ရခိုင်ပြည်နယ်၊ ကျောက်တော်မြို့၊ ယိုးချောင်းဒေသ၊ ပန်းပဲချောင်ကျေးရွာအုပ်စုထဲက ပန်းပဲချောင်း၊ လမ်းပိုက်ခွင်၊ မီးရပ်ပြင်ကျေးရွာတွေကို စစ်ကောင်စီက ထောက်ပံ့ခဲ့တဲ့ သွပ်တွေဟာ အဟောင်းအစုတ်တွေဖြစ်နေလို့ အသုံးမဝင်ဘူးလို့ ရွာခံတွေက ဆိုပါတယ်။
ဇွန် ၂ ရက်က စစ်ကောင်စီက ထောက်ပံ့ရာမှာ ကျေးရွာတရွာကို သွပ်အချပ် ၅၀၊ ဆန် ၁၆ တင်း၊ ဆီတလီတာ ၁၀ ဘူး၊ ခေါက်ဆွဲခြောက် ၆ ဖာ၊ တာပေါ်လင်စတလိပ် အပါအဝင် အမျိုးသမီးလစဉ်သုံးတွေပါ ထောက်ပံ့ခဲ့ပါတယ်။
ပန်းပဲချောင်ကျေးရွာအုပ်စုထဲက ရွာတွေဟာ အိမ်ခြေ ၂၀၀ နီးပါးခန့်ရှိပြီး ထောက်ပံ့ထားတဲ့ ပစ္စည်းတွေ မလောက်ငတာကြောင့် ၅ ပုံ ပုံပြီး မဲဖောက်ခွဲဝေပေးခဲ့ရပါတယ်။
မီးရပ်ပြင်ရွာခံတဦးက “ထောက်ပံ့တာတော့ ရပေမဲ့ အဆင်မပြေဘူး။ သွပ်တွေက အပေါက်တွေ အစုတ်တွေမလို့ သုံးမရဘူး။ ပစ္စည်းကလည်း အရမ်းနည်းလို့ မဲစနစ်နဲ့ပေးလိုက်ရလို့ ကျမတို့လည်း ဘာမှ မရခဲ့ဘူး” လို့ ပြောပါတယ်။
မီးရပ်ပြင်ရွာဟာ အိမ်ခြေ ၂၀၀ နီးပါးမှာ တရွာလုံးနီးပါး ပျက်စီးခဲ့ပြီး အိမ် ၅ လုံးသာ ကျန်ပါတယ်။ ဘုန်းကြီးကျောင်း အပါအဝင် စာသင်ကျောင်းပါ ပျက်စီးခဲ့တာကြောင့် ကျောင်းနေအရွယ် ကလေး ၃၀၀ ကျော် အခုအချိန်ထိ ကျောင်းမတက်ရသေးပါဘူး။
