နာဂေါ်နို-ခါရာဘတ်ခ်ဒေသကို ပြန်သိမ်းဖို့ အဇာဘိုင်ဂျန်စစ်တပ်ရဲ့ စစ်ဆင်ရေးပြီးကတည်းက အာမေးနီးယားနိုင်ငံဆီကို ဒုက္ခသည်တသိန်းကျော် ရောက်လာခဲ့တယ်လို့ ကုလသမဂ္ဂ ဒုက္ခသည်များဆိုင်ရာ အေဂျင်စီ (UNHCR) က အောက်တိုဘာ ၁ ရက်မှာ ပြောပါတယ်။
UNHCR က ထုတ်ပြန်တဲ့ ဗီဒီယိုဖိုင်ထဲမှာ ဒုက္ခသည်တွေက သူတို့ရဲ့ ပစ္စည်းတွေနဲ့အတူ ဘတ်စ်ကားတွေ စောင့်နေပုံကို ပြခဲ့ပါတယ်။ သူတို့အများစုဟာ အာမေးနီးယားတောင်ပိုင်း ရှူးညစ်ခ်ဒေသကို ရောက်လာတယ်လို့ UNHCR က ပြောပါတယ်။
နာဂေါ်နို-ခါရာဘတ်ခ် ခွဲထွက်ဒေသကို အဇာဘိုင်ဂျန်အစိုးရရဲ့ ထိန်းချုပ်မှုအောက်ကို ပြန်ရောက်စေတဲ့ အဇာဘိုင်ဂျန်အစိုးရရဲ့ လျှင်မြန်တဲ့ ထိုးစစ်အပြီးမှာ ခါရာဘတ်ခ်ဒေသတွင်းက အာမေးနီးယန်းလူမျိုး အယောက် ၁၂၀,၀၀၀ လောက်ရဲ့ အများစုဟာ အဇာဘိုင်ဂျန်က ဘေးကင်းရေးကတိတွေ ပေးထားတဲ့ကြားက နှိပ်စက်ညှဉ်းပန်းမှုနဲ့ လူမျိုးတုံးသတ်ဖြတ်မှုတွေ ဖြစ်လာမှာ စိုးရိမ်လို့ အာမေးနီးယား နိုင်ငံဆီကို အစုလိုက်အပြုံလိုက် ထွက်ခွာလာကြပါတယ်။
နာဂေါ်နို-ခါရာဘတ်ခ် ဒေသကို အဇာဘိုင်ဂျန်နိုင်ငံရဲ့ အစိတ်အပိုင်းတခုအဖြစ် နိုင်ငံတကာက အသိအမှတ် ပြုထားပေမဲ့ ဆိုဗီယက်ပြည်ထောင်စု အစိတ်စိတ် အမွှာမွှာကွဲပြီး ပြိုလဲသွားတဲ့ သွေးထွက်သံယို လူမျိုးရေးပဋိပက္ခအပြီး လွန်ခဲ့တဲ့ ဆယ်စုနှစ်သုံးစုက အဲဒီဒေသမှာ အာမေးနီးယန်း ခရစ်ယာန်တွေက အဓိကအားဖြင့် နေထိုင်ကြပါတယ်။
ပြီးခဲ့တဲ့လက အဇာဘိုင်ဂျန်စစ်တပ်က ထိုးစစ်ဆင်ပြီးနောက် ဒေသတွင်းက အာမေးနီးယန်းလူမျိုးတွေ အစုလိုက်အပြုံလိုက် ထွက်သွားတဲ့ နာဂေါ်နို-ခါရာဘတ်ခ် ဒေသထဲကို ကုလသမဂ္ဂ မစ်ရှင်အဖွဲ့ အောက်တိုဘာ ၁ ရက်က ရောက်လာပါတယ်။
ကုလသမဂ္ဂ အကြီးတန်း အကူအညီပေးရေး အရာရှိတဦး ဦးဆောင်တဲ့ ဒီမစ်ရှင်ဟာ နှစ်ပေါင်း ၃၀ အတွင်း ကမ္ဘာလုံးဆိုင်ရာ အဖွဲ့အစည်းက ဒေသတွင်း ပထမဆုံးဝင်ရောက်မှု ဖြစ်ပါတယ်။
အာမေးနီးယားအစိုးရကတော့ နာဂေါ်နို-ခါရာဘတ်ခ်ဒေသက အရပ်ဘက်စခန်းတွေကနေ အဇာဘိုင်ဂျန် တပ်ဖွဲ့ဝင်အားလုံးကို ရုပ်သိမ်းဖို့နဲ့ ကုလသမဂ္ဂကို ဝင်ရောက်ခွင့်ပေးဖို့ အဇာဘိုင်ဂျန်ကို အမိန့်ပေးရေး ကမ္ဘာ့တရားရုံးကို တောင်းဆိုထားပါတယ်။
နာဂေါ်နို-ခါရာဘတ်ခ် ဒေသကို အသွားအလာလုပ်နိုင်တဲ့ လာချင်စင်္ကြံလို့ခေါ်တဲ့ နယ်မြေအတွင်း လွတ်လွတ်လပ်လပ် သွားလာခွင့်ရှိစေရေး ခွင့်ပြုပေးဖို့ အပြည်ပြည်ဆိုင်ရာ တရားရုံးလို့ လူသိများတဲ့ ကမ္ဘာ့တရားရုံးက အဇာဘိုင်ဂျန်နိုင်ငံကို ဖေဖော်ဝါရီလမှာ အမိန့်ပေးခဲ့ပါတယ်။
နာဂေါ်နို-ခါရာဘတ်ခ် ဒေသကနေ အိမ်နီးချင်း အာမေးနီးယားနိုင်ငံဆီ ပြောင်းရွှေ့ချင်သူတွေကို ပြောင်းရွှေ့ရေးလုပ်ငန်းစဉ် ပြီးဆုံးသွားပြီလို့ အာမေးနီးယားအစိုးရကို ကိုးကားပြီး ရုရှားအခြေစိုက် RIA သတင်းဌာနက တနင်္ဂနွေနေ့နှောင်းပိုင်းမှာ ဖော်ပြခဲ့ပါတယ်။
Source/Photo-Reuters
