ဧရာဝတီတိုင်း၊ ဟင်္သာတခရိုင်ထဲမှာ ပြီးခဲ့တဲ့ ဇူလိုင်လကုန်ပိုင်းက စစ်ကောင်စီတပ်နဲ့ ဟင်္သာတခရိုင်၊ အမှတ် ၁ တပ်ရင်းတို့ တိုက်ပွဲ ၈ ကြိမ်ဖြစ်ခဲ့ပြီး စစ်တပ်ဘက်က အယောက် ၃၀ လောက် ထိခိုက်သေဆုံးခဲ့တယ်လို့ တပ်ရင်းက အောက်တိုဘာ ၁၁ ရက်မှာ ထုတ်ပြန်လာပါတယ်။

စစ်ဆင်ရေးကာလအခြေအနေတွေကြောင့် အခုမှ ထုတ်ပြန်နိုင်တာလို့ ဆိုပြီး ဇူလိုင် ၁၉ ရက်ကနေ ဩဂုတ် ၁ ရက်နေ့အထိအတွင်း တိုက်ပွဲ ၈ ကြိမ်ဖြစ်ခဲ့ပြီး ပြည်သူ့ကာကွယ်ရေးတပ်သား ၃ ယောက်ကျဆုံးခဲ့တယ်လို့ ဆိုပါတယ်။

တိုက်ပွဲဝင်ရဲဘော်တွေက ပြန်လည်တင်ပြတာနဲ့ စစ်တပ်ဘက် သတင်းပေးတွေဆီက သိရသလောက် စစ်တပ်ဘက်က ထိခိုက်ဒဏ်ရာရသူတွေထဲမှာ ဒု တပ်ရင်းမှူးအဆင့် အရာရှိ ၁ ယောက်လည်းပါပြီး ဒဏ်ရာပြင်းထန်တယ်လို့ ထုတ်ပြန် ဖော်ပြထားပါတယ်။

တပ်ရင်းရဲ့ လက်နက်ခဲယမ်းအခြေအနေအရ ပြောက်ကျားစနစ်နဲ့ပဲ တိုက်ခိုက်နိုင်ပြီး စစ်တပ်ဘက်ဆီက MA ၁ လက်နဲ့ ကျည်တချို့ သိမ်းဆည်းရမိခဲ့သလို တပ်ရင်းဘက်ကလည်း စစ်သုံးပစ္စည်းတချို့ဆုံးရှုံးသွားတာရှိတယ်လို့ ဆိုပါတယ်။

ဒါ့အပြင် တပ်ရင်း ၁ က ဒရုန်းအဖွဲ့ခေါင်းဆောင်၊ တပ်စိတ်မှူး ၁ ယောက်နဲ့ မိုင်းတပ်သား ၁ ယောက်တို့လည်း တော်လှန်ရေးမှာ အသက်ပေးခဲ့ရတယ်လို့ ထုတ်ပြန်ထားပါတယ်။

တိုက်ပွဲကာလမှာ ရဲရဲဝံ့ဝံ့ စွန့်စွန့်စားစားပါဝင်ခဲ့ကြတဲ့ တပ်မှူးတွေ၊ ရဲဘော် ရဲမေတွေကို ဂုဏ်ယူအသိအမှတ်ပြုပြီုး ပြည်သူတွေအနေနဲ့လည်း ကိုယ်တိုင်ပါဝင်တာ၊ သတင်းပေးပို့ကူညီတာနဲ့ ထောက်ပံ့တာတွေဆက်လုပ်ပေးကြဖို့ မေတ္တာရပ်ခံ ထားပါတယ်။

ဧရာဝတီတိုင်း၊ ဟင်္သာတခရိုင်တပ်ရင်းကို တိုင်းရင်းသားတော်လှန်ရေးတပ်တွေဆီမှာ စစ်ပညာသင်ယူခဲ့ကြတဲ့ တိုင်းအတွင်းက ရဲဘော်တွေနဲ့ ၂၀၁၂ ခုနှစ်၊ နိုဝင်ဘာမှာ စတင်ဖွဲ့စည်းတည်ထောင်ခဲ့တာဖြစ်ပါတယ်။