အိနိ်္ဒယ ချစ်တီးတွေ မြေပြန်တောင်း
သတင်းဂျာနယ်တစောင်မှာ အိနိ်္ဒယက ချစ်တီးကုလားတွေက သူတို့ လယ်မြေတွေ ပြန်ပေးဖို့ မြန်မာအစိုးရထံ တောင်းဆိုသွားမယ်ဆိုတဲ့ သတင်းဖတ်ရတော့ ပြုံးမိပါတယ်။
တရက်တည်းလိုမှာပဲ ဖတ်ရတဲ့ သတင်းတပုဒ်ကျတော့ ဖတ်ပြီး မချိပြုံး မပြုံးနိုင်ပါ တော့တယ်။
ဧရာဝတီတိုင်းထဲက လယ်သမား ၄၀၀ ကျော် တရားစွဲဆိုခံနေရပြီး ၇၀ လောက် ထောင်ဒဏ်ကျခံနေရတယ် ဆိုတဲ့ သတင်းပါ။ ဒါနဲ့ တောင်သူလယ်သမား ကွန်ရက်တွေ လိုက် မေးကြည့်တော့ မြန်မာပြည်မှာ အသားမမည်းတဲ့ ချစ်တီးတွေ ရှိနေတုန်းဆိုတာ သိလိုက်ရတော့ ပြုံးတောင် မပြုံးနိုင်တော့ပါဘူး။
ဖြစ်နေပုံတွေက လယ်ယာမြေ မှတ်ပုံတင်လက်မှတ်တွေ ချပေးခါနီး ၃ လလောက် အတောအတွင်း ဖြစ်ပွားခဲ့တာ ဖြစ်ပြီး အဲဒီ ၃ လလောက်အတွင်းမှာကိုပဲ လယ်သမားတွေ ရာနဲ့ချီပြီး တရားစွဲခံ ထောင်ဒဏ်ကျခံရ လယ်မဲ့ယာမဲ့တွေ ဖြစ်ကြရတာပါ။
လယ်သမားဆိုတာက လယ်လုပ်တော့မယ်ဆို နီးစပ်ရာ လုပ်ငန်းရှင်တွေထံက ငွေကြေး ချေးငှား စိုက်ပျိုး ကြရတာပါ။ အတိုးနဲ့ ချေးတာကိုပဲ တချို့ လုပ်ငန်းရှင်တွေက အတိုးနဲ့တင် မကျေနပ်နိုင်တော့ဘဲ လယ်မြေ မှတ်ပုံတင် ချခါနီးမှာ လယ်ပါ အပိုင်သိမ်းဖို့ လုပ်ခဲ့ကြပါတယ်။
တောင်သူလယ်သမားများနဲ့ မြေယာလုပ်သားများသမဂ္ဂက ဦးအောင်မိုးဝင်းက “လယ်သမားတွေက ငွေကြေးမတတ်နိုင်တဲ့ အခါကျတော့ လုပ်ငန်းရှင်တွေဆီက ငွေကြေးတွေ ယူရတယ်၊ အဲဒီငွေကြေး အပေးအယူ ကိစ္စတွေ ရှိတယ်၊ လယ်ယာမြေ မှတ်ပုံတင်ခါနီးကျတော့ လုပ်ငန်းရှင်တွေကနေပြီး မြေစာရင်းတွေနဲ့ ပေါင်းတယ်၊ နောက် တရားရုံးတွေနဲ့ ပေါင်းတယ်၊ ဒီဟာက အမှန်တကယ်ကတော့ ငွေကြေး အပေးအယူနဲ့ ပတ်သက်လို့ရှိရင် တရားမလမ်းကြောင်းနဲ့ ငွေရလိုမှုနဲ့ သာလျှင် အမှုတရားစွဲပြီး တောင်းသင့်တယ်၊ ဒါပေမဲ့ တော်တော်များများ ဖြစ်နေတာ အဲလို မဟုတ်ဘူး၊ အသာလေး ငွေကို ထိုးပေးလိုက်ပြီးတော့ အဲဒီမှာ စပါးပေးတို့ တင်းတိုးတို့ အဲဒီလို ပြန်ပြီး မဆပ်နိုင်တဲ့ ပုံစံမျိုးတွေ လုပ်တယ်၊ နောက်တချို့ဆိုရင် လက်မှတ်ကို စာရွက်ဗြောင်မှာ ထိုးခိုင်းတယ်၊ လယ်သမားတွေက အလုပ်ချိန် ကျလာပြီဆိုရင် သူရဲ့ ယုံကြည်မှုအရ ထိုးပေးလိုက်တာပဲ၊ ပြီးတော့ စာရွက်ဗြောင်မှာ ရေးချင်ရာ ရေးလိုက်တာပဲ၊ ရေးချင်တာရေးပြီး အာဏာပိုင်နဲ့ ပေါင်းပြီး အခုလို လယ်ယာမြေတွေ မှတ်ပုံတင်ရမယ့် အချိန်မှာ သူက ဘာလုပ်လဲဆိုတော့ ဥပမာ ဦး ၅၀ ကို သူကိုင်ထားပြီး ၂ ယောက် ၃ ယောက်လောက်ကို တရားရုံးနဲ့ပေါင်း ငွေပေးပြီးတော့ တရားစွဲပြီး အတင်း ထောင်ချလိုက်တယ်၊ အဲဒီလို ချရင်းနဲ့ လယ်သမားကို ကြောက်အောင် လုပ်လိုက်ပြီး နောက်လူတွေဆီက လယ်တွေ သိမ်းလိုက်တယ်၊ အဓိက ဖြစ်တဲ့ ပြဿနာက အဲဒါပဲ။”
နောက်တမျိုးက အသိမ်းခံထားရတဲ့ လယ်မြေတွေ ပြန်ပေးမယ်ဆိုတဲ့ သတင်းကြားပြီး လယ်မြေ ပြန်မရသေးတော့ အဲ့ဒီ လယ်တွေမှာ ၀င်ရောက် ထွန်ယက်စိုက်ပျိုးလို့ တရားစွဲ ခံကြရတာ ဖြစ်တယ်လို့ ပြောပါတယ်။
ပုဒ်မ ၄၄၇ ကျူးကျော်ဝင်ရောက် စိုက်ပျိုးမှု၊ ပုဒ်မ ၄၂၇ အကျိုးစီးပွား ဖျက်ဆီးမှုတွေနဲ့ တရားစွဲခံနေရတာ ဖြစ်ပါတယ်။
ဒီလိုတွေ ဖြစ်နေတာကို သက်ဆိုင်ရာ တိုင်းဒေသကြီးအစိုးရက လက်ပိုက်ကြည့် နေသလား။ တချို့ကိစ္စတွေမှာ အုပ်ချုပ်ရေးပိုင်းက ဆင်းလာပြီး ဖြေရှင်းပေးခဲ့တာ ရှိပေမယ့် သက်ဆိုင်ရာက ၄၊ ၅ ရက်နေ ပြန်သွားပြီး ၁ ပတ်၊ ၁၀ ရက်ကြာတော့ ပြန်လုပ်တာပဲ၊ အုပ်ချုပ်ရေးပိုင်းက တရားစီရင်ရေးပိုင်းကို ၀င်ရောက် စွက်ဖက်တာမျိုး မရှိသလို တရားစီရင်ရေးပိုင်းက တော်တည့်ဖြောင့်မတ် မှန်ကန် လုပ်သလားဆိုတော့ လုပ်တာ မတွေ့ရဘူးလို့ တရားရင်ဆိုင်နေရတဲ့ မော်ကျွန်းမြို့နယ်ထဲက လယ်သမား ဦးအောင်မြင့်က ပြောပါတယ်။
တရားစွဲ အချုပ်ချတဲ့နေရာမှာ အိမ်ထောင်ဦးစီး လုပ်သူတင်မကဘဲ အရွယ်မရောက်သေး တဲ့ ကလေးသူငယ်တွေနဲ့ အသက်အရွယ် ကြီးမြင့်နေပြီဖြစ်တဲ့ အဘိုးအိုတွေပါ အကုန်ဆွဲ ထည့်တာမျိုးတွေ လုပ်တာလို့လည်း ပြောပါတယ်။ လယ်မြေ သိမ်းယူရုံတင်မက လူကိုပါ ဖမ်းပြီး ထောင်ချပစ်နေတာပါ။
