ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ညောင်လေးပင်ခရိုင် တပ်မဟာ-၃၊ ကျောက်ကြီးမြို့နယ်ထဲက ကျေးရွာတွေထဲကို စစ်ကောင်စီတပ်တွေက သီတင်း ၂ ပတ်အတွင်း လက်နက်ကြီးအလုံး ၃၀ ကျော် ပစ်ခတ်ခဲ့တာကြောင့် ဒေသခံပြည်သူ ၂,၅၀၀ ကျော် ထွက်ပြေးတိမ်းရှောင်နေကြရတယ်လို့ ကေအန်ယူက ထုတ်ပြန်ပါတယ်။
ဇန်နဝါရီ ၃ ရက်ကနေ ၁၇ ရက်အထိ ၁၅ ရက်အတွင်း အရပ်သားပြည်သူလူထုနေထိုင်ရာ ကျေးရွာတွေထဲကို စစ်အုပ်စုက ရည်ရွယ်ချက်ရှိရှိ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာ ဖြစ်ပြီး အရပ်သားပြည်သူလူထုနေအိမ် ၂ လုံး ပျက်စီးခဲ့ကာ ၁ ယောက် ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ကေအန်ယူ ညောင်လေးပင်ခရိုင်ထဲမှာ တပ်စွဲထားတဲ့ ခလရ-၁၂၄၊ ခလရ-၆၀၊ ခမရ-၃၅၁ နဲ့ ခမရ-၄၃၉ တို့က ပစ်ခတ်ခဲ့တာကြောင့် ခလယ်တူရယ်ကျေးရွာကို လက်နက်ကြီး ၉ လုံး၊ ဃဲဒဲကျေးရွာကို ၄ လုံး၊ ပကော်ခီးကျေးရွာကို ၂ လုံး၊ ကျို့ကုန်းကျေးရွာကို ၂ လုံး၊ သရေးစီလော်ကျေးရွာကို ၂ လုံး၊ မတောကူးကျေးရွာကို ၅ လုံး၊ သေဂေါ်ဒဲကျေးရွာကို ၄ လုံးနဲ့ ရွှေပေါက်ကံကျေးရွာကို ၃ လုံးစီနဲ့ စုစုပေါင်း ကျေးရွာ ၈ ရွာထဲကို ပစ်ခတ်ခဲ့ကြတာလို့ ကေအန်ယူ ထုတ်ပြန်ချက်မှာ ဖော်ပြပါတယ်။
ကရင်နီ (ကယား) ပြည်နယ်၊ ဒီးမော့ဆိုမြို့နယ်မှာလည်း ၆ မိုင်လမ်းကြီးတကျော ပြီးခဲ့တဲ့ တပတ်အတွင်း တိုက်ပွဲဖြစ်ပွားလို့ စစ်ကောင်စီဘက်က ထိခိုက်ကျဆုံးမှုရှိကြောင်း ကရင်နီအမျိုးသားများကာကွယ်ရေးတပ် (KNDF) တပ်ရင်း-၉ က သတင်းထုတ်ပြန်ထားပါတယ်။
စံပြ ၆ မိုင်ကျေးရွာအုပ်စု လမ်းမကြီးတကျောကို စစ်ကောင်စီတပ်ဖွဲ့တွေက ဇန်နဝါရီ ၁၁ ရက်ကစပြီး စစ်ကြောင်းထိုး ဝင်ရောက်ခဲ့တဲ့အတွက် နှစ်ဖက် တိုက်ပွဲဖြစ်ပွားခဲ့တာလို့ ဆိုပါတယ်။
အဆိုပါ တရက်တည်းမှာပဲ ဖြစ်ပွားခဲ့တဲ့ တိုက်ပွဲကြောင့် စံပြ ၆ မိုင် ဘုရားကျောင်း အပါအဝင် လမ်းမကြီးတကျောရှိ နေရာ ၃ ခုမှာ စစ်ကောင်စီဘက်က ဝင်ရောက်တပ်စွဲထားတယ်လို့ ဆိုပါတယ်။
၆ မိုင်ဘုရားကျောင်းမှာ တပ်စွဲထားတဲ့ စစ်ကောင်စီတပ်ဖွဲ့ထဲက အပြင်ထွက်လာတဲ့ စစ်ကြောင်းကို ညအချိန်မှာ တိုက်ခိုက်ခဲ့လို့ တိုက်ပွဲ မိနစ် ၂၀ လောက် ဖြစ်ပွားခဲ့ပြီး စစ်ကောင်စီက ထိခိုက်ကျဆုံးမှုကိုတော့ မသိရသေးပါဘူး။
ဒါ့အပြင် နောက်ရက်တွေမှာလည်း ၆ မိုင်ကျေးရွာနဲ့ ဘက်သလိန်ကျေးရွာရှိ စစ်ကောင်စီ ခြေကုပ်ယူထားနေရာတွေအပြင် ခမရ ၄၂၇ တပ် ကင်းပုန်းတို့ကို KNDF က အလစ်အငိုက် တိုက်ခိုက်ခဲ့တယ်လို့ ဆိုပါတယ်။
ဇန်နဝါရီ ၁၃ ရက်နဲ့ ၁၅ ရက်နေ့မှာတော့ ဘုရားကျောင်းမှာ တပ်စွဲထားတဲ့ စစ်ကောင်စီတပ်ကို KNDF B (09) က လက်နက်ကြီးနဲ့ အလစ်အငိုက် တိုက်ခိုက်ခဲ့ရာမှာ စစ်ကောင်စီဘက်က ၆ ဦး သေဆုံးသွားခဲ့ကြောင်းလည်း ထုတ်ပြန်ထားပါတယ်။
