ပဲခူးတိုင်း နတ်တလင်းမြို့နယ်မှာ ဇန်နဝါရီ ၂၂ ရက် ညနေပိုင်းက စစ်ကောင်စီတပ်တွေနဲ့ နတ်တလင်းပြည်သူ့ကာကွယ်ရေးတပ်ဖွဲ့ Phoexin DF တို့ တိုက်ပွဲဖြစ်ပွားခဲ့တယ်လို့ Phoenix D F က ထုတ်ပြန်ပါတယ်။

နတ်တလင်းမြို့နယ် ရေကြည်ရွာမှာ စခန်းချထားတဲ့ စစ်ကောင်စီတပ်တွေကို မနေ့ညနေပိုင်းမှာ Phoenix D F တပ်ဖွဲ့က ရှော့တိုက်ပြောင်းနဲ့ ပစ်ခတ်ရာမှ နှစ်ဘက် အပြန်အလှန်တိုက်ပွဲ ဖြစ်ပွားပြီး စစ်ကောင်ဆီဘက်က ထိခိုက်သေဆုံးသူ ရှိနိုင်တယ်လို့ ဆိုပါတယ်။

အဲဒီတိုက်ပွဲအတွင်းမှာ Phoenix DF တပ်ဖွဲ့ဘက်က အထိခိုက်အကျဆုံးမရှိဘဲ အောင်အောင်မြင်မြင် ဆုတ်ခွာနိုင်ခဲ့ကြတယ်လို့ ဖော်ပြထားပါတယ်။

ရေကြည်ရွာမှာ ဒေသကာကွယ်ရေးတပ်ဖွဲ့တွေနဲ့ စစ်ကောင်စီတပ်တွေ တိုက်ပွဲဖြစ်ပြီး စစ်ကောင်စီ တပ်ဘက်က ၂ ယောက်သေပြီးတော့ ၃ ယောက်ဒဏ်ရာ ရတယ်လို့ ဒေသခံတစ်ယောက်က ပြောပါတယ်။

နတ်တလင်းမြို့နယ်မှာ ဒေသခံ PDF တပ်ဖွဲ့ ၃ ဖွဲ့ရှိပြီးတော့ ပြီးခဲ့တဲ့နှစ်ကလည်း ပဲခူးရိုးမနားက တောင်ညိုမြို့သစ်ဘက်မှာလည်း PDF တပ်ဖွဲ့တွေနဲ့ စစ်ကောင်စီတပ်တွေ ထိတွေ့တိုက်ပွဲ ဖြစ်ပွား ခဲ့တယ်လို့ သိရပါတယ်။

နှစ်ဖက်တိုက်ပွဲနဲ့ ပတ်သက်လို့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်း ထုတ်ပြန်ထားတာ မတွေ့ရသေးပါဘူး။