦး နဲ့ ယာဉ်မောင်း မြန်မာ ၂ ဦး ဖမ်းဆီးခံခဲ့ရတယ်လို့ ချနယ်လ် ၇ ထိုင်းတီဗွီသတင်းအရ သိရပါတယ်။

မနေ့မနက် ၁၁ နာရီလောက်က အဖြူရောင် အီဇူစူးဟိုင်းလပ်ကား ၁ စီး နဲ့ မီးခိုးရောင် တိုယိုတာဗွီးကို့ ကား ၁ စီးတို့ဟာ အဝေးပြေးလမ်းမကြီးပေါ်ကနေ နယ်မြေထဲ မောင်း နှင်လာကြောင်း၊  မီးခိုးရောင်ကားဟာ လေးလံနေဟန်ရှိပြီး ကားနောက်ခန်းမှာ ဘာမှ ပါမလာတဲ့အတွက် တာဝန်ရှိသူတွေက မသင်္ကာလို့ နောက်ယောင်ခံလိုက်ခဲ့တယ်လို့ ဆိုပါတယ်။ 

အဆိုပါကား ၂ စီးဟာ  ဆုခ်ဆန်လန်းရပ်ကွက်ရှိ ဓာတ်ဆီဆိုင်တခုမှာ ဝင်ရောက်ရပ်နားစဉ်တာဝန်ရှိ သူတွေက ကားရှေ့ကို သံချောင်းနဲ့ ချထားလိုက်ပြီး ဝင်ရောက်စစ်ဆေးခဲ့တယ်၊  မီးခိုးရောင် ကားထဲကနေ  တရားမဝင် မြန်မာ ၁၁ ဦးတင်ဆောင်လာတာဖြစ်ပြီး ကားမောင်းသူ ၂ ဦးမှာလည်း  အသက် ၂၆ နှစ် နဲ့ ၂၇ နှစ်ရွယ်ရှိ မြန်မာအမျိုးသား ၂ ဦးဖြစ်တယ်လို့ ဆိုပါတယ်။ 

အဆိုပါ တရားမဝင်အလုပ်သမားတွေကို ချင်းမိုင်ကနေ ဘန်ကောက်ထိ  ပို့ပေးဖို့  အမည်မသိပွဲစား ၁ ဦးက ဆက်သွယ်ခဲ့ကြောင်း၊ လူသယ်တဲ့ကားက ၁ ဦးလျှင် ဘတ် ၈၀၀၀ နှုန်း၊ လမ်းပြကားက ၁ ဦးလျှင် ဘတ် ၈၀၀ နှုန်းနဲ့ သဘောတူပြီးသယ်ဆောင်ခဲ့တယ်။ ဒီလို လူသယ်တဲ့အလုပ်လုပ်လာတာ ဒါနဲ့ပါဆို ၃ ကြိမ်ရှိသွားပြီလို့ ဝန်ခံသွားပါတယ် ။ 

သူတို့အားလုံးကို လဝက ဥပဒေနဲ့အရေးယူဖို့ နခွမ်းဆဝမ်ရဲစခန်းကို ပို့ဆောင်ထားတယ်လို့ ဆိုပါတယ် ။ 

ဖေဖော်ဝါရီ ၁၉ ရက် တနေ့တည်းမှာဘဲ ထိုင်းတောင်ပိုင်း ရနောင်းခရိုင် ဆုခ်ဆမ်ရမ်းမြို့နယ်ထဲမှာ တရားမဝင် ဝင်ရောက်လာတဲ့ မြန်မာ ၁၄ ဦးကို လမ်းပြ ထိုင်း ၄ ဦးနဲ့အတူ ဖမ်းဆီးရမိတယ်လို့  ထိုင်းစစ်တပ် အမှတ် ၂၅  ခြေလျင်တပ်ရင်းလူမှုကွန်ယက်မှာ ဖော်ပြပါတယ် ။ 

