၂၀၂၂-၂၃ ပညာသင်နှစ်မှာ တက္ကသိုလ်ဝင်စာမေးပွဲ မဖြေဆိုလိုက်ရသူတွေနဲ့ စနစ်ဟောင်း ၉ တန်း (Grade 10) နှစ်ကျကျောင်းသားတွေနဲ့ တက္ကသိုလ်ဝင်စာမေးပွဲ မဖြေဆိုလိုက်ရသူတွေအနေနဲ့ စနစ်သစ် Grade-11 နဲ့ Grade - 12 ကို တက်ရောက်လိုပါက ဝင်ခွင့်စာမေးပွဲ ဖြေဆိုရမယ်လို့ စစ်ကောင်စီပညာရေးဌာနကနေ သိရပါတယ်။

အဆိုပါ ဝင်ခွင့်စာမေးပွဲကို မေလ ၉ ရက်နေ့ကနေ ၁၆ ရက်နေ့အထိ ကျင်းပသွားမှာဖြစ်ပြီး ၉ တန်း (Grade 10) အဖြစ် ဝင်ရောက်ဖြေဆိုတဲ့ ကျောင်းသားကျောင်းသူတွေအနေနဲ့ ဝင်ခွင့်အောင်မြင်ရင် Grade 11 ကို တက်ရောက်ခွင့်ရမှာဖြစ်ပြီး ဆယ်တန်းအဆင့်ကနေ ဝင်ရောက်ဖြေဆိုတဲ့ ကျောင်းသားကျောင်းသူတွေက ဝင်ခွင့်အောင်မြင်ရင် Grade-12 ကို တက်ရောက်ခွင့်ရရှိမှာ ဖြစ်ပါတယ်။

ဝင်ခွင့်ဖြေဆိုလိုတဲ့ ကျောင်းသားကျောင်းသူတွေအနေနဲ့ သက်ဆိုင်ရာ မြို့နယ်ပညာရေးမှူးရုံးတွေက လျှောက်လွှာလက်ခံပေးနေပြီး အခုရက်ပိုင်းအတွင်း အမြန်ဆုံး လျှောက်ထားမှသာ ဝင်ခွင့်စာမေးပွဲဖြေဆိုခွင့် ရမယ်လို့ ရန်ကုန်တိုင်း ပညာရေးမှူးရုံးမှ တာဝန်ရှိသူတဦးက ပြောပါတယ်။

အရင်ကတော့ အခြေခံပညာစာမေးပွဲ အောင်စာရင်းတွေ ထုတ်ပြန်ပြီးပါက ၉ တန်း ကျရှုံးထားတဲ့ ကျောင်းသားကျောင်းသူတွေနဲ့ မဖြေဆိုလိုက်ရသူတွေအတွက် မေလထဲမှာ ဝင်ခွင့်စာမေးပွဲ ဖြေဆိုစေပြီး ဆယ်တန်းကို တက်ရောက်စေခဲ့ပါတယ်။

အခုနှစ်မှာတော့ စနစ်သစ်ပညာရေးဖြစ်တဲ့ KG+12 ကို စတင်တော့မှာဖြစ်တဲ့အတွက် တက္ကသိုလ်ဝင်စာမေးပွဲ မဖြေဆိုလိုက်ရသူတွေအတွက် Grade-12 ကို တက်ရောက်နိုင်ဖို့အတွက် ဝင်ခွင့်စာမေးပွဲတခု ထပ်တိုးပြီး ဖြေဆိုစေတာလည်း ဖြစ်ပါတယ်။

၂၀၂၂-၂၃ ပညာသင်နှစ်မှာ တနိုင်ငံလုံး အတိုင်းအတာနဲ့ ကျောင်းသားကျောင်းသူ ၇ သန်းကျော် တက်ရောက်ခဲ့ပြီးတော့ ခါတိုင်းနှစ်တွေထက် ကျောင်းသားကျောင်းသူ ၃ သန်းကျော် ကျောင်းမတက်ခဲ့ပါဘူး။