ရန်ကုန်တိုင်း၊ မင်္ဂလာတောင်ညွန့်မြို့နယ်၊ တောင်ဒဂုံမြို့နယ်၊ ကျောက်တံတားမြို့နယ်၊ ဒလမြို့နယ်၊ အလုံမြို့နယ်နဲ့ တောင်ဥက္ကလာပမြိုနယ်တွေမှာ ဖေဖော်ဝါရီ ၈ ရက်က မီးလောင်မှု ၆ ကြိမ်ဖြစ်ပွားခဲ့ပြီး လူ ၁ ဦးသေဆုံးကာ ၄ ဦး ဒဏ်ရာရရှိခဲ့တယ်လို့ မြို့ခံလူမှုကူညီရေးအသင်းတွေဆီက သိရပါတယ်။

ဖေဖော်ဝါရီ ၈ ရက် မနက် ၁၀ နာရီခွဲလောက်က မင်္ဂလာတောင်ညွန့်မြို့နယ်၊ ဆမ်ဆောင်းအရောင်းခန်းမ ဝါယာကြိုးရှော့ဖြစ်ပြီး မီးလောင်ကျွမ်းကာ၊ နေ့လယ် ၁ နာရီ မိနစ် ၄၀ မှာ တောင်ဒဂုံမြို့နယ်၊ ၁၄၄ ရပ်ကွက်၊ ဘုရင့်နောင်လမ်းမှာ မီးလောင်ခဲ့ပါတယ်။

ဒါ့အပြင် ညနေ ၃ နာရီ ၄၄ မိနစ်မှာ ကျောက်တံတားမြို့နယ်၊ ၃၅×၃၆ လမ်းကြား ကုန်သည်လမ်းက အဆောက်အဦတခုမှာ မီးလောင်ကျွမ်းခဲ့ပြီး၊ ညနေ ၄ နာရီ မိနစ် ၅၀ မှာ ဒလမြို့နယ်၊ ဒလသင်္ဘောကျင်းအနီးက ဗလကျော်စွာ သ‌င်္ဘောတစီး မီးလောင်ခဲ့ပါတယ်။

ဒလမြို့နယ်က သင်္ဘောတစီး မီးလောင်တာနဲ့ပတ်သက်ပြီး လူမှုကူညီရေးအသင်းတခုကို ဆယ်သွယ်မေးမြန်းကြည့်ရာမှာတော့ “ညနေ ၅ နာရီထိုးခါနီးမှာ မီးက တော်တော်ကြီးနေပြီ၊ မြစ်ထဲမှာဆိုက်ထားလို့ တော်သေးတာ၊ လူနေအိမ်နဲ့ဆို မီးတော်တော်ကူးပါတယ်။ ဘာလို့ မီးလောင်တာလဲတော့ သေချာမသိသေးပေမဲ့ စက်ဆီသုံးရင်း လောင်တာလို့ ကြားရတယ်။ လူတော့ မထိခိုက်ပါဘူး၊ သင်္ဘောတော့ တော်တော်ပျက်စီးသွားတယ်” လို့ ပြောပါတယ်။

ဖေဖော်ဝါရီ ၈ ရက် ည ၇ နာရီ ၃၈ မိနစ်မှာပဲ တောင်ဥက္ကလာပမြို့နယ်၊ စီမံကိန်း ၁၊ ၁၄ ရပ်ကွက်၊ သရဖီလမ်းနဲ့ မြလေးလမ်းထောင့်က လူနေအိမ်တလုံး မီးလောင်ခဲ့ပြီး ည ၇ နာရီ ၄၅ မိနစ်မှာ မီးငြှိမ်းသတ်နိုင်ခဲ့တယ်လို့ သိရပါပြီး ပေါ့ဆမီးကြောင့်လို့ ဆိုပါတယ်။

ည ၇ နာရီ ၂၅ မိနစ်မှာလည်း အလုံမြို့နယ်၊ ဌာနရပ်ကွက်၊ နှင်းဆီလမ်း၊ အလုံခန်းမရှေ့က အထပ်မြင့်တိုက်ခန်းတခုမှာ မီးလောင်ကျွမ်းခဲ့လို့ အခန်းနေ ကျား ၃ ဦး၊ မ ၁ ဦးနဲ့ မီးသတ်ဝန်ထမ်း ၁ ဦး ထိခိုက်ဒဏ်ရာရရှိခဲ့ပြီး ဆေးရုံပို့ဆောင်နေချိန် မီးလောင်တိုက်ခန်းက ဒဏ်ရာရ ကျား ၁ ဦး သေဆုံးခဲ့တယ်လို့ သိရပါတယ်။

ရန်ကုန်မြို့အခြေစိုက် လူမှုကူညီရေးအသင်းတခုက “ည ၇ ခွဲလောက်ရှိနေပြီ Level 1 ခေါ်ပြီး မီးငြှိမ်းတာ၊ ၈ နာရီ ၁၀ မိနစ်လောက်မှ ငြိမ်းသွားတယ်။ အခန်းတံခါးက ဂျက်ကျနေတာ။ သော့ကို ရဲဘော်တွေ ချိုးပြီး ဝင်ငြှိမ်းရတယ်။ အခန်းနေသူတွေကို ကယ်ထုတ်ပြီး အမျိုးသမီးကတော့ ဒဏ်ရာပြင်းထန်ပါတယ်။ အမျိုးသား ၁ ဦး သေဆုံး၊ အားလုံးကို ဆေးရုံကြီးကို ပို့ဆောင်ထားပါတယ်။ ဝါယာကြိုးရှော့ဖြစ်ရာကနေ လောင်တယ်လို့ပဲ သိရသေးတယ်။ ဆုံးရှုံးမှုနဲ့ မီးလောင်မှုဖြစ်စဉ် တိတိကျကျကို မီးသတ်ဌာနက စုံစမ်းနေဆဲပါ” လို့ ပြောပါတယ်။

ဖေဖော်ဝါရီ ၁ ရက်ကနေ ၈ ရက်အတွင်း မီးလောင်မှုဖြစ်စဉ် ၂၄ ကြိမ်ရှိပြီး ဝါယာကြိုးရှော့ဖြစ်လို့ မီးလောင်ကျွမ်းမှု ၇ ကြိမ်၊ မြက်ခြောက်မီးနဲ့ ပေါ့ဆမီးကြောင့် လောင်ကျွမ်းမှု ၁၇ ကြိမ်ရှိနေပြီလို့ မြန်မာနိုင်ငံမီးသတ်ဌာနချုပ်နဲ့ လူမှုကူညီရေးအသင်းတွေရဲ့ မှတ်တမ်းတွေအရ သိရပါတယ်။

ဓာတ်ပုံ -မြန်မာမီးသတ်ဌာနချုပ်၊ ရန်ကုန်မြို့ လူမှုကူညီရေးအသင်းများ