မြဝတီ-ကော့ကရိတ်လမ်းဟောင်းဖြစ်တဲ့ နဘူး-ထို့ကော်ကိုး-ညီနောင် လမ်းပိုင်းကို ယခင် ကော့ကရိတ်-မြဝတီ အာရှလမ်းမဖွင့်ခင်တုန်းက အသုံးပြုခဲ့ဖူးတဲ့ နည်းလမ်းအတိုင်း မော်တော်ယာဉ်တွေကို  အဆင်းတရက် အတက်တရက် ပြန်သတ်မှတ်လိုက်တယ်လို့ မြို့ခံတွေဆီက သိရပါတယ်။

ပြီးခဲ့တဲ့သီတင်းပတ်က မိုးသည်းထန်မှုကြောင့် မြဝတီ-ကော့ကရိတ် အာရှလမ်းမကြီးလမ်းပိုင်း တောနော် ရေတံခွန်နားမှာ မြေပြိုကျပြီး လမ်းပဲ့ကျသွားလို့ ကုန်စည်စီးဆင်းမှုတွေနဲ့ လမ်းပန်းဆက်သွယ်ရေးတွေပြတ်တောက်သွားခဲ့တာပါ။

ဒါကြောင့် အရင်လမ်းဟောင်းဖြစ်တဲ့ နဘူး-ထို့ကော်ကိုး-ညီနောင် လမ်းပိုင်းမှာ ဩဂုတ် ၁၄ ရက်က စတင်ပြီး မော်တော်ယာဉ်အဆင်းနေ့အဖြစ် စစ်ကောင်စီက  သတ်မှတ်လိုက်တာဖြစ်ပါတယ်။

မြဝတီ-ကော့ကရိတ်လမ်းဟောင်းကကျဉ်းတဲ့အတွက် ယာဉ်ကြောမပိတ်ဆို့ရလေအောင်  အတက်ကားနဲ့ အဆင်းကား တစီးနဲ့ တစီးစောင့်ပြီးမှာ မောင်းနှင်ကြဖို့ သတ်မှတ်လိုက်တာလို့  ဒေသခံတွေက ဆိုပါတယ်။

မြဝတီမြို့ခံတဦးက “လမ်းကကျဉ်းတယ်လေ၊ တနေ့တည်း  အဆင်းရော အတက်ပါ သွားတာဘယ်လိုမှ အဆင်မပြေဘူး။ အာရှလမ်း မရှိခင်ကလည်း အဆင်းတနေ့  အတတ်တနေ့ပဲလေ။  အခုလည်း အဲ့လိုပုံစံပဲပြန်သုံးရတဲ့ သဘောပေါ့” လို့ ပြောပါတယ်။

ကော့ကရိတ်-မြဝတီအာရှလမ်းကို ၂၀၁၅ ခုနှစ် ဩဂုတ်လကုန်မှ ဖွင့်လှစ်အသုံးပြုခဲ့ကြတာဖြစ်ပြီး ယခင်ကာလတွေတည်းက နဘူး-ထို့ကော်ကိုး-ညီနောင်လမ်းကိုသာ အသုံးပြုကြတာဖြစ်ပါတယ်။

ကရင်ပြည်နယ်မှာ မိုးသည်းထန်စွာရွာသွန်းမှုကြောင့် ဩဂုတ် ၆  ရက်နေ့ကစပြီး မြဝတီ-ကော့ကရိတ်အာရှလမ်းမှာ တောင်ပြိုတာနဲ့ လမ်းပျက်စီးတာတွေ ဖြစ်ခဲ့လို့ အာရှလမ်းကို  အသုံးပြုမရတော့တာ ဖြစ်ပါတယ်။