ကရင်ပြည်နယ်၊ ကျုံဒိုးရဲစခန်းနဲ့ ကျုံဒိုးအခြေစိုက် ခမရ ၅၄၅ စစ်ကောင်စီတပ်ရင်းတို့ကို သြဂုတ် ၁၂ ရက် မနက်က ဂဠုန်စစ်ကြောင်းမှ Spring UAV Force G3 (Fixed Wings) အဖွဲ့က ဒရုန်းတွေနဲ့ တိုက်ခိုက်ခဲ့တယ်လို့ ဂဠုန်စစ်ကြောင်း ပြန်ကြားရေးတာဝန်ခံက ပြောပါတယ်။
စစ်ကောင်စီတပ်စခန်း ၂ နေရာကို ဒရုန်းနဲ့တိုက်ခိုက်ခဲ့တာ စစ်ကောင်စီဘက်က သုံးဦး ဒဏ်ရာရကာ ကားတစီးပျက်စီးခဲ့ပြီး ခမရ ၅၄၅ တပ်ရင်းမှူးကတော် ဦးခေါင်းဒဏ်ရာ ပြင်းထန်စွာနဲ့ ဆေးကုသနေရကာ အခြေအနေ မကောင်းဘဲ စိုးရိမ်ရတယ်လို့ ဂဠုန်စစ်ကြောင်း ပြန်ကြားရေးတာဝန်ခံက ဆိုပါတယ်။
စစ်ကောင်စီဘက်က လက်နက်ကြီးတွေနဲ့ တန်ပြန်ပစ်ခတ်တာကြောင့် အသက်ကြီးပိုင်းအရွယ် အမျိုးသားနှစ်ဦး ထိခိုက်ဒဏ်ရာ ရရှိခဲ့ရတယ်ပေမဲ့ မစိုးရိမ်ရဘူးလို့ ဆိုပါတယ်။
လက်ရှိမှာ ကေအန်ယူ တပ်မဟာ ၆ နယ်မြေအတွင်း စစ်ကောင်စီတပ်နဲ့ ထိတွေ့တိုက်ပွဲတွေ ရှိလာပြီး စစ်ကောင်စီဘက်က မြေပြင်မှာ အထိအခိုက် အကျအဆုံးတွေ များခဲ့တယ်လို့ စစ်မြေပြင် သတင်းအရင်းမြစ်တွေက ပြောပါတယ်။
အဆိုပါတိုက်ပွဲတွေကြောင့် သာမန် အရပ်သားတွေရဲ့ အသက်အိုးအိမ် စည်းစိမ်တွေပါ ထိခိုက်ပျက်စီး ဆုံးရှုံးခဲ့တယ်လို့ ဒေသခံတွေဆီကနေ သိရပါတယ်။