လွှတ်တော်ထဲ မျှော်လိုက်ပြန်တော့
လယ်မြေအရေး လွှတ်တော်ထဲ ညံခဲ့ပုံကြည့်ရင်လည်း အတော်ပြောစရာဖြစ်ခဲ့တာ တွေ့ရပါတယ်။
ဇန်န၀ါရီ ၂၁ ရက်က ပြုလုပ်ခဲ့တဲ့ လွှတ်တော်မှာ လယ်မြေပြဿနာ ဖြေရှင်းပြီးကြောင်း သမ္မတက လွှတ်တော်နာယကထံ ပေးပို့တဲ့ သ၀ဏ်လွှာနဲ့ ပတ်သက်ပြီး အမတ် ၁၁ ယောက်က မကျေမချမ်း ထကန့်ကွက်ခဲ့ပါတယ်။
လွှတ်တော်က ဖွဲ့ပေးထားတဲ့ လယ်ယာမြေနဲ့ အခြားမြေများ သိမ်းဆည်းခံရမှုကြောင့် ပြည်သူများ နစ်နာမှု မရှိစေရေး စုံစမ်းရေးကော်မရှင် အစီရင်ခံစာအပိုင်း ၁၊ ၂နဲ့ ၃ တွင် ပါရှိသော အမှုတွဲများနဲ့ ပတ်သက်ပြီး အမှုပေါင်း ၇၀၀ ကျော်မှာ ၄၀၀ ကျော် ရှင်းပြီးပါပြီလို့ သမ္မတရဲ့ သ၀ဏ်လွှာမှာ ဖော်ပြပါတယ်။
လယ်ယာမြေ အမှုတွဲများအပေါ် တိုင်းဒေသကြီးနဲ့ ပြည်နယ်များအလိုက် ဖြေရှင်း ဆောင်ရွက် ပြီးစီးမှုများ ပါဝင်တဲ့ သမ္မတရဲ့ သ၀ဏ်လွှာကို လယ်ယာစိုက်ပျိုးရေး ဒုဝန်ကြီး ဦးအုန်းသန်းက ဆောင်ရွက်ပြီးစီးမှု ရာခိုင်နှုန်းများပါ ထည့်သွင်းပြီး လွှတ်တော်မှာ ဖတ်ကြား ရှင်းလင်းမှုအပြီး လွှတ်တော်အမတ် ၁၁ ဦးတို့က အစိုးရအဖွဲ့ရဲ့ ဆောင်ရွက်ချက်တွေဟာ ပွင့်လင်း မြင်သာမှု မရှိရုံမက မှန်ကန်တိကျမှုလည်း မရှိဘူးလို့ ဝေဖန်ထောက်ပြ ဆွေးနွေးခဲ့ကြတာပါ။
ကော်မရှင်ဥက္ကဋ္ဌ လုပ်တဲ့ ဦးတင်ထွဋ် ကိုယ်တိုင် ထပြောတာက သူတို့ ကော်မရှင်က ပေးပို့ထားတာ အမှုပေါင်း ၅၀၀၀ ကျော်တယ်၊ အခု ဖြေရှင်းပေးပြီးပြီသာ ပြောတယ်။ ဘယ်လယ်သမားမှ လယ်မြေပြန်ရတာ မကြားသေးဘူးလို့ ပြောသွားတာပါ။
