ရှမ်းပြည်နယ်မြောက်ပိုင်း၊ ပလောင်ဒေသ၊ နမ့်ဆန်မြို့နယ်၊ ငွန်ဆိုင်းကျေးရွာမှာ ဧပြီ ၂၁ ရက် ဒီနေ့မနက် အစောပိုင်းက မီးလောင်မှုဖြစ်ပွားခဲ့ပြီး နေအိမ် ၄ လုံးပျက်စီးကာ လူ ၁ ဦး သေဆုံးခဲ့တယ်လို့ မြို့ခံကယ်ဆယ်ရေးအသင်းက ပြောပါတယ်။
မနက် ၃ နာရီဝန်းကျင်မှာ အသက် ၇၈ နှစ်အရွယ် အဘိုးအိုတဦးရဲ့ နေအိမ်ကနေ မီးစတင်လောင်ကျွမ်းတာလို့ သိရပြီး ဘေးကပ်ရပ်အိမ် ၃ လုံးကိုပါ ကူးစက်လောင်ကျွမ်း သွားခဲ့တာပါ။
အဆိုပါအဘိုးအိုဟာ ခြေထောက် လေဖြန်းထားတာကြောင့် မီးလောင်တဲ့အထဲ ပါသွားခဲ့ပြီး ကျန်မီးကူးစက်ခဲ့တဲ့အိမ်တွေက လူတွေတော့ ထိခိုက်မှုမရှိဘူးလို့ သိရပါတယ်။
“ငွန်ဆိုင်းမှာ မနက်စောစောပိုင်းက မီးလောင်ပါတယ်။ အိမ်ခြေ ၄ လုံး မီးလောင်၊ အသက် ၇၈ နှစ် ဦးအိုက်စု သေဆုံးပါ။ လူတွေ အိပ်မောကျနေတဲ့အချိန် ဖြစ်တာရယ်၊ စလောင်တဲ့အိမ်က အဘိုးက လေဖြန်းထားတာရယ်နဲ့ လူသေဆုံးတဲ့အထိ ဖြစ်သွားတာ” လို့ မြို့ခံကယ်ဆယ်ရေးအသင်းက ပြောပါတယ်။
မြို့ခံမီးသတ်ဌာနနဲ့ ကယ်ဆယ်ရေးအသင်းတွေက မီးသတ်ယာဉ် ၃ စီးနဲ့ ဝိုင်းဝန်းငြှိမ်းသတ်ခဲ့လို့ မနက် ၅ နာရီခွဲလောက်မှာ မီးငြိမ်းသွားတယ်လို့ သိရပြီး သေဆုံးသူ ရုပ်အလောင်းကို နမ့်ဆန်ဆေးရုံ ပို့ဆောင်ထားတယ်လို့ သိရပါတယ်။
မီးစတင်လောင်ရတဲ့ အကြောင်းရင်းနဲ့ ပျက်စီးဆုံးရှုံးမှုကို စုံစမ်းနေဆဲလို့ သိရပြီး ရှမ်းပြည်နယ်မှာ ဧပြီလအတွင်း ၂၁ ရက်နေ့အထိ မီးလောင်မှု ၈ ကြိမ်ဖြစ်ပွားခဲ့ကာ လူနေအိမ် ၅၅ လုံးနဲ့ ဘုန်းကြီးကျောင်း ၂ ကျောင်း ပျက်စီးဆုံးရှုံးထားတယ်လို့ မြန်မာနိုင်ငံ မီးသတ်တပ်ဖွဲ့ မှတ်တမ်းအရ သိရပါတယ်။
