ပဲခူးတိုင်းအနောက်ခြမ်း၊ သာယာဝတီခရိုင်၊ မင်းလှမြို့နယ်၊ ပဲခူးရိုးမအစပ်မှာရှိတဲ့ ကျေးရွာ ၅ ရွာက ရွာခံပြည်သူတွေကို စစ်ကောင်စီတပ်က လက်နက်ကြီးနဲ့ပစ်ခတ်ပြီး ဖယ်ရှားခိုင်းနေတယ်လို့ ရွာခံတွေနဲ့ ပြည်သူ့ကာကွယ်ရေးတပ်ဖွဲ့ဝင်တွေထံက သိရပါတယ်။

စက်တင်ဘာ ၂၇ ရက်ကစတင်ပြီး စစ်ကောင်စီစစ်ကြောင်းက လက်နက်ကြီးနဲ့ ကျေးရွာအတွင်း ပစ်ခတ်ပြီးမှ ကျေးရွာလူကြီးတွေကို ခေါ်ဆောင်ပြီး ၃ ရက်အတွင်း ရွာက အပြီးထွက်သွားကြဖို့ သတိပေး ပြောဆိုခဲ့တာလို့ ဆိုပါတယ်။

ရွာခံတဦးက “သူတို့(စကစ)စစ်ကြောင်းက ရွာဘက်တွေကို မနက်မိုးမလင်းခင် ထုတယ်။ လက်နက်ကြီးနဲ့ပစ်ပြီးမှ ရွာတွေထဲကို စစ်ကြောင်းက ဝင်လာတာ။ ရွာလူကြီးကိုခေါ်ပြီး ဘုန်းကြီးကျောင်းက သံဃာတွေရော ရွာခံတွေရော ၃ ရက်အတွင်း ရွာထဲက အပြီးထွက်သွားရမယ်လို့ အမိန့်ပေးတယ်။ သူတို့ လက်နက်ကြီးနဲ့ စပစ်တည်းက ရွာခံတွေ နီးစပ်ရာမြို့တွေကို ရှောင်နေကြရတယ်” လို့ ဒီဗွီဘီကို ပြောပါတယ်။

ပဲခူးရိုးမအစပ်ရှိ ဗိုလ်ရုံ၊ ပျဉ်းကတိုးခင်း၊ ဟိုင်းယုလမ်းပေါက်၊ ဝါးယား၊ ဟိုင်းဟုကျေးရွာက ရွာခံတွေနဲ့ ကျေးရွာရှိ ဘုန်းကြီးကျောင်းက သံဃာတွေကို ၃ ရက်အတွင်း ဖယ်ရှားပေးရမယ်လို့ စစ်ကောင်စီစစ်ကြောင်းက သတိပေး ဖယ်ရှားခိုင်းတာလို့ ဆိုပါတယ်။

အခုလို လက်နက်ကြီးနဲ့ပစ်ခတ် ဖယ်ရှားခိုင်းနေတဲ့အတွက် ကျေးရွာ ၅ ရွာက ရွာခံ ၁,၀၀၀ ကျော်နဲ့ သံဃာတွေ နီးစပ်ရွာမြို့တွေကို တိမ်းရှောင်နေကြရပြီး တချို့မှာ ပဲခူးရိုးမအတွင်း ထွက်ပြေးတိမ်းရှောင်နေရလို့ စားနပ်ရိက္ခာနဲ့ ဆေးဝါးတွေ လိုအပ်နေတယ်လို့ သိရပါတယ်။

တိုက်ပွဲတွေ မကြာခဏ ဖြစ်ပွားနေတဲ့ ပဲခူးရိုးမအစပ်မှာရှိတဲ့ ကျေးရွာတွေက ရွာခံတွေဟာ စစ်ကောင်စီစစ်ကြောင်းတွေနဲ့ပတ်သက်ပြီး ပြည်သူ့ကာကွယ်ရေးတပ်ဖွဲ့တွေထံ သတင်းပေးပို့တယ်ဆိုပြီး အခုလိုလုပ်ဆောင်နေတာလို့ သိရပါတယ်။

သာယာဝတီခရိုင် တပ်ရင်း-၃၈၀၂ တာဝန်ရှိသူက “စစ်ကြောင်းက ရိုးထဲထိုးနေတာ၊ သတင်းပေါက်ကြားမှာစိုးလို့ အခုလိုလုပ်တာ။ ရိုးမထဲကရွာတွေက PDF တွေကို အားပေးကူညီတယ်ဆိုပြီး စစ်ရှောင်ခိုင်းနေတာ။ ရွာထဲကအိမ်တွေမှာ လူမရှိတော့ဘူး” လို့ ဒီဗွီဘီကို ပြောပါတယ်။

စက်တင်ဘာ ၂၃ ရက်ကလည်း ပဲခူးရိုးမအတွင်း စစ်ကောင်စီစစ်ကြောင်းနဲ့ ပြည်သူ့ကာကွယ်ရေးအဖွဲ့တို့ နှစ်ဖက်တိုက်ပွဲဖြစ်ပွားပြီး စစ်သား ၅ ဦးသေဆုံးကာ PDF ၁ ဦး ကျဆုံးခဲ့တယ်လို့ သာယာဝတီခရိုင် တပ်ရင်း-၃၈၀၂ က သတင်းထုတ်ပြန်ထားပါတယ်။