ရန်ကုန်၊ မြောက်ဥက္ကလာပမြို့နယ်၊ (ဈ) ရပ်ကွက်၊ ဘုမ္မာလမ်းထိပ်က မြတ်မောင် စိန်နဲ့ရွှေထည်ပစ္စည်းဆိုင် ဓားပြတိုက်မှုနဲ့ပတ်သက်ပြီး ဆက်စပ်သူ ၉ ဦးကို ဖမ်းဆီးရမိခဲ့တယ်လို့ စစ်ကောင်စီရဲတပ်ဖွဲ့က သတင်းထုတ်ပြန်ပါတယ်။
မြတ်မောင်ရွှေဆိုင်ဟာ ဇွန် ၁၈ ရက် ညနေက ဓားပြတိုက်ခံရတာဖြစ်ပြီး စိန်ထည်ပစ္စည်း ကျပ်သိန်း ၅၀၀၀ ဖိုးနဲ့ ရွှေထည် ကျပ်သိန်း ၁၁,၆၀၀ ဖိုး စုစုပေါင်း ကျပ်သိန်း ၁၆,၆၀၀ ခန့် လုယက်ခံလိုက်ရတဲ့အပြင် ဓားပြတွေက သေနတ်ပစ်ခတ်သွားတာကြောင့် ဧည့်ကြိုဝန်ထမ်းအမျိုးသား ၂ ဦး ဒဏ်ရာရပြီး ဆေးရုံတင်ခဲ့ရပါတယ်။
အဆိုပါ ဓားပြမှုမှာ အမျိုးသား ၈ ဦးနဲ့ အမျိုးသမီး ၁ ဦး ပါဝင်ကြောင်း၊ အသက် ၂၃ နှစ်အရွယ် အမျိုးသားနဲ့ အသက် ၂၄ နှစ်အရွယ် အမျိုးသမီး စုံတွဲတို့ကို ဗဟန်းမြို့နယ်၊ ရွှေဂုံတိုင်ရှိ အကယ်ဒမီဟိုတယ်က အခန်းတခုမှာ အရင်ဆုံး ဖမ်းဆီးရမိခဲ့တာလို့ ရဲတပ်ဖွဲ့က ထုတ်ပြန်ပါတယ်။
မြောက်ဥက္ကလာပမြို့နယ်၊ ဝေဘာဂီမြို့သစ်၊ ၂ ရပ်ကွက်နဲ့ ၅ ရပ်ကွက်တို့ရှိ နေအိမ်တွေက အသက် ၂၀ ဝန်းကျင်အမျိုးသား ၅ ဦးတို့ကို ထပ်မံဖမ်းဆီးခဲ့သလို ဧရာ၀တီ၊ မအူပင်မြို့နယ်၊ ခနောင်အုပ်စု၊ ကျွဲလန်းရွာနေ အမျိုးသား ၂ ဦးကိုလည်း ဖမ်းဆီးခဲ့ပါတယ်။
ဇွန်လ ၁၈ ရက် ည ၁၀နာရီခွဲခန့်က ဝေဘာဂီမြို့သစ်၊ ၅ ရပ်ကွက်၊ ဗြဟ္မစိုရ်လမ်းထဲမှာ ဧည့်စာရင်းစစ်ရင်း လူငယ် ၄ ဦးကို စစ်ကောင်စီဘက်က ဖမ်းခေါ်သွားတယ်လို့ ရပ် ကွက်နေသူတွေက အတည်ပြုပြောကြားထားပါတယ်။
ဓားပြမှုနဲ့ပတ်သက်လို့ မြတ်မောင်ရွှေဆိုင်ကို ဆက်သွယ်မေးမြန်းရာမှာတော့ ဆိုင်ရှင်ဖြစ်သူက “ ဖြစ်ခဲ့တုန်းက ဈေးထဲက ဆိုင်မှာ မဟုတ်ပါဘူး၊ နေတဲ့အိမ်မှာပဲ ဖြစ်သွားတာ၊ အခုလောလောဆယ်တော့ သက်ဆိုင်ရာကလည်း ပြောပြထားပါတယ် ”လို့ ဆိုပါတယ်။
ဖမ်းဆီးထားသူ ၉ ဦးဆီက M4A1 သေနတ် ၂ လက်၊ M16 ၁ လက်၊ Sig Sauer ပစ္စတို ၂ လက်၊ ၉မမ ကျည်ဆန် အတောင့် ၂၁၀ ၊ ၅.၅၆ ကျည်အတောင့် ၃၄၀၊ လက်ပစ်ဗုံး ၂ လုံး၊ ကျည်အိမ် ၈ ခုနဲ့ တိုက်ရာပါ ရွှေထည်ပစ္စည်းတွေ ပြန်လည်သိမ်းဆည်းရမိခဲ့တယ်လို့လည်း ရဲတပ်ဖွဲ့သတင်းမှာ ဖော်ပြပါတယ်။
အဆိုပါ ဖမ်းဆီးခံရသူတွေဟာ မြတ်မောင်ရွှေဆိုင်ဓားပြမှုမှာ အမှန်တကယ်ပါဝင် ပတ်သက်သူတွေ ဟုတ်မဟုတ်ကိုတော့ ကာယကံရှင်တွေဘက်က ပြောဆိုတာမရှိသေးသလို သီးခြားအတည်ပြုနိုင်ခြင်းလည်း မရှိသေးပါဘူး။
ဓာတ်ပုံ-ရဲတပ်ဖွဲ့
