မြောက်ဥက္ကလာပမြို့နယ် စျ စျေးရှိ မြတ်မောင် ရွှေဆိုင်ကို ဒီနေ့ညနေ လေးနာရီကျော်က အမည်မသိ သေနတ်ကိုင်ဆောင်ထားသူသုံးဦးက သေနတ်နဲ့ပစ်ခတ် ဓားပြတိုက်ခဲ့တာကြောင့် ဆိုင်ဝန်ထမ်းအချို့ ဒဏ်ရာရပြီး စိန်ရွှေရတနာတွေ ပါသွားတယ်လို့ မြို့ခံတွေက ပြောပါတယ်။
ဒီနေ့ညနေ ၄ နာရီကျော်က မေဒါဝီလမ်းမကြီးပေါ် ဈ စျေးရှေ့မှာ ဖွင့်လှစ်ထားတဲ့ မြတ်မောင်ရွှေဆိုင်ကို သေနတ်ကိုင်ဆောဂ်ထားသူ သုံးဦးဝင်လာပြီး သေနတ်တွေကို မိုးပေါ်ထောင်ဖောက်ကာ ရွှေတွေလုယက်ခဲ့တာလို့ ရပ်ကွက်နေသူတဦးက ဒီဗွီဘီကို ပြောပါတယ်။
"ဆိုင်သိမ်းခါနီးဖြစ်သွားတာ၊ ဝန်ထမ်းတွေ အတော်ထိသွားတာ။ ကျနော်မြင်တာတော့ ယောက်ကျ်ားလေးနှစ်ယောက်ထိတယ်၊ မိန်းကလေးတွေလည်း ထိတယ်။ ထိတဲ့ဦးရေတော့မသိဘူး၊ စိန်တွေ ရွှေတွေ ပါသွားတယ်။"
ဆိုပါပစ်ခတ်မှုဖြစ်စဥ်တွင် မြတ်မောင်ရွှေဆိုင်မှ ဆိုင်ဝန်ထမ်း ကိုအောင်အောင်၊ ကိုလှမိုးအပါအဝင် သုံးဦးနဲ့အထက် ကျည်ထိမှန်ဒဏ်ရာရရှိခဲ့ပြီး စိန်နဲ့ရွှေ သိန်းထောင်ချီပါသွားတယ်လို့ အုပ်ချုပ်ရေးနဲ့နီးစပ်သူတဦးက အတည်ပြုပြောဆိုပါတယ်။
"စိန်နဲ့ရွှေက အကုန်နီးပါးပါသွားတာ ကာလတန်ဖိုးတွက်တွက်နေတုန်း။ ဒဏ်ရာရတဲ့သူတွေကို မေဒါဝီဆေးရုံပို့ထားတယ်။ ဝန်ထမ်းကောင်လေးတွေ စိုးရိမ်ရတယ်၊ လတ်တလော စစ်တပ်က စစ်ဆေးနေတယ်။"
လက်တလောမှာ စစ်ကောင်စီတပ်က မေဒါဝီလမ်းမကြီးတလျှောက် စစ်ဆေးနေပြီး ဈ စျေးကနေ ခြောက်ကွေ့လမ်းဆုံးအထိလည်း ကားတွေကိုစစ်ဆေးနေတယ်လို့ မြို့ခံတွေဆီက သိရပါတယ်။
