ထိုင်းနိုင်ငံမှာ သံသယရှိသူ  ၁၄ ယောက်ကို ဆေးစစ်ရာမှာ  ၉ ယောက်မှာ ကိုဗစ်-၁၉ ဗီဇမျိုးကွဲ အိုမီခရွန်ပိုးကူးစက်ခံရတာ အတည်ပြုနိုင်ကြောင်း ထိုင်းကျန်းမာရေးဝန်ကြီးဌာန ကုသရေးနဲ့ဆေးသိပ္ပံဦးစီးဌာနက ထုတ်ပြန်ပါတယ်။ 

ပိုးတွေ့သူတွေအားလုံးဟာ  နိုဝင်ဘာ ၁ ရက် နောက်ပိုင်းမှ နိုင်ငံခြားကနေ ထိုင်းနိုင်ငံကို ဝင်ရောက်လာသူတွေချည်းဖြစ်ကြောင်း၊ လေဆိပ်မှာ ကိုဗစ်-၁၉ စစ်ဆေးပြီး နေထိုင်မကောင်းဖြစ်သူတွေကို ထပ်မံစစ်ဆေးရင်း အိုမီခရွန်ပိုးကိုတွေ့ရှိတာလို ဆေး သိပ္ပံဦးစီးဌာနညွှန်မှူး ဒေါက်တာဆူဖကစ် ဆီရီရတ်ဆ်က ဒီဇင်ဘာ ၁၅ ရက် သတင်းစာရှင်းပွဲမှာ ပြောပါတယ်။ 

ထိုင်းမှာ ကိုဗစ်-၁၉ ကူးစက်မှုလျော့လာလို့ RT-PCR စနစ်နဲ့ မစစ်ဘဲ ATK  နဲ့သာ စစ်ဆေး နေရာက အိုမီခရွန်ပေါ်လာတော့ နဂို RT-PCR နဲ့ စစ်ဆေးနည်းကို ပြန်သုံးပြီး ရောဂါရှိမရှိ စစ်ဆေးနေတာ ဖြစ်ပါတယ်။

အိုမီခရွန်စစ်ဆေးတဲ့ ဓာတ်ခွဲခန်းမှာ ဆေးသိပ္ပံဌာနနဲ့ ကွန်ရက်အဖွဲ့အစည်းတွေဆီမှာသာရှိပြီး စစ်ဆေးနည်း အဆင့် ၃ ဆင့်ရှိကြောင်း၊ ပထမဆင့် SNP နည်းနဲ့ ၁-၂ ရက်၊ Target sequence နည်းနဲ့ ၃ ရက်၊ whole genome sequencing နဲ့ ၅- ၇ ရက်ကြာမြင့်တယ်လို့ ဆိုပါတယ်။

လတ်တလော ဘန်ကောက်နိုင်ငံတကာလေဆိပ်မှာ နိုင်ငံခြားက ဝင်ရောက်လာသူ နေ့စဉ်ထောင်နဲ့ချီတဲ့လူတွေကို စစ်ဆေးနေပြီး ထပ်စစ်ရင်လည်း ထပ်တွေ့ဦးမှာဖြစ်သလို ပြည်တွင်းကူးစက်မှုတွေလည်း ရှိလာနိုင်တယ်လို့ ဒေါက်တာ ဆူဖကစ်က ပြောပါတယ်။

ဒါပေမဲ့ တခြားနိုင်ငံတွေမှာလည်း ခုလိုကူးစက်နေတာမို့ ထိတ်လန့်စိုးရိမ်ဖို့မလိုဘဲ ရင်ဆိုင်နိုင်ဖို့ အသင့်ပြင်ထားကြောင်း၊ အရေးကြီးဆုံးအချက်မှာ မြန်မြန်တွေ့ရှိပြီး အမြန်ဆုံးကုသ နှိမ်နင်းနိုင်ဖို့ပဲလို့လည်း ပြောပါတယ်။ 

ထိုင်းနိုင်ငံရဲ့ ဒီကနေ့ နောက်ဆုံးရ ကိုဗစ်-၁၉ အခြေအနေမှာ ပိုးကူးစက်ခံရသူအသစ် ၃၆၈၄ ဦး၊ သေဆုံးသူ ၂၆ ဦးရှိပါတယ်။ ထိုင်းမှာ ဒီနှစ် ဧပြီလကစ ခုချိန်ထိ ကိုဗစ်-၁၉ ကူးစက်ခံရခံသူစုစုပေါင်း ၂၁၈၁,၉၆၀ ဦး၊ သက်သာပျောက်ကင်းသူပေါင်း ၂,၀၈၇,၈၀၆ ဦး၊ သေဆုံးသူ ၂၁,၂၈၆ ဦးရှိတယ်လို့ ကိုဗစ်ထိန်းချုပ်ကွပ်ကဲရေးဗဟိုကော်မတီက ထုတ်ပြန်ထားပါတယ်။ ကိုးကား - https://www.khaosod.co.th/breaking-news/news_6783837