မန္တလေးမြို့ ပြည်သူ့ကာကွယ်ရေးတပ်ဖွဲ့ MDY PDF ရဲ့ ကနောင်စစ်ဆင်ရေး နှစ်လတာကာလအတွင်းမှာ စစ်ကောင်စီတပ်ဘက်က ဗိုလ်ကြီး ၂ ဦးအပါအဝင် ၈၀ ခန့် သေဆုံးခဲ့တယ်လို့ MDY PDF က စက်တင်ဘာ ၁၁ ရက်မှာ ထုတ်ပြန်ထားပါတယ်။
သြဂုတ် ၄ ရက်ကနေ စက်တင်ဘာ ၁၀ ရက်အထိ စစ်ကောင်စီတပ်နဲ့ MDY PDF တို့ တိုက်ပွဲ ၆ ကြိမ်ဖြစ်ပွားခဲ့ပြီး စစ်ကောင်စီတပ်ဘက်က ထိခိုက်သေဆုံးမှုများတယ်လို့ MDY PDF ရဲ့ ပြောရေးဆိုခွင့်ရှိသူ ကိုအော်စမွန်က ပြောပါတယ်။
"နှစ်လတာတိုက်ပွဲ၊ ကနောင်စစ်ဆင်ရေးမှာ ရန်သူဘက်က ထိခိုက်ဒဏ်ရာရတာများတယ်၊ တော်တော်လေးအထိနာတယ်လို့ ပြောရင်ရတယ်။ ကျနော်တို့ဘက်က ဒီစစ်ဆင်ရေး ဖော်ဆောင်တဲ့အခါမှာ အားရကျေနပ်မှုရှိတယ်၊ ခုလက်ရှိအချိန်ထိလည်း သူတို့ဘက်က ထပ်အင်အားဖြည့်တင်းနေတာ သိရတယ်။ အခုချိန်ထိလည်း စစ်ရေးတင်းမာနေဆဲ အခြေအနေပါ။"
နောင်ချိုမြို့အနီးတနေရာမှာ စစ်ကောင်စီတပ်ရဲ့ ယာဥ်တန်းကို သြဂုတ် ၄ ရက်က ချုံခိုတိုက်ခိုက်ခဲ့ရာ ကားပေါ်ပါ အရာရှိ ၁ ဦးအပါအဝင် စစ်သား ၁၅ ဦး သေဆုံးခဲ့ပြီး လက်နက်ခဲယမ်းတွေ သိမ်းဆည်းရမိခဲ့သလို သြဂုတ် ၁၁ ရက်နေ့မှာလည်း စစ်ကောင်စီ စစ်ကြောင်းကို မိုင်းဆွဲတိုက်ခိုက်ခဲ့ရာ စစ်ကြောင်းမှူး ၁ ဦးအပါဝင် ၁၀ ဦးသေဆုံးခဲ့တယ်လို့ ဆိုပါတယ်။
သြဂုတ် ၂၆ ရက်ကလည်း MDY PDF ရဲ့ နေရာကို စစ်ကြောင်းထိုးလာတဲ့ စစ်ကောင်စီတပ်ကို တကြိမ်ထပ်မံတိုက်ခိုက်ခဲ့ရာ စစ်သား ၇ ဦးကျဆုံးခဲ့သလို စက်တင်ဘာ ၇ ရက်နေ့မှာလည်း တိုက်ပွဲထပ်မံဖြစ်ပွားခဲ့ပြီး စစ်သား ၉ ဦး သေဆုံးခဲ့တယ်လို့ သိရပါတယ်။
ပြင်ဦးလွင်-မိုးကုတ်အနီး တောင်နီကျေးရွာ တာဝါတိုင်ကုန်းကို ရောက်လာတဲ့ စစ်သားတွေကို စက်တင်ဘာ ၈ ရက်နေ့မှာ တိုက်ခိုက်ခဲ့ရာ စစ်သား ၆ ဦးသေဆုံးခဲ့ပြီး စက်တင်ဘာ ၁၀ ရက်နေ့တိုက်ပွဲမှာ စစ်သား ၃ ဦးသေဆုံးခဲ့တယ်လို့ ကိုအော်စမွန်က ပြောပါတယ်။
"တိုက်ပွဲတွေမှာ ရန်သူဘက်က ထိခိုက်ကျဆုံးမှုကို တွက်ချက်တဲ့အခါ အဓိကတော့ တိုက်ပွဲအတွင်း ကိုယ့်ဘက်က ပစ်လိုက်တာကို သူတို့ကျတာကို မျက်မြင်မြင်တွေ့ရတာကို အဓိကယူပါတယ်။ မြေပြင်ကနေတဆင့် ထောက်လှမ်းရတာတွေလည်းရှိပါတယ်။"
ကနောင်စစ်ဆင်ရေးကာလအတွင်း စစ်ကောင်စီတပ်ဘက်က သေဆုံးမှုကို မျက်မြင်ကျဆုံးမှု မြင်ရတာတွေ၊ အလောင်းရရှိမှုတွေကို ရေတွက်တာလို့ ဆိုပါတယ်။
စစ်ကောင်စီတပ်က စက်တင်ဘာ ၇ ရက်နေ့တိုက်ပွဲမှာ ပြည်သူ့ကာကွယ်ရေးတပ်ဖွဲ့တွေရဲ့ ပိတ်ဆို့တာကို ခံထားရတဲ့အတွက် အနီးဝန်းကျင်က ကလေးသူငယ်တွေကို လူသားဒိုင်းအနေနဲ့ထားပြီး ဆုတ်ခွာခဲ့သလို ကျေးရွာ ရွာသူကြီးတွေကိုလည်း အတင်းဖိအားပေးပြီး လမ်းပြအဖြစ် ခေါ်ဆောင်တာတွေရှိတယ်လို့ သိရပါတယ်။
ကနောင်စစ်ဆင်ရေးကာလအတွင်း စစ်ကောင်စီဘက်က ထိခိုက်ကျဆုံးအခြေအနေကို ဒီဗွီဘီက သီးခြားအတည်မပြုနိုင်သေးပါဘူး။
