မန်စီးတီးနောက်ခံလူ လာပေါ်တေးဟာ ဆော်ဒီကလပ် အယ်လ်နာဆာအသင်းဆီကို ပေါင် ၂၃ သန်းခွဲနဲ့ အပြီးသတ် ပြောင်းရွှေ့သွားခဲ့ပါတယ်။
အသက် ၂၉ နှစ်ရှိ စပိန်နောက်ခံလူဟာ မန်စီးတီးအသင်းမှာ ပုံမှန်ပွဲထွက်ခွင့် ပျောက်ဆုံးနေသူဖြစ်ပြီး ခရိုအေးရှားနောက်ခံလူ ဂဗာဒီယို ရောက်ရှိ လာတဲ့အတွက် အသင်းပြောင်းရွှေ့ဖို့ ဆုံးဖြတ်ခဲ့တာပါ။
လာပေါ်တေးဟာ အယ်လ်နာဆာနဲ့ ၃ နှစ် စာချုပ်ချုပ်ဆိုခဲ့ပြီး တစ်နှစ်လုပ်ခ ပေါင် ၂၁ သန်း အထိရရှိမယ်လို့သိရပါတယ်။
သူဟာ အယ်လ်နာဆာအသင်းမှာ တိုက်စစ်မှူးစီရော်နယ်ဒို၊ မာနေးတို့နဲ့ တစ်သင်းထဲ တွေ့ဆုံကြမှာပါ။ လာပေါ်တေးဟာ မန်စီးတီးအတွက် စုစုပေါင်း ပွဲ ၁၈၀ လောက် ကစားခဲ့ပြီး ဆုဖလား ၁၅ လုံးရယူနိုင်ခဲ့ပါတယ်။
မန်စီးတီးမှာ အဲဒီလောက်အောင်မြင်မှုရမယ်လို့ မထင်ခဲ့ကြောင်းနဲ့ အသင်းနဲ့ သက်ဆိုင်သူတွေ အားလုံးကိုကျေးဇူးတင်ကြောင်း၊ စီးတီးပရိသတ်အဖြစ် အမြဲတမ်းဆက်ရှိနေမှာဖြစ်ကြောင်း လာပေါ်တေးက စီးတီးပရိသတ်တွေကို နှုတ်ဆက်စကားဆိုခဲ့ပါတယ်။
