ဘိုလီးဗီးယား နိုင်ငံတဝန်း ဆန္ဒပြပွဲတွေအတွင်း သယ်ယူပို့ဆောင်ရေးကို အနှောင့်အယှက်ဖြစ်စေခဲ့တဲ့ ၃ ပတ်ကျော် ပိတ်ဆို့ထားမှုအပြီး ဇွန် ၆ ရက်မှာ နိုင်ငံအရှေ့ပိုင်း စန်တာခရုဇ် ဒေသထဲက စန် ဂျူလီယံမြို့မှာရှိတဲ့ အဓိကအဝေးပြေးလမ်းမကြီးရဲ့ အစိတ်အပိုင်းတခုကို ရဲတပ်ဖွဲ့နဲ့ လက်နက်ကိုင်တပ်ဖွဲ့တွေက ရှင်းလင်းခဲ့ပါတယ်။ 

ဒေသစံတော်ချိန် မနက် ၆ နာရီလောက်မှာ ရှင်းလင်းရေးလုပ်ငန်းစဉ်ကိုစခဲ့လို့ လုံခြုံရေးတပ်ဖွဲ့တွေက လမ်းမကြီးပေါ်က သစ်တုံးတွေ၊ အပျက်အစီးတွေနဲ့ တခြားအတားအဆီးတွေကို ဖယ်ရှားခဲ့ပြီး ပိတ်မိနေတဲ့ ယာဉ်တချို့ ခရီးဆက်သွားနိုင်ခဲ့တယ်လို့ အာဏာပိုင်တွေက ပြောပါတယ်။ 

စစ်ဆင်ရေးအတွင်း သေနတ်ပစ်ခတ်မှုကြောင့် ရဲအရာရှိ ၂ ယောက်ထက်မနည်း ဒဏ်ရာရခဲ့ပါတယ်။ 

အာဏာပိုင်တွေက ပစ်ခတ်မှုတွေဟာ ဆန္ဒပြသူတွေဘက်ကနေ လာတာဖြစ်ပြီး ဘိုလီးဗီးယားကာကွယ်ရေးဝန်ကြီးဌာနက ထုတ်ပြန်ခဲ့တဲ့ ဗီဒီယိုတခုထဲမှာ လူ ၂ ယောက်က ပိတ်ဆို့ထားတဲ့ နေရာကနေ ရိုင်ဖယ်သေနတ်တွေကို ပစ်ခတ်နေတာကို ပြထားပါတယ်။ 

ဒီ ဗွီဒီယိုကို ရိုက်တာသတင်းဌာနက ပြန်သုံးသပ်ပြီး ထုတ်လွှင့်ခဲ့ပါတယ်။ 

ရဲတပ်ဖွဲ့မှာ ဓာတုပစ္စည်းတွေနဲ့ အကာအကွယ်ပစ္စည်းတွေ တပ်ဆင်ထားပြီး ပဋိပက္ခတွေကနေ ကာကွယ်ဖို့ ကြိုးစားနေတဲ့အပြင် လူသားချင်းစာနာထောက်ထားမှုဆိုင်ရာ စင်္ကြံတွေကိုလည်း ဖွင့်ပေးနေတယ်လို့ စီမံကိန်းဝန်ကြီး အော်စကာ မာရီယို ဟိုစတီယာနိုက ပြောခဲ့ပါတယ်။ 

မေလ အလုပ်သမားသပိတ်ကနေ စခဲ့တဲ့ပဋိပက္ခကနေတဆင့် အဝေးပြေးလမ်းမကြီးတွေကို ပိတ်ဆို့ ထားပြီး လူဦးရေ ၂ သန်းလောက်နေတဲ့ လာပဲ့ဇ်နဲ့ အယ်လ် အော်တိုမြို့တွေဆီ ဝင်ရောက်ခွင့်ကို ဖြတ်တောက်ထားတဲ့ အဆင့်ထိ ပဋိပက္ခက  မြင့်တက်လာခဲ့တာပါ။ 

အလုပ်သမားသမဂ္ဂတွေနဲ့ အရင် လက်ဝဲယိမ်းသမ္မတ အီဗို မိုရာလက်စ်အပေါ် သစ္စာရှိတဲ့ အဖွဲ့တွေ အပါအဝင် ဆန္ဒပြသူတွေက ခြိုးခြံချွေတာရေး အစီအမံတွေကို ရုပ်သိမ်းပေးဖို့နဲ့ လူနေမှုစရိတ်တွေ မြင့်တက်လာတာကို ကိုင်တွယ်ဖြေရှင်းဖို့ လက်ရှိအစိုးရကို တောင်းဆိုနေကြပါတယ်။ 

Source: Reuters