စစ်ကိုင်းတိုင်း၊ ဘုတလင်မြို့ပေါ်က စစ်ကောင်စီအထိုင်စခန်းတွေကို ပြည်သူ့ ကာကွယ်ရေးတပ်က ဒရုန်းနဲ့ဗုံးကြဲတိုက်ခိုက်ခဲ့ပြီး မြောက်ကျည်ရွာက ဒေသခံ ၃ ယောက်ကို စစ်ကောင်စီ စစ်ကြောင်းက ဖမ်းဆီးသွားတယ်လို့ သိရပါတယ်။
ဒီဇင်ဘာ ၂ ရက်နေ့ မနက်ပိုင်းမှာ ဘုတလင်မြို့ကနေထွက်လာတဲ့ စစ်ကြောင်းဟာ ၆ နာရီလောက်မှာ မြောက်ကျည်ရွာကိုဝင်ရောက်ပြီး ဆိုက်တွဲ(သုံးဘီး) မောင်းသူ အပါအဝင် အရပ်သား ၃ ယောက်ကို ဖမ်းဆီသွားတယ်လို့ ဒေသခံတွေက ပြောပါတယ်။
ဒေသခံတယောက်က “ကျနော်တို့ မြောက်ကျည်ရွာက ဘုတလင်မြို့ရဲ့ မြောက်ဘက် ကပ်လျက်ရှိတဲ့ ရွာလေးပါ။ သူတို့ ဘုတလင်စခန်းက ထွက်လာပြီး ကနဦး ရွာတောင်ပိုင်းကအိမ်တွေကို မွှေနှောက်ရှာဖွေတာတွေ လုပ်တယ်။ အဲလိုရှာဖွေတာတွေ လုပ်ပြီး မြောက်ကျည်ရွာနဲ့ ဘုတလင်မြို့ကို ခေါက်တိုပြေးဆွဲနေတဲ့ သုံးဘီးမောင်တဲ့ ကိုမင်းနိုင် အသက် ၅၀ နီးပါး အပါအဝင် အရပ်သားပြည်သူ ၃ ယောက်ကို ဘုတလင်ရဲစခန်းကို ဖမ်းခေါ်သွားတယ်။ ဘာလို့ဖမ်းရတာလဲဆိုတော့ အရပ်သား စစ်စစ်တွေပါ။ သူတို့ ဖမ်းချင်လို့ကို ဖမ်းသွားကြတာ။ ကိုမင်းနိုင်ဆိုရင် ဆိုက်တွဲထွက်ဖို့ ကုန်တင်တဲ့ပစ္စည်းပိုင်ရှင်နဲ့ ဖုန်းဆက်နေတာကို သူတို့စစ်ကြောင်းလာတာကို ဖုန်းဆက်ရဲတယ်၊ မင်းကဆရာကြီးလား ဆိုပြီး ထိုးကြိတ်၊ ရိုက်နှက်ပြီး ဖမ်းခေါ်သွားတယ်” လို့ ပြောပါတယ်။
ဒီဇင်ဘာ ၁ ရက်နေ့ကတော့ ဘုတလင်မြို့က စစ်ကောင်စီအထိုင်စခန်းတွေကို ပြည်သူ့ကာကွယ်ရေးတပ်က ဒရုန်းအသုံးပြုပြီး ဗုံးကြဲချခဲ့တယ်လို့ ဘုတလင်မြို့ဒေသခံ ကာကွယ်ခေါင်းဆောင်တွေက ပြောပါတယ်။
နေ့ခင်း ၂ နာရီခွဲကနေ ညနေ ၄ နာရီအထိ ဗုံးကြဲခဲ့တာလို့ Chindwin Brother Force တာဝန်ရှိသူက ပြောပါတယ်။
“မနေ့က ၂ နာရီခွဲက စစ်ကောင်စီအထိုင်ချနေထိုင်တဲ့ ကြောင်ပန်းဂိတ်ရယ်၊ ၂ နာရီ ၄၅ မိနစ် ဒုတိယအကြိမ် ကြောင်ပန်းဂိတ်ရယ်။ ညနေ ၃ နာရီ ၁၅ မိနစ်က တတိယအကြိမ် CB ဘဏ်ရှေ့။ ညနေ ၄ နာရီမှာ စတုတ္ထအကြိမ် အထွေအုပ်ရုံးအတွင်းကို ဗုံးကြဲချတာတွေ ပြုလုပ်ခဲ့တယ်ဗျ။ စစ်ကောင်စီဘက်က ကျနော်တို့ ဗုံးသီးချလို့ ရဲဘော် ၂ ဦးသေဆုံးပြီး ဒဏ်ရာရရှိသူ အများအပြားရှိတယ်လို့ ကျနော်တို့ သိထားရတယ်။ စစ်ကောင်စီဘက်က ပြန်လည်ပစ်ခတ်တာတွေရှိခဲ့ပေမဲ့ ကျနော်တို့ဘက်က အထိအခိုက် အကျအဆုံးမရှိခဲ့ဘူး” လို့ ပြောပါတယ်။
အဲဒီတိုက်ခိုက်မှုကို Chindwin Brother Force အဖွဲ့၊ B21 အဖွဲ့၊ မြို့နယ်အုပ်ကြီးများအဖွဲ့၊ ကိုဘရာအဖွဲ့၊ တပင်ရွှေထီးအဖွဲ့နဲ့ နင်ဂျာတပ်ဖွဲ့တို့ ပူးပေါင်း တိုက်ခိုက်ခဲ့တာလို့ သိရပါတယ်။
