ဧရာဝတီတိုင်း၊ ဟင်္သာတမြို့နယ်မှာ ဇွန် ၂၂ရက်နေ့ မနက်က ဒေသခံပြည်သူ ၆ ဦးထက်မနည်းကို စစ်ကောင်စီတပ်က တအိမ်တက်ဆင်း လိုက်လံ ဖမ်းဆီးသွားတယ်လို့ ဒေသခံတွေက ပြောပါတယ်။
"ဟင်္သာတမြို့နယ်မှာရှိတဲ့ ကျေးရွာ ၄ ရွာက ပြည်သူတွေကို တအိမ်တက်ဆင်းလိုက်ဖမ်းတာ။ နေရပ်လိပ်စာ နဲ့ အမည်တွေ မေးပြီးလာဖမ်းသွားတာ။ အားလုံးပေါင်း ၆ ယောက်လို့ သိထားတယ်။ အရင် NLD ပါတီဝင်ထဲက ၁ ဦးနဲ့ CDM ကျောင်းဆရာမ ၁ ဦးပါတယ်။ ကျန်တာကတော့ အရပ်သားပြည်သူတွေ။ PDF ထောက်ပံ့လို့ ဖမ်းတာလို့လည်း ပြောသွားတယ်" လို့ နိုင်ငံရေးနဲ့ နီးစပ်သူဒေသခံတဦးက ပြောပါတယ်။
စစ်ကောင်စီတပ်အင်အား ၁၀၀ နီးပါးဟာ ဟင်္သာတမြို့နယ် နတ်မော်ရွာက CDM ကျောင်းဆရာမ ဒေါ်နွေနွေဦး၊ ကိုင်းတောရွာက NLD ပါတီဝင်ဟောင်း ဦးဇော်ကြီးနဲ့ ကွမ်းခြံကုန်းရွာ သိမ်ကုန်းရွာက အမျိုးသား ၄ ဦးကို PDFထောက်ပံတယ်ဆိုတဲ့ စွပ်စွဲချက်နဲ့ ဖမ်းဆီးသွားတာပါ။
ဟင်္သာတခရိုင် မြန်အောင်မြို့နယ်မှာ စစ်ကောင်စီသတင်းပေးတဦး သေနတ်ပစ်ခတ်ခံရမှုနဲ့ ပတ်သက်ပြီး ပုဒ်မ ၃၀၂ (၁) ခ ပုဒ်မ ၅၀ (စ) နဲ့ တရားစွဲခံထားရတဲ့ မူလတန်းပြ ကျောင်းဆရာ ဦးကောင်းခန့်ကျော်ကို ၂၀၂၂ ခုနှစ် ဒီဇင်ဘာ ၃၀ ရက်နေ့မှာ စစ်ကောင်စီလက်အောက်ခံ တရားရုံးက သေဒဏ်ချမှတ်ခဲ့ပါသေးတယ်။
