မွန်ပြည်နယ်၊ ရေးမြို့နယ်က မီးဖိုချောင်သုံး မီးသွေးဈေးတွေမှာ ပိုမိုဈေးကြီးလာလို့ ချက်ပြုတ်စားသောက်တဲ့နေရာမှာ ၀င်ငွေနည်းပါးတဲ့ မိသားစုဝင်တွေမှာပိုပြီး ခက်ခဲတယ်လို့ အိမ်ရှင်မတွေထံက သိရပါတယ်။
မီးသွေး ၁ အိတ်ကို အရင်က ၂၅၀၀ ကျပ်သာပေးဝယ်ရပေမဲ့ အခုက ၁ အိတ်ကို ၃၅၀၀ ကျပ်အထိ ဈေးနှုန်းတွေ မြင့်တက်လာတာဖြ်ပါတယ်။
“ကျပ် တထောင်အထိ တက်သွားတော့ တလဆို ငါးအိတ်လောက် သုံးတယ် ကျမတို့နယ်ရွာဘက်က လျှပ်စစ်မီးက မရသေးဘူးဆိုတော့ မီးသွေးနဲ့ဘဲ ချက်ပြုတ်စားသောက်ရတာတခါတလေ မီးသွေးက ၀ယ်လို့ တောင်မရတာနဲ့ကြုံရတယ်”လို့ အိမ်ရှင်မတယောက်က ပြောပါတယ်။
မီးသွေးဖုတ်တဲ့သူတဦးက “ အခုက မီးသွေးဖုတ်တဲ့နေရာမှာ မီးသွေးကုန်ကြမ်းဈေးလည်း တက်။ အလုပ်သမားကိုပေးရတဲ့ လုပ်အားခစားစရိတ်တွေကလည်း တက်ပြန်။ သယ်ယူစရိတ်တွေက အစ အားလုံး ကုန်ကျ များတော့ အရင်ဈေးတွေထက် ပိုမိုတက်သွားရတာ” လို့ ပြောပါတယ်။
မီးသွေးကို မီးဖိုချောင်မှာ ချက်ပြုတ်စားသောက်တဲ့ နေရာမှာ အဓိကထား သုံးစွဲကြတဲ့အပြင် အများအားဖြင့် လျှပ်စစ်မီးမရရှိသေးတဲ့ နယ်ဘက်အရပ် ဒေသတွေမှာ ပိုမိုသုံးစွဲကြသလို ထမင်းဆိုင် လက်ဖက်ရည်ဆိုင်တွေမှာလည်း ဝယ်ယူသုံးစွဲနေကြပါတယ်။
