ထိုင်းနိုင်ငံမှာ ကိုဗစ်-၁၉ မျိုးကွဲဗီဇသစ် အိုမီခရွန်ပိုးတွေ့သူအရေအတွက် တရှိန်ထိုး များလာတဲ့အတွက် ဒီကနေ့ ဒီဇင်ဘာ ၂၁ ရက်နေ့ကစ နိုင်ငံခြားဧည့်သည်တွေ ဝင်ရောက်ခွင့် ယာယီပိတ်ပင်ထားမယ်လို့  ထိုင်းဝန်ကြီးချုပ်က ပြောပါတယ်။ 

ဒီကနေ့ မွန်းလွဲပိုင်း ထိုင်းနိုင်ငံရဲ့ ကိုဗစ်-၁၉ အခြေအနေစီမံကွပ်ကဲရေး ဗဟိုကော်မတီအ စည်းအဝေးအပြီးမှာ ကော်မတီဥက္ကဋ္ဌလည်းဖြစ်တဲ့ ဝန်ကြီးချုပ်ပရာယုဒ်ကျန်အိုးချားက သတင်းစာ ရှင်လင်းပြောကြားခဲ့ပါတယ်။ 

ဒီမတိုင်ခင်က နိုင်ငံခြားကနေ ထိုင်းကိုလာဖို့ ကြိုတင်မှတ်ပုံတင်ထားသူ ၂ သိန်းကျော်ရှိ ကြောင်း၊ ၁သိန်း ၁ သောင်းကျော်က ဝင်လာခဲ့ပြီးဖြစ်ပြီး နောက်ထပ်လာမယ့် ၉ သောင်း ကျော်ကိုတော့  ဝင်ခွင့်ပြုမှာဖြစ်ကြောင်း၊  ဒါပေမဲ့ test & go ( ကွာရန်တင်းဝင်မစရာမလို) တဲ့ စနစ် ဖျက်သိမ်းပြီး နိုင်ငံထဲဝင်လာရင် အရင်ပုံစံအတိုင်း ကွာရန်တင်းဝင်ရမယ်၊  ဝင်လာပြီးသူတွေကို  ကိုဗစ်-၁၉ ကာကွယ်စစ်ဆေးမှု ပိုမိုကြပ်မတ်ရမယ်လို့ ဆိုပါတယ်။ 

လာမယ့် ၂၀၂၂ ခုနှစ် ဇန်နဝါရီ ၄ ရက်နေ့အထိ နိုင်ငံခြားကနေ ဝင်ရောက်လာခွင့် မှတ်ပုံတင်တာတွေ၊ sand box အစီအစဉ်နဲ့ ဝင်လာတာတွေကို ပိတ်ပင်ထားမှာဖြစ်ပြီး အိုမီခရွန်ကူးစက်မှုအခြေအနေပေါ်မူတည်ကာ လက်ခံ/မခံကို  ပြန်စဉ်းစားမယ်လို့ ဝန်ကြီးချုပ်က ပြောပါတယ်။ 

၂၀၂၂ နှစ်သစ်ကူးပွဲတော်အစီအစဉ်ကိုတော့ မဖျက်သိမ်းကြောင်း၊ ဒါပေမဲ့ လူထုကျန်းမာရေးဌာနက သတ်မှတ်ထားတဲ့ စည်းကမ်းချက်တွေနဲ့အညီ ကျင်းပရမယ်လို့ ဝန်ကြီးချုပ်က ပြောသွားပါတယ်။ 

ထိုင်းမှာ ပြီးခဲ့တဲ့ ဒီဇင်ဘာ ၁၇ ရက်က အိုမီခရွန်ပိုးရှိသူ ၉ ဦးရှိကြောင်းအတည်ပြုခဲ့ပြီး မနေ့ကတော့ ပိုးတွေ့သူ ၆၃  ဦးရှိကြောင်း ထိုင်းကျန်းမာရေး ဒုဝန်ကြီးက ပြောခဲ့တဲ့အတွက် ၃ ရက်အတွင်း ကူးစက်သူတရှိန်ထိုးလာတာဖြစ်ပြိး နောက်ထပ် ၃၀ ကျော်လည်း အတည်ပြုဖို့ စောင့်ဆိုင်းနေပါတယ်။ 

ပိုးတွေ့သူအများစုဟာ နိုင်ငံခြားကနေ ဝင်ရောက်လာသူတွေဖြစ်ပြီး ထိုင်းမှာနေတဲ့ အမျိုး သမီး ၁ ဦးသာ နိုင်ငံခြားပြန် ခင်ပွန်းသည်ဆီကနေ ကူးစက်တာဖြစ်ပါတယ်။ 

အိုမီခရွန်ပိုးတွေ့ရှိသူတွေဟာ မူရင်းနိုင်ငံကနေ မထွက်ခွာခင် ကိုဗစ်-၁၉ စစ်ဆေးခဲ့ပြီးသူတွေ၊ ကာကွယ်ဆေးထိုးနှံထားပြီးသူတွေလည်း ပါဝင်တယ်လို့ ဆိုပါတယ်။