ရခိုင်ပြည်နယ် တောင်ကုတ်မြို့ လူ ၁၀ ဦး သတ်ဖြတ်ခံရမှုနဲ့ တရားစွဲဆိုခံရသူတွေရဲ့အယူခံကို ပြည်နယ်တရားလွှတ်တော်က ပယ်ချလိုက်တဲ့အတွက် မူလသံတွဲခရိုင်တရားရုံးမှာ ဆက်လက်စစ်ဆေးတော့မှာဖြစ်ပါတယ်။

တောင်ကုတ်မြို့ လူသတ်မှုနဲ့ ပတ်သက်လို့ သံတွဲခရိုင်တရားရုံးက သံသယနဲ့ ဖမ်းဆီးတရားစွဲခံရသူ ၇ ဦးကို ပြီးခဲ့တဲ့ မေလကုန်မှာ လူသတ်မှု၊ လူသတ်ရန် လူစုလူဝေးဖြင့် ကြိုတင်ကြံစည်မှုနဲ့ တရားစွဲဆိုဖို့ ဆုံးဖြတ်ခဲ့ပါတယ်။

[caption id="attachment_62505" align="alignright" width="300"] ပဋိပက္ခဖြစ်ပွားစဉ်က (ဓာတ်ပုံ - ရိုက်တာ)[/caption]ဒါကို မကျေနပ်လို့ တရားခံတွေက ရခိုင်ပြည်နယ် လွှတ်တော်မှာ ပြင်ဆင်မှု တင်သွင်းခဲ့တာဖြစ်ပြီး သြဂုတ်လ ၁၂ ရက်နေ့က ပြည်နယ်တရားလွှတ်တော်က ပယ်ချခဲ့တယ်လို့ ပြည်နယ်လွှတ်တော်အတွက် လိုက်ပေးတဲ့ တရားခံရှေ့နေ ဒေါ်အေးနုစိန်က ပြောပါတယ်။

ဒေါ်အေးနုစိန်က “မူလရုံးအမိန့်အတိုင်းပဲ အတည်ပြုလိုက်တယ်။ ကျမတို့ရဲ့ ပြင်ဆင်မှုကို ပလပ်လိုက်တယ်။ ရှေ့ကို ဆက်ပြီးတော့ ပြင်ဆင်မှု မတက်ဘူးဆိုရင်တော့ အဲဒီပုဒ်မအတိုင်းပဲ မူလရုံးမှာ ပြန်စစ်မှာပေါ့” လို့ ပြောပါတယ်။

သံတွဲခရိုင်တရားရုံးမှာတုန်းက တရားခံ ၇ ဦးအနက် ၅ ဦးအတွက် ရှေ့နေ ဦးတင်အောင်၊ ၁ ဦးအတွက် ရှေ့နေ ဦးသိန်းမောင်နဲ့ ကျန် ၁ ဦးအတွက် ရှေ့နေ ဦးကျော်ညွန့်မောင်က လိုက်ပါဆောင်ရွက်ခဲ့တာပါ။ ရှေ့နေ ဒေါ်အေးနုစိန်ဟာ သူ့အမှုသည်တရားခံတွေဟာ တောင်ကုတ်မြို့နယ်က မဟုတ်ကြဘဲ ကျန်နယ်တွေက ဖြစ်နေတာ ထူးခြားတယ်လို့ ဒီဗွီဘီကို ပြောပါတယ်။

“တရားခံတွေကလေ တောင်ကုတ်နယ်ခံတွေမဟုတ်ဘူး။ တောင်ကုတ်နယ်ခံကို မဟုတ်တာ။ ရသေ့တောင်တို့၊ မြောက်ဦးတို့၊ ရခိုင်ပြည် မြောက်ပိုင်းဘက်ကချည်းပဲ။ တယောက်သာ တောင်ကုတ်နယ်ခံလို့ ပြောလို့ရတယ်။ ကျမလိုက်တဲ့ ခြောက်ယောက်စလုံးက တောင်ကုတ်နယ်ခံသားတွေ မဟုတ်ဘူး။ ဒါကလည်း ထူးခြားချက်ပဲ” လို့ ဒေါ်အေးနုစိန်က ပြောပါတယ်။

တရားခံတွေဘက်က ငွေကြေးချို့တဲ့ကြတာကြောင့်ရော၊ ခရီးစရိတ်တွေကြောင့်ပါ စေတနာ့ ၀န်ထမ်း လိုက်ပါဆောင်ရွက်ပေးကြတဲ့ ရှေ့နေတွေအဖို့လည်း နေပြည်တော် အယူခံအတွက် လိုက်ပါဆောင်ရွက်ဖို့ အခြေအနေမပေးဘူးဖြစ်နေတယ်လို့ သူက ပြောပါတယ်။

တရားခံတွေအနေနဲ့ နေပြည်တော် တရားလွှတ်တော်ချုပ်ထံ အယူခံဝင်နိုင်ပြီး မ၀င်ရင်တော့ ခရိုင်တရားရုံးမှာ စစ်ဆေးမှာဖြစ်ပါတယ်။

သူတို့ ၇ ဦးကို ၂၀၁၂ ခုနှစ် တောင်ကုတ်မြို့ လူသတ်မှုအပြီး ၁ နှစ်ကျော်အကြာမှာ နေပြည်တော်ရဲက တိုက်ရိုက်ဖမ်းဆီးရုံးတင်ခဲ့တာဖြစ်သလို တနှစ်နီးပါးစစ်ဆေးအပြီး ခရိုင်တရားရုံးက စွဲချက်တင်ဖို့ ဆုံးဖြတ်ခဲ့တာပါ။

ဒီလူသတ်မြှုဖစ်အပြီး ရခိုင်ပြည်နယ်အတွင်း မီးရှို့သတ်ဖြတ်မှုတွေ ဖြစ်ခဲ့ပြီး လူပေါင်း ၁ သိန်းခွဲလောက် ဒုက္ခသည်ဖြစ်ခဲ့ကြရပါတယ်။ ကျန်တိုင်းနဲ့ ပြည်နယ်တချို့ကိုပါ ပုံစံတူအကြမ်းဖက်မှုတွေ ကူးစက်ခဲ့ပါတယ်။