ချင်းပြည်နယ်၊ ကန်ပက်လက်မြို့ထဲက စစ်ကောင်စီတပ်သားတွေကို CDF-ကန်ပက်လက်က သွားရောက်တိုက်ခိုက်ခဲ့ပြီး တချို့နေရာက ကင်းစခန်းတွေမှာ စစ်သားအရုပ်တွေထားတာ တွေ့ခဲ့ရတယ်လို့ သိရပါတယ်။

CDF-ကန်ပက်လက်တပ်ဖွဲ့ဝင်တွေဟာ စစ်ကောင်စီတပ်သားတွေ ခြေကုပ်ယူထားတဲ့ အထွေထွေအုပ်ချုပ်ရေး ဦးစီးဌာနရုံး၊ ပညာရေးမှူးရုံး၊ အ.ထ.က ၁ ကျောင်းနဲ့ ရန်အောင်အေးစေတီ စတဲ့ နေရာတွေကို စစ်ကြောင်း ၅ ကြောင်းခွဲပြီး ဒီနေ့ တပြိုင်တည်း ဝင်ရောက်တိုက်ခိုက်ခဲ့တယ်လို့ သိရပါတယ်။

အ.ထ.က(၁) ကန်ပက်လက်ကျောင်းဝန်းထဲက ကင်းစခန်းတွေမှာ စစ်သားပုံစံလုပ်ထားတဲ့ အရုပ်တွေကို အစားထိုး ကင်းချထားတာတွေ့ခဲ့ရတယ်လို့လည်း သိရပါတယ်။

CDF-ကန်ပက်လက်ရဲ့ တပ်မဟာမှူး ဆလိုင်းထွန်းလိမ်းထန်းက “ကျနော်တို့ဘက်က စစ်ကြောင်း ၅ ကြောင်းခွဲဝင်ပြီး ရိုင်ဖယ်တွေနဲ့ ပစ်ခတ်ခဲ့ပါတယ်။ သူတို့ဘက်ကလည်း ပြန်ပစ်တော့ ထိတွေ့မှုဖြစ်ခဲ့တာပါ။ တိုက်ပွဲမှာ စကစဘက်က ၂ ဦး ကျဆုံးတယ်၊ ၄ ယောက် ဒဏ်ရာရတယ်လို့လည်း ကြားရပါတယ်။ အတိအကျတော့ မပြောနိုင်ဘူး” လို့ ပြောပါတယ်။

ကင်းစခန်းထဲက စစ်သားရုပ်တွေကို လူထင်ပြီး မှားပစ်မိခဲ့သေးတယ်လို့လည်း သူက ပြောပါတယ်။

မနက် ၆ နာရီကကနေ ၁၁ နာရီလောက်အထိ စစ်ကောင်စီတပ်နဲ့ CDF-ကန်ပက်လက်တို့ ထိတွေ့မှုအပြီး CDF-ကန်ပက်လက်ဘက်က အထိအခိုက်မရှိ ပြန်လည် ဆုတ်ခွာ လာနိုင်ခဲ့တယ်လို့ ဆိုပါတယ်။

ကန်ပက်လက်မြို့တွင်းမှာ စစ်ရေးအခြေအနေတင်းမာနေပြီး အချိန်မရွေး တိုက်ပွဲတွေ ဖြစ်နိုင်တာကြောင့် စစ်ကောင်စီတပ်စွဲထားတဲ့ နေရာတွေအနီးမှာ ပြည်သူတွေ မနေကြဖို့ CDF-ကန်ပက်လက်က အသိပေးထားပါတယ်။