တိုက်ပွဲတွေ နေ့စဉ်ဆိုသလိုဖြစ်နေတဲ့ တိုင်းရင်းသားဒေသတွေမှာ ကျောင်းဖွင့်လှစ်နိုင်တဲ့ အနေအထားဟာ ထက်ဝက်မက လျော့ကျသွားတယ်လို့သိရပါတယ်။
၂၀၂၃ -၂၀၂၄ ပညာသင်နှစ်မှာ တနိုင်ငံလုံးလွှမ်းခြုံပြီး ယခင်နှစ်ကထက် ကျောင်းတက်နှုန်းတွေ ပိုများလာမယ်လို့ ရည်မှန်းထားပေမယ့် တိုက်ပွဲဖြစ်ရာ ချင်းနဲ့ တနင်္သာရီမှာတော့ ကျောင်းအပ်နှုန်း နည်းပါးခဲ့ပါတယ်။
၂၀၂၃-၂၀၂၄ ပညာသင်နှစ်အတွက် ချင်းပြည်နယ်တခုလုံးမှာ အခြေခံပညာကျောင်းပေါင်း ၁၅၀၀ ကျော်ရှိပေမဲ့ ကျောင်းပေါင်း ၃၀၀ ကျော်ပဲ ဖွင့်လှစ်နိုင်တယ်လို့ ပညာရေးဌာနက ပြောပါတယ်။
ဖွင့်လှစ်ထားနိုင်တဲ့ကျောင်းတွေမှာ ကျောင်းသား၊ ကျောင်းသူစုစုပေါင်း ၄ သောင်း ၂ ထောင်ကျော် ပညာသင်ကြားနေပါတယ်။
ချင်းပြည်နယ်ရဲ့အဓိက မြို့တခုဖြစ်တဲ့ ဟားခါးမြို့မှာတော့ ကျောင်းပေါင်း ၉၅ ကျောင်းရှိပြီးတော့ ဒီနှစ်မှာတော့ ၆ ကျောင်းသာ ဖွင့်လှစ်နိုင်ခဲ့ပြီး ကျောင်းအပ်နှံသူ ၂၄၀၀ လောက်ပဲရှိတယ်လို့ သိရပါတယ်။
လက်ရှိမှာ PDF တွေ မကြာခဏ တိုက်ပွဲဖော်ဆောင်နေတဲ့ တနင်္သာရီတိုင်း၊ တနင်္သာရီမြို့မှာလည်း အခြေခံပညာကျောင်း ၁၄၁ ကျောင်း စာရင်းရှိပေမဲ့ နယ်မြေအခြေအနေအရ ၅၇ ကျောင်းပဲ ဖွင့်နိုင်တယ်လို့ ပညာရေးဌာနကဆိုပါတယ်။
