စစ်ကောင်စီတပ်ရဲ့ အရပ်သားတွေအပေါ် အကြမ်းဖက်သတ်ဖြတ်နေတာကို အများပြည်သူ သိနိုင်ဖို့အတွက် လှုပ်ရှားမှုတခုကို ထိုင်းနိုင်ငံ၊ မဲဆောက်မြို့မှာ ၂ ရက်ကြာ ပြုလုပ်ခဲ့ပါတယ်။
မြန်မာနိုင်ငံရဲ့ လက်ရှိအခြေအနေကို နိုင်ငံတကာက မေ့လျော့လာနေပြီလို့ ခံစားရတာကြောင့် အခုလို လှုပ်ရှားမှုလုပ်ရတာလို့ ဦးဆောင်သူ LGBT အလှမယ် သက္ကရာဇ်က ပြောပါတယ်။
“မြန်မာနိုင်ငံမှာ အခုအချိန်အထိ မအေးချမ်းသေးဘူး။ နေ့စဉ်နဲ့အမျှ ကလေးငယ်တွေ၊ အမျိုးသမီးတွေ ကျောင်းသားပြည်သူလူထုတွေဟာ စကစရဲ့ ဖမ်းဆီးသတ်ဖြတ်မှုကို ခံနေရတယ်။ မတရား ဖမ်းဆီးချုပ်နှောင်မှုတွေလည်း ခံနေရတယ်။ ကလေးတွေရဲ့ ကျောင်းတွေပေါ်အထိ အာဏာသိမ်းစစ်တပ်ဟာ ဗုံးတွေကြဲချနေတုန်းပဲ ဆိုတာကို နိုင်ငံတကာက သိစေချင်တာ” လို့ ပြောပါတယ်။
သူဟာ စစ်တပ်က အကြမ်းဖက်သတ်ဖြတ်လို့ သေဆုံးခဲ့တဲ့ မြန်မာကျောင်းဆရာမ တယောက်ပုံစံ ဝတ်ဆင်ပြီး Killing Field Myanmar ဆိုတဲ့ စာတန်းနဲ့အတူ ဟောလိုးဝင်းနေ့ (အောက်တိုဘာ ၃၁ ရက်)နဲ့ နိုဝင်ဘာ ၁ ရက်နေ့ညက မဲဆောက်မြို့ရဲ့ လူစည်ကားရာနေရာတွေမှာ လှည့်လည်ပြုလုပ်ခဲ့တာဖြစ်ပါတယ်။
အလှမယ် သက္ကရာဇ်ဟာ ၂၀၂၃ ခုနှစ်၊ မဲဆောက် LGBT အလှမယ်ပြိုင်ပွဲမှာ လူကြိုက်အများဆုံးဆု ရရှိခဲ့သူ ဖြစ်ပါတယ်။
ဓာတ်ပုံ - ဟိန်းအောင်၊ ဖိုတိုဒါန
