စစ်ကိုင်းတိုင်း၊ မြင်းမူမြို့နယ်၊ ထီးဆောင်း စစ်ကောင်စီတပ်စခန်းကို သြဂုတ် ၂၆ ရက် မနက် ၈ နာရီကျော်မှာ ဒရုန်းနဲ့တိုက်ခိုက်ခဲ့လို့ စစ်ကောင်စီဘက်က ၁၀ ယောက် သေဆုံးပြီး ၇ ယောက် ဒဏ်ရာရရှိသွားတယ်လို့ ကျောက်ဆည် နဂါးနီ ပြောက်ကျား တပ်ဖွဲ့ဆီက သိရပါတယ်။
ကျောက်ဆည် နဂါးနီ ပြောက်ကျားတပ်ဖွဲ့ရဲ့ ဒုတိယ တပ်ရင်းမှူး ဆရာလေးက အဲဒီအထိုင်တပ်စခန်းမှာ ပုံမှန်ဆိုရင် စစ်သားအင်အား ၅၀ လောက်ရှိပြီး အခု အင်အားထပ်ဖြည့်ထားတာကြောင့် ၇၀ လောက်ရှိနေတယ်လို့ ပြောပါတယ်။
"တိုက်ခိုက်တဲ့အခါမှာ အသုံးပြုခဲ့တာကတော့ ဒရုန်း ၂ စင်း အသုံးပြုတယ်။ ၂ စင်းကို စုစုပေါင်း ဗုံးသီး ၁၁ လုံး သုံးပြီး ၆ ခေါက်ပျံတယ်။ အဲလိုတိုက်ခိုက်ရာမှာ စခ ၁၀ ယောက် သေဆုံးပြီး ၇ ယောက် ဒဏ်ရာရတယ်လို့ တိကျခိုင်မာတဲ့ သတင်းရင်းမြစ်ဆီက သိရပါတယ်။ ကျနော်တို့ဘက်က ဘာထိခိုက် ပျက်စီး ဆုံးရှုံးမှုမှ မရှိပါဘူးဗျ။ ပထမအကြိမ် တိုက်ခိုက်မှုမှာတော့ သူတို့ဘက်က လက်နက်ငယ်နဲ့ counter ပြန်တယ်။ နောက်အကြိမ်ကျ ဘာ counter မှ မပြန်နိုင်တော့ပါဘူး” လို့ ဒီဗွီဘီကို ပြောပါတယ်။
အရင်ကလည်း ထီးဆောင်းစခန်းကို ၄၊ ၅ ကြိမ် တိုက်ခိုက်ခဲ့ဖူးပြီး အရင်တခေါက် တိုက်ခိုက်တုန်းကဆိုရင် စစ်သားတွေဟာ စခန်းကို စွန့်ခွာထွက်ပြေးရတဲ့အထိ ဖြစ်ခဲ့တယ်လို့ ပြောပါတယ်။
အဲဒီ တိုက်ခိုက်မှုကို ကျောက်ဆည်ခရိုင် ဒရုန်းတပ်ဖွဲ့က ဦးဆောင်ပြီး ကျောက်ဆည် ခရိုင် တပ်ရင်း-၁(နဂါးနီ တပ်ရင်း)၊ ရွှေဘိုခရိုင် တပ်ရင်း ၁၅၊ ဆားတောင်မိုးကြိုး (Local PDF)၊ မိုးညို (Local PDF)၊ lighting drone force နဲ့ အောင်သပြေညီနောင် (မြင်းမူ Local PDF) မဟာမိတ်တွေက ပူးပေါင်းဆောင်ရွက်ခဲ့တယ်လို့ သိရပါတယ်။
