မန်ချက်စတာယူနိုက်တက် နောက်ခံလူ ဟယ်ရီမက်ဂွဲယားဟာ အသင်းနဲ့ တနှစ်သက်တမ်းတိုး စာချုပ် ချုပ်ဆိုဖို အလွန်နီးစပ်နေပါတယ်။ 

စာချုပ်သစ်မှာလည်း နောက်ထပ် ၁၂ လ သက်တမ်းတိုးခွင့် ပါဝင်လာမယ်လို့ ဆိုပါတယ်။ အသက် ၃၃ နှစ်အရွယ် နောက်ခံလူဟာ အသင်းမှာ သံယောဇဥ်သက်သက်ကြောင့်နဲ့ ဆက်မနေလိုဘဲ အသင်းအတွက် အမှန်တကယ် အသုံးဝင်သူအဖြစ်သာ ဆက်ရှိလိုကြောင်း ပြောထားသူပါ။

ဇန်နဝါရီလမှာ နည်းပြသစ် မိုက်ကယ်ကာရစ် ရောက်ရှိလာပြီးနောက်  ခံစစ် ၄ ယောက်တန်းစနစ်ကို ပြောင်းလဲခဲ့ရာ မက်ဂွဲယားက ပုံစံကောင်းများ ပြန်လည်ရရှိလာပြီး ပွဲထွက်ခွင့် ပြန်လည်ရရှိခဲ့ပါတယ်။  

ပုံစံကောင်း ပြသနိုင်မှုကြောင့် နည်းပြ သောမတ်စ်တူချယ်ရဲ့ အင်္ဂလန်လက်ရွေးစင်အသင်းမှာလည်း ပြန်လည်ရွေးချယ်ခံရပြီး လာမဲ့ကမ္ဘာ့ဖလားအတွက် မျှော်လင့်ချက် ပြန်လည်ရှင်သန်လာခဲ့ပါတယ်။