အစ္စရေးသိမ်းပိုက်ထားတဲ့ အနောက်ဘက်ကမ်း နာဘလုစ်မြို့အနီး ကူစ်ရာရွာမှာ ပါလက်စတိုင်းမိသားစု ၂ စုကို အစ္စရေးအခြေချသူတွေက ဩဂုတ် ၉ ရက်ကတည်းက နေအိမ်တွေထဲမှာ ဝိုင်းပိတ်ထားခဲ့ပါတယ်။ 

အဘူရီဒီနဲ့ ဟက်ဆန်မိသားစုတွေဟာ ရေနဲ့ လျှပ်စစ်မီး ဖြတ်တောက်ခံထားရပြီး အစားအသောက်လည်း ကုန်ခန်းလာနေတယ်လို့ ဆိုပါတယ်။

အဘူရီဒီမိသားစုရဲ့ နေအိမ်ရှေ့နံရံကို အခြေချသူတွေက ဖြိုဖျက်ပြီး ကျောက်တုံးတွေနဲ့ လမ်းပိတ်ခဲ့တာကြောင့် ကလေးငယ် ၂ ယောက် အပါအဝင် လူ ၇  ယောက်  အပြင်မထွက်နိုင်ခဲ့ပါဘူး။

ဟက်ဆန်မိသားစုကတော့ အခြေချသူတွေဟာ အိမ်တံခါးကို ဖျက်ဖို့ကြိုးစားပြီး ကျောက်ခဲတွေနဲ့ ပစ်ခဲ့တာကြောင့် “သေမတတ်ကြောက်လန့်နေရတယ်” လို့ ပြောပါတယ်။

ဩဂုတ် ၁၁ ရက်ညပိုင်းရောက်မှသာ လူနာတင်ယာဉ်တစီး ဝင်ခွင့်ရခဲ့ပြီး အစားအသောက်ပို့ပေးကာ ကလေးတယောက်ကို ဆေးကုသဖို့ ခေါ်ထုတ်နိုင်ခဲ့ပါတယ်။

ဩဂုတ် ၁၂ ရက်မှာ အစ္စရေးလုံခြုံရေးတပ်ဖွဲ့တွေက အခြေချသူတွေရဲ့ စခန်းကို ရှင်းလင်းဖို့ ကြိုးစားရာကနေ ထိပ်တိုက်တွေ့ခဲ့ပြီး မျက်ရည်ယိုဗုံးနဲ့ အသံဗုံးတွေ သုံးခဲ့ပါတယ်။

ပါလက်စတိုင်းအိမ်တွေကို ဝင်ရောက်သိမ်းယူတာဟာ “တရားမဝင်၊ ရှုတ်ချဖွယ်ရာဖြစ်ပြီး လက်မခံနိုင်တဲ့လုပ်ရပ်” လို့ အစ္စရေးကာကွယ်ရေးတပ်ဖွဲ့ (IDF) က ပြောပါတယ်။

ကုလသမဂ္ဂဘက်ကတော့ အခြေချသူတွေရဲ့ အကြမ်းဖက်မှုဟာ စံချိန်တင်အဆင့် ရောက်နေပြီး “အနောက်ဘက်ကမ်းဟာ အကျပ်အတည်းအမှတ်ကို ရောက်နေပြီ” လို့ ဩဂုတ် ၁၁ ရက်မှာ သတိပေးပါတယ်။

နိုင်ငံတကာဥပဒေအရ အစ္စရေးအခြေချစခန်းအားလုံး တရားမဝင်သလို ၂၀၂၆ ခုနှစ်မှာ အခြေချသူအကြမ်းဖက်မှု၊ အိမ်ဖြိုဖျက်မှုနဲ့ နှင်ထုတ်မှုတွေကြောင့် ပါလက်စတိုင်း ၃,၈၀၀ လောက် နေရပ်စွန့်ခွာခဲ့ရတယ်လို့ ကုလသမဂ္ဂက ဆိုပါတယ်။

Source: Reuters