တခါ ပုသိမ်အမတ် ဦးဝင်းမြင့်ကလည်း တနိုင်ငံလုံးမှာ ပေါ်ပေါက်နေတဲ့ လယ်ယာမြေ အငြင်းပွားမှုများ၊ သိမ်းဆည်းခံရမှုများနဲ့ ပတ်သက်ပြီး ဒုတိယသမ္မတ ဦးဥာဏ်ထွန်း ဦးဆောင်တဲ့ မြေအသုံးချမှု စီမံခန့်ခွဲရေးကော်မတီက ၂ လအတွင်း လယ်မြေ အမှုပေါင်း ၄၁၈ မှု ရှင်းလင်း ပြီးစီးခဲ့ကြောင်း သမ္မတရဲ့ သ၀ဏ်လွှာပါ အချက်အလက်များဟာ တကယ့်မြေပြင်တွင် ဖြစ်ပျက်နေတဲ့ ပကတိအခြေအနေတွေနဲ့ များစွာ ကွာခြားနေကြောင်း၊ ပုသိမ်မြို့နယ်မှာ အနောက်တောင်တိုင်းစစ်ဌာနချုပ်က သိမ်းယူခဲ့တဲ့ လယ်ယာမြေများနဲ့ ပတ်သက်ပြီး ဒေသခံ ပြည်သူတွေ တရားစွဲခံနေရတယ်လို့ ဆွေးနွေး ပြောကြားသွားတာလည်း ကြားလိုက်ရပါတယ်။
တပ်သိမ်းမြေတွေ မူလပိုင်ရှင်တွေကို ပြန်ပေးမယ်ဆိုပြီး စာတွေ ရောက်ခဲ့ပါတယ်။ တောင်သူတွေဆီကို ပို့တာပါ။ လက်တွေ့မှာတော့ မြေတွေ ပြန်မအပ်တဲ့အပြင် အဲဒီ တောင်သူတွေဟာ ကျူးကျော်မှုနဲ့ တရားစွဲခံနေရပါတယ်။ ပေးကားပေး၏ မရ ဖြစ်နေရုံမကဘဲ တရားရုံးမှာပါ အမှု ရင်ဆိုင်နေကြရတဲ့အတွက် သူတို့ အားကိုးလို့ ရမယ်ထင်တဲ့ မြန်မာနိုင်ငံ လူ့အခွင့်အရေးကော်မရှင် ဥက္ကဋ္ဌဆီကို စာတင်ထားပါတယ်လို့ ဦးဝင်းမြင့်က ပြောသွားပါ သေးတယ်။
ဇမ္ဗူသီရိမြို့နယ် ပြည်သူ့လွှတ်တော်အမတ် ဒေါ်စန္ဒာမင်းကလည်း လယ်ဆည် ဒုတိယ၀န်ကြီး ရှင်းပြသွားတဲ့ မြေယာကော်မရှင် အစီရင်ခံစာပါ ၁၊ ၂နဲ့ ၃ အရ နေပြည်တော်မှာ အမှုပေါင်း ၁၁၁ မှု ရှိတယ်ဆိုတာ ဘယ်ဟာကိုများ ပြောတာပါလဲ။ ကျမတို့ ဇမ္ဗူသီရိမြို့နယ် တခုတည်းက တင်ထားတာတောင် အမှုတွဲပေါင်း ၁၀၀ ကျော် ရှိပါတယ်။ တခုမှ ရှင်းလင်း ပြီးစီးခြင်းလည်း မရှိသေးပါဘူး။ သက်ဆိုင်ရာ ကိုယ်စားလှယ်တွေကလည်း ဒီလို ဖြေရှင်းပေးတယ် ဆိုတာကို သိရှိထားခြင်း မရှိပါဘူး။ ဒါကြောင့် နေပြည်တော် လယ်ယာမြေ အမှုတွဲ ၇ မှုပဲ ရှင်းဖို့ ကျန်ပါတယ်ဆိုတဲ့ ဒီအဖြေကို ကျမအနေနဲ့ ကန့်ကွက်ပါတယ်လို့ ပြောခဲ့ပါတယ်။
ရွှေပြည်သာမြို့နယ် ပြည်သူ့လွှတ်တော်အမတ် ဦးတင်မောင်ဦးကတော့ ၀န်ကြီး ရှင်းသွားတဲ့ အနေအထားနဲ့ လက်တွေ့နဲ့ အများကြီး ကွာခြားပါတယ်။
