ရှမ်းပြည်နယ်မြောက်ပိုင်းမှာ မြန်မာစစ်တပ်နဲ့ တိုင်းရင်းသားလက်နက်ကိုင်အဖွဲ့တွေရဲ့ တိုက်ပွဲတွေ ပြင်းထန်နေတာကြောင့် နေရပ်စွန့်ခွာ ထွက်ပြေးရသူ ၂၃,၀၀၀ ကျော် ထပ်တိုးလာကြောင်း ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA-Myanmar) က နိုဝင်ဘာ ၂ ရက်နေ့မှာ ထုတ်ပြန်ပါတယ်။
တိုက်ပွဲစဖြစ်ပွားချိန်ကာလတွေက နေရပ်စွန့်ခွာ ထွက်ပြေးရသူ ၁၄,၄၇၀ နဲ့အထက် ရှိတာကြောင့် အခုထက် တိုးလာတဲ့သူတွေနဲ့ဆိုရင် နေရပ်စွန့်ခွာ ထွက်ပြေးရသူစုစုပေါင်း ၃၇,၄၀၀ ကျော် ရှိလာပြီဖြစ်ပါတယ်။
အောက်တိုဘာ ၂၇ ရက်ကစလို့ ဒီကနေ့အထိ ရှမ်းပြည်မြောက်ပိုင်းမှာ တိုက်ပွဲတွေ ဆက်ဖြစ်ပွားနေပြီး ရှမ်းမြောက်မြို့နယ် ၂၂ ခုထဲက အနည်းဆုံး ၉ မြို့နယ်မှာ တိုက်ပွဲတွေ ဖြစ်ပွားနေကာ ဒုက္ခသည်အရေအတွက် ထပ်တိုးလာသလို လူသားချင်းစာနာမှု အကူအညီတွေလည်း လိုအပ်နေတယ်လို့ ဆိုပါတယ်။
ရှမ်းပြည်နယ်မြောက်ပိုင်းနဲ့ တရုတ်နိုင်ငံကို ဆက်သွယ်ထားတဲ့ လမ်းကြောင်းတွေဟာလည်း လက်ရှိကာလမှာ မြန်မာစစ်တပ်နဲ့ တိုင်းရင်းသားလက်နက်ကိုင်အဖွဲ့တွေရဲ့ စစ်ဆေးရေးဂိတ်တွေကြောင့် အဟန့်အတားဖြစ်နေပြီး အဓိကကျတဲ့ တံတားတခုလည်း ဖျက်ဆီးခံထားရကြောင်း UNOCHA-Myanmar ထုတ်ပြန်ချက်မှာ ဖော်ပြပါတယ်။
မဟာမိတ်ညီနောင် ၃ ဖွဲ့ရဲ့ စစ်ဆင်ရေး ၇ ရက်မြောက်ဖြစ်တဲ့ နိုဝင်ဘာ ၂ ရက်အထိ ရှမ်းမြောက်က မြို့ ၄ မြို့နဲ့ သံချပ်ကာ ၆ စီးအထိ သိမ်းဆည်းရမိထားတယ်လို့ “Operation 1027” သတင်းပြန်ကြားရေးအဖွဲ့က ထုတ်ပြန်ထားပါတယ်။
ဒါ့အပြင် ရှမ်းပြည်နယ်မြောက်ပိုင်း၊ ပဲခူးတိုင်းအရှေ့ပိုင်းနဲ့ ကရင်ပြည်နယ်တွေက နေရာအများစုမှာ အင်တာနက်နဲ့ တယ်လီဖုန်း ဆက်သွယ်ရေးလိုင်းတွေ ပြတ်တောက်မှု အခြေအနေ ဆိုးရွားနေကြောင်း UNOCHA-Myanmar က ထုတ်ပြန်ထားပါတယ်။
