မြန်မာနိုင်ငံ ပြည်တွင်းမှာ ထုတ်ဝေတာ တနှစ်ပြည့်ပြီဖြစ်တဲ့ မဇ္ဈိမမီဒီယာဟာ မိုဘိုင်းဖုန်းတွေကနေ တဆင့် SMS သတင်းနဲ့ မိုဘိုင်းဖုန်း ရေဒီယို သတင်းနှစ်မျိုး စတင်ရောင်းချပြီလို့ ဒီကနေ့ ထုတ်ပြန်ကြေညာပါတယ်။

ပြည်တွင်းသတင်း၊ အားကစားသတင်း၊ အနုပညာသတင်းနဲ့ ဖျော်ဖြေရေး သတင်းတွေကို SMS နဲ့ ဖြစ်စေ၊ ရေဒီယို အသံနဲ့ ဖြစ်စေ နားထောင်နိုင်မှာဖြစ်ပြီး ၁ ရက်ကို ၀န်ဆောင်ခ ကျပ် ၇၀ နှုန်းကျသင့်မယ်လို့ ဆိုပါတယ်။

အခုလို မိုဘိုင်းဖုန်းကနေ ရေဒီယို အသံနဲ့ ၀န်ဆောင်မှုပေးတာကို BBC မြန်မာပိုင်း အစီအစဉ်ကလည်း လုပ်ဆောင်နေသလို SMS နဲ့ သတင်းဝန်ဆောင်မှု ပေးတာကိုတော့ အလဲဗင်း မီဒီယာကလည်း လုပ်ကိုင်နေပါတယ်။

သိပ်မကြာမီ နော်ဝေ အခြေစိုက် တယ်လီနော် နဲ့ ကာတာ အခြေစိုက် အော်ရီဒူး ကုမ္ပဏီတွေ မိုဘိုင်းဖုန်း ၀န်ဆောင်မှုပေးတဲ့အခါမှာလည်း အဲဒီ ကုမ္ပဏီတွေနဲ့ ပေါင်းပြီး သတင်းဝန်ဆောင်မှုလုပ်ငန်း တိုးချဲ့ဖို့ ရှိတယ်လို့ မဇ္ဈိမ အယ်ဒီတာချုပ် ဦးစိုးမြင့်က ဒီဗွီဘီ ကို ပြောပါတယ်။