ရှမ်းပြည်မြောက်ပိုင်းက မြောက်ပိုင်းမဟာမိတ်တပ်ဖွဲ့ဝင်တွေနဲ့ စစ်ကောင်စီတပ်တွေအကြား တိုက်ပွဲတွေကြောင့် ကိုးကန့်ကိုယ်ပိုင်အုပ်ချုပ်ခွင့်ရဒေသ လောက်ကိုင်မြို့ထဲမှာ ပိတ်မိနေတဲ့ ထိုင်းနိုင်ငံသား ၁၆၂ ဦးကို တရုတ်နိုင်ငံကနေတဆင့် ပြန်ခေါ်မယ်လို့ ထိုင်းသတင်းတွေမှာ ဖော်ပြပါတယ်။
သူတို့တွေ ဘေးကင်းလုံခြုံစွာနဲ့ နေရပ်ပြန်နိုင်ရေးအတွက် မြန်မာနိုင်ငံဆိုင်ရာထိုင်းသံရုံး၊ တရုတ်နိုင်ငံ ပေကျင်းမြို့က တရုတ်နိုင်ငံဆိုင်ရာထိုင်းသံရုံး၊ ကူမင်းမှာရှိတဲ့ ထိုင်းကောင်စစ်ဝန်ရုံး ၊ မြန်မာနိုင်ငံဆိုင်ရာတာဝန်ရှိသူတွေနဲ့ ချိတ်ဆက်ဆောင်ရွက်နေတယ်လို့ ထိုင်းလက်ထောက် ဝန်ကြီးချုပ်လည်းဖြစ်၊ နိုင်ငံခြားရေးဝန်ကြီးလည်းဖြစ်တဲ့ နိုင်းဘန်ပရီ ဖဟီထနုကွန်းက သတင်းထောက်တွေကို ပြောပါတယ်။
“အခုသူတို့အားလုံး မြန်မာအစိုးရလက်ထဲမှာ ဘေးအန္တရာယ်ကင်းကင်းရှိနေပါတယ်။ ဒါပေမဲ့ မြန်မာအစိုးရက ခရီးထွက်ခွင့်မပြုသေးဘူး။ လမ်းမှာတစုံတရာဖြစ်မှာစိုးတယ်တဲ့၊ အခြေအနေငြိမ်သွားရင် ၁၆၂ ယောက်လုံး ပြန်ပို့မယ်၊ တရုတ်ပြည်ဘက်ကနေ ပြန်ခေါ်မယ်၊ အားလုံးချိတ်ဆက်ထားပြီးပြီ။”
ထိုင်းနိုင်ငံသားတွေဟာ မြန်မာပြည်က ကာစီနိုရုံ ၊ လောင်းကစားရုံတွေမှာ အလုပ်သွားလုပ်တယ်ဆိုတာ ဟုတ်ပါသလားလို့ သတင်းထောက်တွေက မေးရာမှာ ဝန်ကြီး ဘန်ဖရီက “အခုက သူတို့ရဲ့ အလုပ်အကိုင်တွေကိ စစ်ဆေးဖို့မဟုတ်ဘူး၊ အားလုံးကို အန္တရာယ်ကင်းစွာနဲ့ကိုယ့်နိုင်ငံကိုယ်ပြန် ခေါ်ဖို့ဖြစ်တယ်။ အလုပ်အကိုင်ကတော့ အမျိုးမျိုးရှိမှာပေါ့ ” လို့ပြောပါတယ်။
လက်ရှိ တိုက်ပွဲတွေနဲ့ ပတ်သက်ပြီး တရုတ်အာဏာပိုင်တွေဘက်ကတော့ နှစ်ဘက်လုံးတိုက်ပွဲတွေရပ်တံ့ပြီး ငြိမ်းချမ်းစွာညှိနှိုင်းအဖြေရှာဖို့ တိုက်တွန်းထားပါတယ်။
မြောက်ပိုင်းမဟာမိတ် MNDAA အဖွဲ့ဝင်တစ်ဦးကတော့ သူတို့မဟာမိတ်အနေနဲ့ ရှမ်းပြည်မြောက်ပိုင်းက စစ်ကောင်စီလက်အောက်ခံ မြို့ ၃ မြို့ကို တိုက်ခိုက်သိမ်းပိုက်နိုင်ပြီလို့ ပြောကြောင်း Bangkokbiznews သတင်းမှာ ဖော်ပြသွားပါတယ်။