ရွှေပြည်သာမှာ ဧကပေါင်း သောင်းနဲ့ချီ သိမ်းခဲ့ပါတယ်။ ပြည်သူတွေရဲ့ လိုလားချက်က သိမ်းတဲ့မြေအတွက် ထိုက်သင့်တဲ့ လျော်ကြေး ပေးဖို့ပါ။ ဒုတိယက စီမံကိန်း မလုပ်ဖြစ်တဲ့ မြေပိုတွေကို ပြန်ပေးဖို့ ဖြစ်ပါတယ်။ အခု တကယ်ဖြစ်နေတာက မြေပိုတွေ ပြန်မရတဲ့အပြင် အဲ့ဒီ မြေပိုတွေမှာ ကျူးကျော်တွေ မြေချပါမစ်တွေနဲ့ တရားဝင် ချပေးနေတာတွေ ဖြစ်လာပါတယ်။ ဒီအမှုတွေ တခုမှ မပြီးသေးပါဘူး လို့ ထောက်ပြ ဆွေးနွေးခဲ့ပါတယ်။
တပ်ပိုင် ဆိုတာတွေ ခေတ်စားလာနေ
သမ္မတလည်း အောက်ခြေ၀န်ကြီးဌာနက တက်လာတဲ့အပေါ် လက်မှတ်ထိုးပြီး လွှတ်တော်ဆီ သ၀ဏ်လွှာ ပို့လိုက်တာ တော်တော် လွဲနေပြီလို့ ၀ိုင်းပြောတာ ခံလိုက်ရတာပါပဲ။ သမ္မတကိုယ်တိုင်တောင် ဒီလို အနှပ်ခံနေရတော့ အောက်ခြေ လယ်သမားတွေ ခိုကိုးရာမဲ့ အနိုင်ကျင့် ခံနေရတာ ဘာဆန်းပါမလဲ။ လွှတ်တော်ထဲ လယ်မြေပြဿနာ ပြောဆိုဆွေးနွေးကြရင် တပ်မတော်ဆိုတာလည်း ပါပါနေတာ တွေ့ကြ ရပါတယ်။ မနေ့တနေ့ကပဲ သတင်းတပုဒ် ဖတ်လိုက် ရပါတယ်။
“သင်္ဃန်းကျွန်း၊ မိကျောင်းကန်မြေတွင် စစ်မှုထမ်းဟောင်း အိမ်ရာများ ဆောက်လုပ်ရန် ရှိသဖြင့် ပြန်လည် စွန့်လွှတ်ပေးရန် အစီအစဉ် မရှိကြောင်း ကာကွယ်ရေးဝန်ကြီးဌာနမှ အိတ်ပိတ်ဖြေ။
“သင်္ဃန်းကျွန်းမြို့နယ် မိကျောင်းကန်မြေတွင် စစ်မှုထမ်းဟောင်းအိမ်ရာများ ဆောက်လုပ်ရန် ရှိသဖြင့် ပြန်လည် စွန့်လွှတ်ပေးရန် အစီအစဉ် မရှိကြောင်း သင်္ဃန်းကျွန်း မြို့နယ် ပြည်သူ့လွှတ်တော်အမတ် ဦးသိန်းညွှန့်ထံ အိတ်ပိတ် ဖြေကြားခဲ့သည်။”
မနေ့တနေ့ကပဲ ဒေါ်အောင်ဆန်းစုကြည် တောင်ကြီးမှာ ဟောပြောပွဲ လုပ်မယ့် ကွင်းနေရာ ဟာ တပ်ပိုင်ကွင်းမို့ ခွင့်မပြုနိုင်ဘူးဆိုတဲ့ သတင်းတပုဒ် ဖတ်လိုက်ရပြန်ပါတယ်။ တပ်ပိုင် တပ်ပိုင်နဲ့ တပ်ပိုင်တွေ များများလာတာ ကောင်း၊ မကောင်း ခေါင်းအေးအေးထား စဉ်းစားကြဖို့ သင့်ပါပြီ။
မောင်ထင်ရဲ့ ငဘ တွေ ရှင်သန်နေတုန်း
