ရန်ကုန်၊ ဒေါပုံမြို့နယ်၊ ဇေယျာသီရိရပ်ကွက်၊ ယမုံနာလမ်းရှိ Family Choice ပရိဘောဂဆိုင်မှာ အောက်တိုဘာ ၂၄ ရက်၊ ‌မွန်းလွဲပိုင်းက Level 1 အဆင့် မီးလောင်မှုဖြစ်ပွားခဲ့တယ်လို့ မြန်မာနိုင်ငံမီးသတ်ဌာနချုပ်က ထုတ်ပြန်ပါတယ်။

ဆိုင်ထပ်ခိုးနေရာကနေ မွန်းလွဲ ၂ နာရီ ၂၅ မိနစ်လောက်က ဝါယာရှော့ဖြစ် မီးလောင်ခဲ့တာဖြစ်ပြီး မီးလောင်မှုကြောင့် ဆိုင်မျက်နှာကျက်၊ ဆိုင်ရှိ ပရိဘောဂပစ္စည်းတွေနဲ့ နံရံအကာတွေ ပျက်စီးသွားပါတယ်။

လောင်စာအားကောင်းနေတာကြောင့် မွန်းလွဲ ၂ နာရီ ၃၂ မိနစ်ခန့်မှာ Level 1 အဆင့် ခေါ်ခဲ့ရပြီး ထိစပ်မြို့နယ်တို့က မီးသတ်ယာဉ်အုပ်စုတွေနဲ့ အရပ်ဘက်အသင်းတွေ လာရောက် မီးငြှိမ်းသတ်ခဲ့ကြပါတယ်။

ပျက်စီးဆုံးရှုံးမှုတန်ဖိုးကို မြို့နယ်မီးသတ်က စစ်ဆေးတွက်ချက်နေဆဲဖြစ်ကာ မီးလောင်မှုအတွင်း လူထိခိုက်မှု မရှိဘူးလို့ သိရပြီး မွန်းလွဲ ၂ နာရီ ၃၆ မိနစ်ကျော်မှာ မီးထိန်းနိုင်၊ ၂ နာရီ မိနစ် ၄၀ ခန့်မှာ မီးငြိမ်းသွားပါတယ်။

အောက်တိုဘာ ၁၇ ရက် ညပိုင်းကလည်း ရန်ကင်းမြို့နယ်၊ ရန်ကင်းစင်တာ ဒုတိယထပ်ရှိ ပြုပြင်လက်စ တိုက်ခန်းတခုမှာ Level 1 အဆင့် မီးလောင်မှု ဖြစ်ပွားခဲ့ပါသေးတယ်။

ရန်ကုန်၊ တာမွေမြို့နယ်၊ ပုသိမ်ညွန့်ရပ်ကွက်၊ စိတ္တသုခလမ်းမှာ အောက်တိုဘာ ၂၅ ရက် မနက် ၇ နာရီ ၁၂ မိနစ်လောက်က မီးလောင်မှုတခု ဖြစ်ပွားခဲ့ပြီး မနက် ၇ နာရီ ၂၆ မိနစ်မှာ မီးငြိမ်းသွားပါတယ်။