၂၀၂၃-၂၄ ပညာသင်နှစ်ရဲ့ အခြေခံပညာကျောင်းတွေကို မြန်မာနိုင်ငံတဝန်းမှာ ဇွန် ၁ ရက် ဒီနေ့မနက် စတင်ဖွင့်လှစ်လိုက်ပြီဖြစ်ပြီး အရင်နှစ်ကထက် ကျောင်းအပ်သူနည်းတယ်လို့ စစ်ကောင်စီ ပညာရေးဌာနကနေ သိရပါတယ်။
အရင်နှစ်က အခြေခံပညာကျောင်းတွေမှာ ကျောင်းသားကျောင်းသူ ၇ သန်းကျော် ကျောင်းအပ်နှံပြီး ကျောင်းတက်ခဲ့ကြပေမဲ့ ဒီနှစ်မှာတော့ ဒီနေ့အထိ ကျောင်းသားကျောင်းသူ ၆ သန်းကျော်ပဲ ကျောင်းအပ်တယ်လို့ စစ်ကောင်စီ ပညာရေးဌာနက ဆိုပါတယ်။
ဒီလိုအပ်နှံတဲ့ ကျောင်းသား ကျောင်းသူ ၆ သန်းဆိုတဲ့ အရေအတွက်ဟာ အခြေခံပညာကျောင်းတွေအပြင် ဘုန်းတော်ကြီးကျောင်း၊ ကိုယ်ပိုင်ကျောင်းတွေမှာပါ အပ်နှံခဲ့တဲ့ အရေအတွက်လည်း ဖြစ်ပါတယ်။
ဒီနှစ်မှာ စနစ်သစ်ဖြစ်တဲ့ KG+12 ပညာရေးကို စတင်အကောင်ထည်ဖော်တဲ့နှစ်ဖြစ်ပြီး အာဏာသိမ်းစစ်ကောင်စီက ကျောင်းတက်နှုန်းတွေ မြင့်မားဖို့ ရည်မှန်းထားခဲ့ပေမဲ့ ကျောင်းအပ်နှုန်းတွေက မနှစ်ကထက် လျော့နည်းသွားခဲ့ပါတယ်။
စစ်ကောင်စီလက်အောက်ခံ ကျောင်းတွေမှာ ကျောင်းတက်နေကြတဲ့ ကျောင်းသား ကျောင်းသူတွေရှိသလို စစ်ကျွန်ပညာရေးကို သပိတ်မှောက်ပြီး ကျောင်းမတက်ကြတဲ့ ကျောင်းသားတွေလည်း သန်းနဲ့ရှိနေပါတယ်။
