လီဗာပူးအသင်း ကစားသမားဟောင်းနဲ့ Sky Sports ရဲ့ ထင်ရှားတဲ့ ဘောလုံးဝေဖန်သူ ဂျေမီကာရေဂါဟာ အခွန်ငွေ မပေးဆောင်ရသေးတာကြောင့် ဒေဝါလီခံရမဲ့ အခြေအနေနဲ့ ရင်ဆိုင်နေရပါတယ်။

ဗြိတိန် အခွန်ဘဏ္ဍာရေးဌာန (HMRC) က လန်ဒန်တရားရုံးချုပ်မှာ သူ့ကို ဒေဝါလီခံဖို့ တရားဝင် လျှောက်ထားခဲ့တာ ဖြစ်ပါတယ်။

ဒီမပေးဆောင်ရသေးတဲ့ အခွန်ငွေ ပမာဏဟာ ပေါင် ၈ သိန်းအထိ ရှိနိုင်တယ်လို့လည်း သတင်းတွေက ဖော်ပြပါတယ်။

HMRC က ဒီလျှောက်လွှာကို ပြီးခဲ့တဲ့ ဗုဒ္ဓဟူးနေ့က တရားရုံးမှာ တင်သွင်းခဲ့တာပါ။ ဒီတရားရုံး လျှောက်ထားမှုကြောင့် ကာရေဂါရဲ့ ဘဏ္ဍာရေးအခြေအနေကို တရားဝင် စုံစမ်းစစ်ဆေးမှုတွေ လုပ်ဆောင်သွားမှာ ဖြစ်ပါတယ်။

ဒီစုံစမ်းစစ်ဆေးမှုတွေရဲ့ နောက်ဆုံးရလဒ်အနေနဲ့ သူ့ကို ဒေဝါလီခံရသူအဖြစ် ကြေညာနိုင်ခြေ ရှိနေတယ်လို့ ဆိုပါတယ်။