ကချင်ပြည်နယ်၊ မိုးညှင်းမြို့မှာ စစ်ကောင်စီ လက်အောက်ခံ လူဝင်မှုကြီးကြပ်ရေး လ.ဝ.က ဝန်ထမ်းတွေနဲ့ စစ်ကောင်စီခန့် အုပ်ချုပ်ရေးအဖွဲ့ဝင်တွေ အောက်တိုဘာ ၂၀ ရက်က ရပ်ကွက်တွေထဲမှာ လူတစ်ယောက်ချင်းရဲ့ ဇီဝဆိုင်ရာ ကိုယ်ရေးအချက်အလက်-Biometric Data ကို ရပ်ကွက်တွေထဲလိုက်လံ ကောက်ယူနေတယ်လို့ မြို့ခံတွေဆီက သိရပါတယ်။
မြို့ခံ အမျိုးသားတဦးက “ရပ်ကွက်အုပ်ချုပ်ရေးမှူးရုံးကိုခေါ်ပြီး မှတ်ပုံတင်မိတ္တူနဲ့ စာရင်းပေးရတာ။ မျက်လုံးကိုစကင်န်နာဖတ်တယ်၊ လက် နှစ်ဖက်လုံးကို လက်ဗွေယူတယ်၊ ရပ်ကွက်တချို့ကောက်ပြီးပြီ၊ အခု အောင်သပြေရပ်ကွက်ကိုကောက်နေတာ” လို့ ပြောပါတယ်။
မှတ်ပုံတင်ထဲမှာပါတဲ့ ကိုယ်ရေးအချက်အလက်၊ သွေးအမျိုးအစား၊ ဖုန်းနံပါတ်၊ လက်ရှိနေထိုင်တဲ့ နေရပ်လိပ်စာပေးရပြီး၊ QR Code ၊ Unique ID ဂဏန်း ၁၀ လုံးပါတဲ့ စာရွက် စစ်ကောင်စီက ထုတ်ပေးတယ်လို့ ကိုယ်ရေးအချက်အလက်-Biometric Data လုပ်ခဲ့သူတစ်ဦးက ပြောပါတယ်။
အန်အယ်လ်ဒီ အစိုးရလက်ထက်က နိုင်ငံသားစိစစ်ရေးကတ်မှတ်ပုံတင်ကို စမတ်ကတ် E-ID Biographic Registration System ပြောင်းလဲဖို့ ၂၀၁၆ ခုနှစ် ဒီဇင်ဘာလက တိုင်းနဲ့ ပြည်နယ်တချို့မှာ အချက်အလက် ရေးသွင်းခြင်းလုပ်ငန်း ရှေ့ပြေးစီမံကိန်းကို စတင်ဆောက်ရွက်ခဲ့ဖူးပါတယ်။
