အင်ဒိုနီးရှားနိုင်ငံမှာ ကျင်းပနေတဲ့ ၂၀၂၃ အာဆီယံ အမျိုးသမီး ယူ-၁၉ ချန်ပီယံရှစ်ပြိုင်ပွဲ ဆီမီးဖိုင်နယ်ပွဲစဥ်အဖြစ် မြန်မာနဲ့ ဗီယက်နမ်တို့ ဇူလိုင် ၁၃ ရက်က ယှဥ်ပြိုင်ကစားခဲ့ရာ မြန်မာယူ-၁၉ အမျိုးသမီးအသင်းက ဗီယက်နမ်ယူ-၁၉ အမျိုးသမီးအသင်းကို ၂ ဂိုး ၁ ဂိုးနဲ့ ရှုံးနိမ့်ပြီး ဗိုလ်လုပွဲတက်ခွင့် ဆုံးရှုံးခဲ့ရပါတယ်။
မြန်မာနဲ့ ဗီယက်နမ် အသင်းတို့ဟာ မိနစ် ၉၀ ပွဲချိန်အတွင်း တဖက် ၁ ဂိုးစီ သရေကျခဲ့ပြီး အချိန်ပို ဆက်လက်ယှဉ်ပြိုင်ရာ ဗီယက်နမ်အသင်းက အနိုင်ဂိုး သွင်းယူနိုင်ခဲ့တာ ဖြစ်ပါတယ်။
ဒီပွဲမှာ မြန်မာအသင်းက ဦးဆောင်ဂိုးရခဲ့ပြီး ပွဲချိန် ၈ မိနစ်မှာ ယဥ်လွန်းအိမ်က သွင်းယူပေးခဲ့တာပါ။ ဗီယက်နမ်အသင်းအတွက် ချေပဂိုးနဲ့ အနိုင်ဂိုးတွေကို ပွဲချိန် ၄၃ မိနစ်နဲ့ ၁၀၃ မိနစ်မှာ သွင်းယူခဲ့ပါတယ်။
မြန်မာအသင်းဟာ ဗီယက်နမ်အသင်းထက် အခွင့်အရေး ပိုရခဲ့သလို ဂိုးပေါက်ကန်သွင်းမှုလည်း ပိုရခဲ့ပြီး တိုက်စစ်မှူးတွေ အဆုံးသတ်မသေချာမှု၊ ဂိုးရလိုစိတ် လောနေမှုနဲ့ ဂိုးသမားနဲ့ ခံစစ်ကစားသမားတွေ ပေါ့ဆမှုတွေရှိခဲ့လို့ ရှုံးနိမ့်ခဲ့ရတာပါ။
ပွဲအပြီးမှာ မြန်မာယူ-၁၉ နည်းပြချုပ် ဒေါ်သက်သက်ဝင်းက “ကျနော်တို့ ဒီပွဲမှာ အကောင်းဆုံး ကြိုးစားခဲ့ကြတယ်။ ဗီယက်နမ်က တောင့်တင်းတဲ့အသင်းဖြစ်လို့ ကျနော်တို့ ဦးဆောင်ဂိုးရခဲ့ပေမဲ့ ချေပဂိုးနဲ့ အနိုင်ဂိုးတွေ ပြန်ပေးခဲ့ရတယ်။ ပိုကောင်းတဲ့အသင်းက နိုင်သွားတာပါ။ တတိလုပွဲမှာ ဆုတံဆိပ်ယူနိုင်ဖို့ ဘယ်အသင်းနဲ့တွေ့တွေ့ အကောင်းဆုံး ပြင်ဆင် ကြိုးစားသွားမှာပါ” လို့ ပြောပါတယ်။
ဆီမီးဖိုင်နယ် တခြားပွဲစဥ်မှာ ထိုင်းယူ-၁၉ အမျိုးသမီးအသင်းက အိမ်ရှင် အင်ဒိုနီးရှားယူ-၁၉ အမျိုးသမီးအသင်းကို ၇ ဂိုး ၁ ဂိုးနဲ့ ဂိုးပြတ်အနိုင်ယူပြီး ဗိုလ်လုပွဲတက်ခဲ့ပါတယ်။
မြန်မာယူ-၁၉အမျိုးသမီးအသင်းဟာ ဇူလိုင် ၁၅ ရက် မြန်မာစံတော်ချိန် မွန်းလွဲ ၃ နာရီမှာ တတိယလုပွဲအဖြစ် အင်ဒိုနီးရှားယူ-၁၉ အမျိုးသမီးအသင်းနဲ့ ယှဥ်ပြိုင်ရမှာဖြစ်ပါတယ်။
