စစ်ကိုင်းတိုင်း၊ မြင်းမူမြို့နယ် မုံရွာ - မန္တလေးလမ်းရှိ အလ္လကပ္ပနဲ့ ဝမ်းပြည့်ကျေးရွာကြားမှာ ဩဂုတ် ၂၈ ရက် ညနေ ၃ နာရီလောက်က ‌စစ်တပ်ပိုင် ကြေးနီတင်လာတဲ့ ကွန်တိန်နာယာဉ်  ၇ စင်းကို မိုင်းဆွဲတိုက်ခိုက်ခဲ့တယ်လို့ ဒေသခံကာကွယ်ရေးတပ်ဖွဲ့က ထုတ်ပြန်ပါတယ်။

‌မုံရွာကနေ စစ်ကိုင်းဘက်ကို ထွက်ခွာလာတဲ့ စစ်ကောင်စီတပ်ရဲ့ ကြေးနီတင်လာတဲ့ ကွန်တိန်နာကား ၇ စီးကို ပဒေသာမိုင်း ၃ လုံးနဲ့ ဖောက်ခွဲတိုက်ခိုက်ရာမှာ ကား ၂ စီး ထိမှန်ခဲ့တယ်လို့ Black Eagle Defence Force-MMU မှ တာဝန်ရှိသူ တဦးက ပြောပါတယ်။

"ကားတွေက လက်ပံတောင်းတောင်ကြေးနီစီမံကိန်းဘက်ကနေ မုံရွာကတဆင့် လာတဲ့ကားတွေ။ တနည်းအားဖြင့် ဦးပိုင်ကုမ္ပဏီရဲ့ဝင်ငွေပေါ့။ လမ်းကြောင်းတလျှောက် စစ်တပ်က ကင်းပုန်းချထား တယ်။ အဲဒီကြားထဲက  ပူးပေါင်းတပ်ဖွဲ့တွေက ရအောင်တိုက်ခိုက်ခဲ့တာ။”

စစ်ဆင်ရေးကို Black Eagle Defence Force-MMU(မြင်းမူလင်းယုန်နက် ကာကွယ်ရေးအဖွဲ့)က ဦးဆောင်ပြီး   People’s Defence Force Myinmu-MMU PDF၊ Myinmu Civil Revolution Force-CRF Myinmu၊  Myinmu Lightning Guerrilla Force (မြင်းမူလျှပ်စီး ပြောက်ကျားအဖွဲ့)၊ မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့- CDSOM၊ စတဲ့ ညီနောင် မဟာမိတ်တွေက ပူးပေါင်း လုပ်ဆောင်ခဲ့တယ်လို့ ဆိုပါတယ်။

ဩဂုတ် ၂၅ ရက်ကလည်း ယင်းမာပင်မြို့နယ် ပုသိမ် - မုံရွာလမ်းက မြောက်ယမားတံတားနဲ့ ရဲတပ်ရင်း ၂၈ ကြားမှာ ကြေးနီသယ်မယ့်ယာဉ်တန်းကို လုံခြုံရေးလုပ်နေတဲ့ ရဲတပ်ဖွဲ့ကို ဒေသကာကွယ်ရေးတပ်ဖွဲ့တွေက မိုင်းဆွဲတိုက်ခိုက်ရာမှာ  ၃ ယောက် သေဆုံးခဲ့ပါတယ်။