အီတလီလက်ရွေးစင်အသင်းနဲ့ ဂျူဗင်တပ်စ်အသင်းတို့ရဲ့ ဂန္ထဝင်ဂိုးသမား ဘူဖွန်ဟာ ကစားသမားဘဝကနေ အနားယူတော့မယ်လို့ သြဂုတ် ၂ ရက်မှာ နာမည်ကျော် သတင်းထောက် ဖေဘရီဇီအို ရိုမာနိုက အတည်ပြု ပြောကြားခဲ့ပါတယ်။
အသက် ၄၅ နှစ်အရွယ် ဘူဖွန်ဟာ ပါးမားအသင်းနဲ့ ၂၀၂၄ ခုနှစ်အထိ စာချုပ်ရှိနေပေမဲ့ ဒဏ်ရာပြဿနာတွေ ရှိနေတာနဲ့ ပါးမားအသင်း အီတလီစီးရီးအေကို မတက်ရောက်နိုင်တာကြောင့် အနားယူဖို့ ဆုံးဖြတ်ခဲ့တာပါ။
ဘူဖွန်ဟာ ပြီးခဲ့တဲ့ရာသီက ကြွက်သားဒဏ်ရာတွေနဲ့ ရုန်းကန်ခဲ့ရပြီး အထူးသဖြင့် တံကောက်ကြောဒဏ်ရာကြောင့် ၃ လခန့် အနားယူခဲ့ရပါတယ်။
အီတလီဂန္ထဝင်ဂိုးသမား ဘူဖွန်ဟာ အခုနွေရာသီ အပြောင်းအရွှေ့မှာ ဆော်ဒီလိဂ်က လုပ်ခလစာ အများအပြားနဲ့ ကမ်းလှမ်းတဲ့ အခွင့်အရေးကို ရရှိခဲ့ပေမဲ့ ငြင်းဆိုခဲ့ပါတယ်။
ဘူဖွန်ဟာ ၁၉၉၈ ရာသီမှာ ပါးမားအသင်းနဲ့ ပရော်ဖက်ရှင်နယ် ဘောလုံးသမားဘဝကို စတင်ပွဲထွက်ခဲ့ပြီး ၃ နှစ်အကြာမှာ ဂျူဗင်တပ်စ်အသင်းကို ပြောင်းရွှေ့ခဲ့ပါတယ်။
အီတလီဂိုးသမားကြီးဟာ ကစားသမားဘဝ ၂၈ ရာသီအတွင်း ဂျူဗင်တပ်စ်အသင်းမှာ ၁၉ ရာသီ ကုန်ဆုံးခဲ့ပြီး ပီအက်စ်ဂျီမှာ ၁ ရာသီနဲ့ ပါးမားမှာ ၈ ရာသီကြာ ဖြတ်သန်းခဲ့ပါတယ်။
ဘူဖွန်ဟာ စီးရီးအေမှာ ပွဲအများဆုံး ကစားထားတဲ့ ကစားသမားအဖြစ် ၆၅၇ ပွဲနဲ့ စံချိန်တင်ထားပြီး ၂၀၀၃ ခုနှစ်မှာ ဥရောပအကောင်းဆုံး ကစားသမားဆု ရရှိခဲ့ပါတယ်။
ဘူဖွန်ဟာ ပါးမား၊ ဂျူဗင်တပ်စ်နဲ့ ပီအက်စ်ဂျီအသင်းတို့မှာ ပရော်ဖက်ရှင်နယ်ပွဲပေါင်း ၁,၁၀၀ ကျော် ပါဝင်ကစားခဲ့ပြီး အီတလီစီးရီးအေ ၁၀ ကြိမ်၊ ယူရိုပါလိဂ် ၁ ကြိမ်နဲ့ ပြင်သစ်လီဂူး ၁ ကြိမ် အပါအဝင် ဆုဖလားပေါင်း ၂၆ လုံး ရယူခဲ့ပါတယ်။
အီတလီအသင်းအတွက်လည်း ပွဲပေါင်း ၁၇၅ ပွဲ ပါဝင်ကစားပြီး ၂၀၀၆ ကမ္ဘာ့ဖလားဆုကို ရရှိခဲ့ပါတယ်။
Source - Bleacher Report Football
