ကချင်ပြည်နယ် မိုးကောင်း-ဖားကန့် ကားလမ်း ပြုပြင် ဖောက်လုပ်ဖို့ ဆိုပြီး ကချင် ပြည်နယ်အစိုးရက ကျောက်စိမ်း ကျောက်မျက်လုပ်ကိုင်နေတဲ့ ကုမ္ပဏီတွေကို လုပ်ကွက် ၁ ကွက် ကျပ် သိန်း ၁၀၀ ထည့်ဝင်ရမယ်လို့ သတ်မှတ် အမိန့်ပေးတာဟာ များပြားလွန်းပြီး ဥပဒေနဲ့ အညီ လုပ်ကိုင်တာ မဟုတ်ဘူးလို့ ယူဆကြောင်း ဖားကန့် ကျောက်မျက်ကုမ္ပဏီ မန်နေဂျာတဦးက ဒီဗွီဘီကို ပြောပါတယ်။
ကချင်ပြည်နယ်အစိုးရဟာ ဒီငွေကြေးကောက်ခံဖို့ တဖက်သတ် အမိန့်ချမှတ်ခဲ့တာ ဖြစ်ပြီး ပထမအရစ် လုပ်ကွက် ၁ ကွက် ငွေကျပ် ၃၃ သိန်းကို ဒီကနေ့ ဇန်န၀ါရီ ၁၅ ရက်နေ့ နောက်ဆုံးထားပြီး ကချင်ပြည်နယ်အစိုးရ ဘဏ်စာရင်းနံပါတ် CF 002561 ကို လွှဲပေးရမယ်လို့ ညွှန်ကြားထားပါတယ်။
ဖားကန့်ပတ်ဝန်းကျင်မှာ စုစုပေါင်း လုပ်ကွက် ၁ သောင်းခွဲဝန်းကျင် ရှိတဲ့အတွက် အခု လုပ်ကွက် ၁ ခုကို ကျပ် သိန်း ၁၀၀ ကောက်ခံမယ် ဆိုရင် ကျပ် ဘီလီယံပေါင်း ၁၅၀ လောက်ပမာဏ ရှိတာမို့ မိုင် ၆၀ လောက် ရှည်တဲ့ ကားလမ်းအတွက် ဒီလောက်များတဲ့ ငွေပမာဏ မကောက်ခံသင့်ဘူးလို့ ကုမ္ပဏီပိုင်ရှင်တွေက ပြောဆိုနေကြပါတယ်။
