ဖမ်းဆီးခံနေရတဲ့ တေးသံရှင်ပိုင်သက်ကျော်ကို အင်းစိန်ထောင်တွင်း စစ်ခုံရုံးက ဇူလိုင် ၁ ရက်နေ့မှာ အလုပ်ကြမ်းနဲ့ ထောင်ဒဏ်သုံးနှစ် ပြစ်ဒဏ် ချမှတ်လိုက်တယ်လို့ အင်းစိန်ထောင်နဲ့ နီးစပ်သူတစ်ယောက်က အတည်ပြုပြောပါတယ်။
ပိုင်သက်ကျော်ကို ပြီးခဲ့တဲ့ မတ်လတုန်းက ရန်ကုန်၊ လှိုင်သာယာမြို့နယ်၊ နဝဒေးအိမ်ရာရှိ နေအိမ်မှာ စစ်ကောင်စီက ဖမ်းဆီးခဲ့ပြီး အကြမ်းဖက်မှုတိုက်ဖျက်ရေးဥပဒေပုဒ်မ ၅၀(ည)နဲ့ တရားစွဲဆိုခဲ့တာပါ။
အင်းစိန်ထောင်တွင်းမှာ အရပ်ဖက်တရားရုံး ၃၈ ရုံးနဲ့ စစ်ခုံရုံး ၆ ရုံးကို စစ်ကောင်စီက ဖွင့်လှစ်ထားပြီး ပိုင်သက်ကျော်ကိုတော့ လှိုင်သာယာမြို့နယ်နဲ့သက်ဆိုင်တဲ့ အင်းစိန်ထောင်တွင်း တရားရုံးမှာ တရားစွဲဆို အမိန့်ချမှတ်ခဲ့တာ ဖြစ်ပါတယ်။
တေးသံရှင်ပိုင်သက်ကျော်ဟာ နာမည်ကျော်မိုနိုတေးသီချင်းတွေ သီဆိုအောင်မြင်ခဲ့တဲ့ ပရိသတ် အခိုင်အမာရှိထားတဲ့အဆိုတော်တယောက်ဖြစ်ပြီး လက်နှစ်ဖက်မရှိတဲ့ မသန်စွမ်းတဦးလည်း ဖြစ်ပါတယ်။
စစ်ကောင်စီက ပိုင်သက်ကျော်ကို PDF တွေနဲ့ CDM တွေကို ငွေကြေးထောက်ပံ့တယ်လို့ စွပ်စွဲပြီး တရားစွဲဆို ထောင်ချခဲ့တာဖြစ်ပါတယ်။