၁၉၄၇ ခုနှစ်၊ လွတ်လပ်ရေး ကြိုးပမ်းမှုကာလ စာရေးဆရာကြီး မောင်ထင်ရဲ့ “ငဘ” ၀တ္ထုရှည်ကြီး ပုံနှိပ်ထုတ်ဝေခဲ့တဲ့အချိန် လယ်သမားတွေဘ၀ အခုလို ရေးသားဖော်ပြခဲ့ပါတယ်။
“ခေတ်သစ်ကို တို့ဗမာအစိုးရဟူသော အမည်ခံ ကျီးအာသီး စစ်အုပ်ချုပ်ရေး ရောက်လာသောအခါ အနည်းငယ် အသက်ရှုချောင်သလို ထင်ခဲ့သည်။ ၀ါဆိုနဲ့ ၀ါခေါင်လ ရောက်လာလျက်နဲ့ လယ်သမားတို့သည် လယ်ကို မလုပ်ရလျှင် ငတ်သေဖို့သာ ရှိတော့သည်။
“မိမိတို့၏ ဒုက္ခကို သူတပါးက ကယ်တင်ပေးလိမ့်မည် ဟု မျှော်လင့် တောင့်တနေကြပါလျှင် ကမ္ဘာသာလျှင် ကုန်လိမ့်မည်။ ဒုက္ခကား ကုန်မည်မဟုတ်၊ အထူးသဖြင့် မိမိတို့ တိုင်းရင်းသား အချင်းချင်း ဖယ်၍ တိုင်းတပါးသားကို အားကိုးလျှင် ဒုက္ခအပေါင်းထဲမှ ထွက်မြောက်မည်ဟု ထင်မြင်မိပါက “ငဘ” ကို သတိရကြပါဟု ပြောရစ်ရန် လောကဇာတ်ခုံပေါ်၌ ငဘကို ပုဏ္ဏားက နှိပ်စက်ခဲ့သည်၊ နှိပ်စက်ခြင်း ခံရသူသည် နှိပ်စက်သူအား “ဘုန်းကြီးပါစေ၊ သက်ရှည်ပါစေ” ဟု ဆုတောင်းသည်ကို ကျနော် မကြားဖူးပါ။
“ငဘ သည် ပုထုဇဉ်ဖြစ်၍ ပုဏ္ဏားကို စိတ်ထဲ၌ ကြိတ်၍ ရေရွတ်မိပေလိမ့်မည်။ သို့သော် နှိပ်စက်တတ်သော ပုဏ္ဏားတယောက်ကို စိတ်၌ စွဲလမ်း၍ ပုဏ္ဏား တမျိုးလုံးကို ဆန့်ကျင်လိုသော အာဃာတသည် ငဘတွင် မရှိ။ ငဘ၏ သားစဉ် မြေးဆက်တို့က ငဘ ခံခဲ့ရပုံကို သံဝေဂ ယူ၍ မိမိတို့၏ လွတ်မြောက်ရာ လွတ်မြောက်ကြောင်းကို အမျိုးသားချင်း စောင့်ရှောက်တတ်သော ဓလေ့ဖြင့် လူမျိုးနှင့် နိုင်ငံကို ကာကွယ်ရန်ကိုသာ ငဘက လမ်းညွှန်ပေးခဲ့သည်။ ယင်းကဲ့သို့ ယထာဘူတ ကျအောင် စဉ်းစား ဆင်ခြင် နိုင်ကြပါလျှင် မြန်မာနိုင်ငံသည် အနာဂတ်၌ ကျရောက် နိုင်သော အန္တရာယ် အသွယ်သွယ်တို့မှ ကင်းရှင်း နိုင်လိမ့်မည် ထင်ပါသည်” လို့ ဆရာမောင်ထင်က ရည်ရွယ်ရင်းထားခဲ့တာ အခုထိ ရှင်သန်နေတုန်းပါဗျာ။ ခေတ်သစ် ချစ်တီးတွေတော့ ရှင်သန်ခွင့် မပေးသင့်တော့ကြောင်းပါ။
(ပြည်သူ့ခေတ်ဂျာနယ် အတွဲ - ၄၊ အမှတ် - ၁၈၂ ဆရာကိုရွှေအောင် ဆောင်းပါး)
