နေပြည်တော်၊ လယ်ဝေးမြို့နယ်၊ ပတ္တာကျေးရွာရှိ “လင်း” သောက်ရေသန့်နဲ့ အရက်ချက်စက်ရုံမှာ ဒီဇင်ဘာ ၅ ရက် မနက် ၉ နာရီခွဲလောက်က Level 2 အဆင့် မီးလောင်မှုဖြစ်ပွားခဲ့ပြီး လူ ၂ ဦး ဒဏ်ရာရရှိခဲ့တယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။
မီးလောင်မှုဖြစ်ပြီး နာရီဝက်ကျော်အကြာမှာ မီးသတ်ဌာနကို အနီးအနားနေသူတွေက ဖုန်းဆက်အကြောင်းကြားခဲ့တာဖြစ်ပြီး လယ်ဝေးမြို့နယ်မီးသတ်နဲ့ သက်ဆိုင်ရာမီးသတ်၊ အရပ်ဘက်အသင်းတွေက ထွက်ခွာ ငြှိမ်းသတ်ခဲ့ကြပါတယ်။
မီးငြှိမ်းသတ်နေကြတဲ့ အချိန်အတွင်း အရက်ဆီဘွိုင်လာ ၃ လုံး ပေါက်ကွဲခဲ့တာကြောင့် အသက် ၃၀ ဝန်းကျင် စက်ရုံဝန်ထမ်း အမျိုးသားတဦးနဲ့ မီးသတ်တပ်ဖွဲ့ဝင်တဦးတို့ မီးလောင်ဒဏ်ရာတွေ ရရှိခဲ့ပါတယ်။
အရပ်ဘက်ကယ်ဆယ်ရေးအသင်းဝင်တဦးက “မီးက ၉ နာရီခွဲလောက်ကတည်းက လောင်နေတာကို ကြိတ်ငြှိမ်းနေတာ။ ရေသန့်စက်ရုံဆိုပေမဲ့ အတွင်းမှာ အရက်ဆီတိုင်ကီတွေ ဘွိုင်လာတွေရှိတယ်။ စက်ရုံဝန်ထမ်းတဦးက မီးလောင်နေတဲ့ အရက်ဆီကို ရေနဲ့ လှမ်းပတ်လိုက်တာ သူ့တကိုယ်လုံးနီးပါး လောင်သွားတယ်။ မီးသတ်တဦးလည်း မီးလောင်ဒဏ်ရာ ရသွားပါတယ်။ သာမန် ပြတ်ရှထိခိုက်မိသူတွေလည်း ရှိတယ်” လို့ ပြောပါတယ်။
မီးတောက်အားကောင်းနေတာကြောင့် ၁၀ နာရီ ၂၅ မိနစ်လောက်မှာ Level 2 ကို ဆင့်ခေါ်ခဲ့ကြရပြီး ဆက်လက်ငြှိမ်းသတ်ခဲ့ရာ မနက် ၁၀ နာရီ မိနစ် ၅၀ လောက်မှာ မီးထိန်းနိုင်၊ ၁၁ နာရီမှာ မီးငြှိမ်းသတ်နိုင်ခဲ့ပါတယ်။
မီးလောင်မှုကြောင့် ပေ ၁၀၀ ပတ်လည်ရှိတဲ့ သွပ်မိုး အုတ်အဆောက်အဦ စက်ရုံတခုလုံးနဲ့ အတွင်းပိုင်း ရေသန့်ပစ္စည်း၊ အရက်ချက်ဘွိုင်လာတွေ ပျက်စီးသွားတယ်လို့ သိရပါတယ်။
ထိခိုက်ဒဏ်ရာရရှိသွားတဲ့ အမျိုးသား ၂ ဦးကို လယ်ဝေးမြို့နယ် ခုတင် ၁၀၀ ဆေးရုံကို မိုးစေတနာအသင်းယာဉ်နဲ့ ပို့ဆောင်ပေးထားပြီး မီးလောင်ရတဲ့ အကြောင်းအရင်းနဲ့ ပျက်စီးဆုံးရှုံးတန်ဖိုးကို သက်ဆိုင်ရာ မီးသတ်တပ်ဖွဲ့က စစ်ဆေးတွက်ချက်နေဆဲ ဖြစ်ပါတယ်။
