ပဲခူးတိုင်း ကဝမြို့နယ် သက္ကလ ရဲစခန်းကို မနေ့ည ၇ နာရီကျော်လောက်မှာ ကဝ PDFနဲ့ ခရမ်းPDF တို့ပူးပေါင်းပြီး ဗုံးအကြီးစား ၂ လုံးနဲ့ တိုက်ခိုက်ခဲတာလို့ ကဝPDF ရဲ့ ပြန်ကြားရေးတာဝန်ခံက ပြောပါတယ်။

“အဲဒီတိုက်ခိုက်မှု လုပ်ဆောင်တဲ့အချိန်မှာ ပေါက်ကွဲမှုဖြစ်ပြီး လျှပ်စစ်မီးတွေ ပြတ်တောက်နေတာကြောင့် သေဆုံးဒဏ်ရာရတဲ့ အခြေနေကို အတိကျမသိရဘူး။ သူတို့ဘက်က သေနတ်နဲ့ ၁၀ ချက်လောက် ပြန်လည်ပစ်ခတ်သံကြားရပေမယ့် ကျနော်တို့ မဟာမိတ်တပ်ဖွဲ့က ရဲဘော်တွေ အထိခိုက် အကျဆုံးမရှိဘဲ ဆုတ်ခွာနိုင်ခဲ့တယ်” လို့ ပြောပါတယ်။

သက္ကလမြို့မှာ ဖေဖော်ဝါရီ ၂ ရက်နေ့မနက်ပိုင်းမှာလည်း ကဝ PDF က အုပ်ချုပ်ရေးမှူးရုံးကို အဝေးထိန်းမိုင်းနဲ့ ဖောက်ခွဲတိုက်ခိုက်ခဲ့တယ်လို့ သိရပါတယ်။

ကဝ၊ ခရမ်း၊ သုံးခွ၊ သံလျင်၊ ကျောက်တန်း PDF တပ်ဖွဲ့တွေဟာ Fire Dragon လို့ အမည်ပေးကာ မဟာမိတ်တပ်ပေါင်းစုဖွဲ့စည်းပြီး ပူးတွဲစစ်ဆင်ရေးတွေ အရှိန်ဟုန်မြှင့်လုပ်ဆောင်နေတယ်လို့ သိရပါတယ်။

အဲဒီရဲစခန်း ဗုံးခွဲတိုက်ခိုက်ခံရတာနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။