ဆုခ်ဆန်လမ်းမြို့ ကမ်ဖွန်းရပ်ကွက် နယ်မြေ ၂  ရှိ စစ်ဆေးရေးဂိတ်ကနေ တရားမဝင် မြန်မာ ၃ ဦးတင်ဆောင်လာတဲ့ အနက်ရောင်တိုယိုတာအိမ်စီးကားကို ဦးစွာဖမ်းဆီးရမိပြီး ယာဉ် မောင်းဖြစ်သူ နိုင်းအေ ( ၂၈ နှစ် )က သူတို့အသုတ်ထဲမှာ နောက်ထပ်ကား ၂ စီးရှိသေးတယ်လို့ ဖွင့်ဟဝန်ခံလိုက်ပါတယ်။

ဒါကြောင့် အဆိုပါကား ၂ စီးကို သက်ဆိုင်ရာစစ်ဆေးရေးဂိတ်မှ စောင့်ကြပ်စစ်ဆေးရာမှာ နောက်ထပ် တရားမဝင် မြန်မာအမျိုးသား ၄ ဦး အမျိုးသမီး ၆ ဦး တို့ကို ဖမ်းမိခဲ့တာဖြစ်ပြီး ယာဉ်မောင်း ၂ ဦးနဲ့ ဘေးကအဖော်အဖြစ်လိုက်လာတဲ့ အမျိုးသမီး ၁ ဦးတို့ပါ လမ်းပြအနေနဲ့ ဖမ်းဆီးခံလိုက်ရတာ ဖြစ်ပါတယ်။ 

ဒီမတိုင်ခင် ဖေဖော်ဝါရီ ၁၈ ရက် မနက်ကလည်း ထိုင်းတောင်ပိုင်း ချွန်းဖွန်းခရိုင် ဖာ့တို့မြို့နယ်ထဲမှာ တရားမဝင် မြန်မာမိသားတစ်စု  အမျိုးသား ၂ ဦး ၊ အမျိုးသမီး ၃ ဦး နဲ့ ကလေး ၂ ဦး ပေါင်း ၇ ဦး ဖမ်းဆီးခံခဲ့ရပါသေးတယ်။

သူတို့မှာ ယာယီနယ်စပ်ဖြတ်ကျော်လက်မှတ် Border Pass သာရှိပြီး ကန့်သတ်ထားတဲ့နယ်မြေကို ကျွံဝင်လာတာကြောင့် အဖမ်းခံရတာပါ။  ယဉ်မောင်းမှာ အသက် ၆၈ နှစ်ရွယ် နိုင်းဒါးဆိုသူ ထိုင်းအမျိုးသားဖြစ်ပြီး ပွဲစားက သူတို့ကို ရနောင်းခရိုင် လန်ဆွန်မြို့နယ်ကနေ ချွန်းဖွန်းခရိုင်ထိ ၁ ဦးလျှင် ဘတ် ၃၅၀၀ နှုန်းနဲ့  ပို့ဆောင်ပေးဖို့ ဆက်သွယ်လာတာကြောင့် သယ်ဆောင်ခဲ့တာလို့ ဝန်ခံသွားပါတယ် ။ 

စစ်တပ်အာဏာသိမ်းထားတဲ့ မြန်မာနိုင်ငံမှာ နိုင်ငံရေးမတည်ငြိမ်မှုကြောင့်  စီးပွါးရေး အကျပ်အတည်း၊ အသက်အိုးအိမ်စည်းစိမ် လုံခြုံရေးအခက်အခဲတွေရှိနေပြီး နိုင်ငံသားတွေဟာ နည်းမျိုးစုံနဲ့ ပြည်ပကို ထွက်ခွာနေကြပြီး  အများစုဟာ အိမ်နီးချင်းထိုင်းနိုင်ငံထဲ တရားမဝင် ဝင်ရောက်ကြကာ ဖမ်းဆီးခံရတာတွေလည်း နေ့စဉ်လိုရှိနေပါတယ်။