ထိုင်းနိုင်ငံ၊ တာ့ခ်ခရိုင်၊ မဲဆောက်မြို့မှာ တရားမဝင် ဝင်ရောက်လာတဲ့ မြန်မာနိုင်ငံသား ၆ ဦးကို ထိုင်းရဲတပ်ဖွဲ့က ဖမ်းဆီးရမိခဲ့တယ်လို့ တာ့ခ်ခရိုင် လူဝင်ကြီးကြပ်ရေးဌာနက နိုဝင်ဘာ ၄ ရက်မှာ ထုတ်ပြန်ပါတယ်။
မဲဆောက်မြို့၊ ဘန်ဟွေဟေဖင်ကျေးရွာရှိ တာ့ခ်ခရိုင် လူဝင်မှုကြီးကြပ်ရေး တားဆီးနှိမ်နင်းရေးဂိတ်မှာ ဒီဇင်ဘာ ၄ ရက် နေ့လယ် ၁၁ နာရီခွဲက ထိုင်းနိုင်ငံထဲ တရားမဝင် ဝင်ရောက်လာတဲ့ မြန်မာနိုင်ငံသား ၃ ဦးကို တာ့ခ်ခရိုင် လူဝင်မှုကြီးကြပ်ရေး အရာရှိတွေက ဖမ်းဆီးရမိခဲ့ပါတယ်။
တာ့ခ်ခရိုင် လူဝင်မှုကြီးကြပ်ရေး အရာရှိတွေနဲ့ မှုခင်းနှိမ်နင်းရေး အရာရှိတွေဟာ နယ်မြေလုံခြုံရေး အရာရှိတွေနဲ့ ပူးပေါင်းပြီး မဲဆောက်မြို့အတွင်း လိုက်လံကြည့်ရှု စစ်ဆေးနေစဉ် နေ့လယ် ၁ နာရီခန့်က အမှတ် ၂ ဈေးနားမှာ ခွင့်ပြုချက်မရှိဘဲ ဝင်ရောက်နေထိုင်တဲ့ မြန်မာနိုင်ငံသား ၃ ဦးကို ဖမ်းဆီးရမိခဲ့ပါတယ်။
မြန်မာအရေး ကူညီဆောင်ရွက်ပေးနေသူတဦးက “တိုက်ပွဲအခြေအနေတွေကြောင့် MOU စနစ်နဲ့ ထိုင်းကိုလာလို့ မရတော့တာကြောင့် တရားမဝင် ဝင်တဲ့သူတွေက ဒီရက်ပိုင်းမှာ ပိုများလာတယ်။ ၁၀ ရက်အတွင်း မဲဆောက်မြို့တခုတည်းမှာကို မြန်မာ ၁၀၀ လောက် ဖမ်းခံခဲ့ရတယ်။ စားဝတ်နေရေး ကျပ်တည်းတော့လည်း ထွက်ပေါက်က နိုင်ငံခြားထွက်ကြတာ” လို့ ပြောပါတယ်။
ဖမ်းဆီးရမိခဲ့တဲ့ မြန်မာနိုင်ငံသား ၆ ဦးကို တာ့ခ်ခရိုင် လူဝင်မှုကြီးကြပ်ရေးရုံးမှာ ထိန်းသိမ်းထားပြီး တရားမဝင် ဝင်ရောက်မှု ပုဒ်မ ၂၂ အရ အရေးယူဆောင်ရွက်သွားမယ်လို့ တာ့ခ်ခရိုင် လူဝင်မှုကြီးကြပ်ရေးဌာနက ထုတ်ပြန်ခဲ့ပါတယ်။
မဲဆောက်မြို့မှာ ခွင့်ပြုချက်မရှိဘဲ နေထိုင်နေတဲ့ နိုင်ငံခြားသားတွေနဲ့ ခိုးဝင်နေတဲ့ နိုင်ငံခြားသားတွေကို စီမံချက်နဲ့ ဖမ်းဆီးသွားမယ်လို့ တာ့ခ်ခရိုင် လူဝင်မှုကြီးကြပ်ရေးဌာနက ကြေညာခဲ့ပြီး ၂ လအတွင်း မြန်မာနိုင်ငံသား ၂၀၀ ကျော် ၃၀၀ နီးပါး ဖမ်းဆီးခံခဲ့ရပါတယ်။
